EFESI 3 - PATHIAN LEKHABU IRTHIANG C.L. Bible (BSI)

Jentailhai hranga Paula sin thôna

¹ Hi sika hin nangni Jentailhai hranga Krista Jisua mi intâng, kei, Paula hin, nangni ki chongchai pe ngai a ni.

² A lungkhamna sikin Pathianin nin ta hrangin hi sin hi tho hrangin a nin kung ti inhre ta nin ti.

³ Ki insîr viat tâk ang khan, Krista thu’rthup kha inlârnaa inhriattir ki ni.

⁴ Ki thu irziak nin tep intamin chu Krista thurîl kha kin hriat infelzia khom inhre thei nin ti.

⁵ A tirtôn le deipuhai kuang Irtha’n atûna a inhriattir ang hin, tianlai khan chu hi thurîl hi mihriamhai lan hretir ngai mah:

⁶ Thurchi Sa sikin Krista Jisuaa khan Jentailhai khom, Israelhai leh irchon lua suam hrang le pumkhata om hrang le sûngkhat, thu’nkung dong suam hrang an ni thu hi.

⁷ Pathian lungkhamna thilpêk a nin dongtir sika hin a sinthotheina hmangin kha Thurchi Sa sinthotua siam ki ni.

⁸ Keima hi mi irthiang murdihai laia chîn tak nêk khoma chîn ual ki ni, khan khomin Pathianin Jentailhai kuang Krista irchongna suisuak zoiloi Thurchi Sa insîr hrangin a lungkhamna’n a nin kunga.

⁹ Pathian itinrêng siamtu kuanga kumtuanga thu irthupa om, a lei irfûktir kha, mi murdihai kuang inlangtir hrangin a ni iphun a ni.

¹⁰ Pathian vârna nei intamzia hi, Koiindang sika hin, irvân rama vântîrtôn roirêltuhai le irchamneituhai kuang atûn inhriattir a ni ta.

¹¹ Kumtuang ata lei irfûktir tâk ang ngei kha ei Rengpa Jisua Kristaa hlo a zuang inchuktir ta.

¹² Kristaa khan, ama ei iam sikin, irnâi tak le ngam takin Pathian ei inâi thei ta a ni.

¹³ Khanchu, nin ta hranga ki ituangnahai sika, indôp loi hrangin nangni ki ngên, nin roiinpuina hrang a ni.

Krista lungthungna

¹⁴ Hi sika hin Pa makunga khûksadelin ki kûn ngai.

¹⁵ Pa, irvân le irnênga sûngkua tinrêngin an irhming diktak an hmûna kha.

¹⁶ A’rtha zâra nin sûng tianga hringnun inhriatna hrangin a roiinpuina irkhêl tak ata sinthotheina nangni pe sianlân,

¹⁷ iamna sikin Krista chu nin milunga châm sianlân, lungthungnaa irzung kaiin phûm indet nin ini hrang a ni.

¹⁸ Khanchu mi irthiang murdihai le a lungthungna irzatzia hai, seizia hai, irsângzia hai, inthûkzia hai, fel takin inhriat inrual thei nin ti.

¹⁹ Krista lungthungna, inhriat seng loi kha, inhria nin ta, Pathian famirkipna tinrênga insiptir hong ni nin ti.

²⁰ Khanchu, einia sin ngai sinthotheina hmanga ei izong le ei ingaitua phâk bana irkhêl ngei khan,

²¹ itiklai khomin, Koiindanga le Krista kuang roiinpuina kumtuangin om ri se! Amen.