EFESI 2 - PATHIAN LEKHABU IRTHIANG C.L. Bible (BSI)

Thina irthoka hringna

¹ Zoro lei theng tâka khan chu, nin thu zôm loina le nin sualnahai sikin irtha tiang nin ithi a ni.

² Kha laia khan chu rammuala lampui sa loihai zuiin, boiruaka irtha sinthotheinahai roirêltu thu nin izôm a ni, atûna Pathian thu zôm loihai laia sintho mai irtha hi.

³ A dik takin eini khom ei rêngin anni angin ei iom a ni, ei taksa irzuknahai dungzuiin ei oma, ei takpum le ei lungrîlhai lungdo ei isin a ni. Eini khom mi danghai angin Pathian ningmurna nâi ei ni kha.

⁴ Khannisianlân, Pathian khonzana kha a itamin a milung ni thungna kha a ilian a ni,

⁵ ei thu zôm loina sika irtha tiang thi ei ni lai tak khomin, Krista leh a ni inhring tâk a ni. Pathian lungkhamnaa saninhring nin ni tâk.

⁶ Krista Jisua leh ei irzomna sika khan irvân Rama ama leh roirêl hrangin ama pâlin a ni kaithoi tâka.

⁷ Khahai murdi a thôna san chu zoro la hong hranghaia Krista Jisuaa lungthungna a inlanga a lungkhamna lian bîkzia kha an hmutir theina hranga a ni.

⁸ Lungkhamna sika iamnaa saninhring nin ni; nangni itho suak ni maka, Pathian thilpêk a ni.

⁹ Sintho sika ni mah, khano’nchu, mi’n songna an ti.

¹⁰ Thil sa tho hrangin Krista Jisuaa khan isiama omin ama kut suak ei hong nia; kha thil sa tho kha ei omna hrangin Pathianin a lei isiam irfûk a ni.

Kristaa pumkhata siam

¹¹ Nangni, irzirnaa Jentail, taksa kuta sertanhaiin, “Sertanloi” nangni an iti ngai kha.

¹² Kha lai khan Krista la nei mak chêia, Israel in sûngkua ata mi dang nin nia, Pathian thu’nkunga thuthung pên tianga mi nin ni saa, rammuala hin sabeina rêng neiloi le Pathian tak inhre loia nin iom kha inhre mai roi.

¹³ Khannisianlân, atûn chu Krista Jisuaa, nangni tiana hla taka omhai kha, Krista thisen sikin irnâitirin nin om ta.

¹⁴ Krista chu ei irngeina a ni. Ama khan Jentailhai le eini Judahai hi pumkhata a ni siama, ei irdanna ngai bang, irdoina kha, a taksa khan an inboitir a ni.

¹⁵ Dân thupêkhai le tho hrang omhai kha an mongtira, keini le nangni, amaa khan, mihriam thar, pumkhata a ni siama, irngeina a zuang intung tâka.

¹⁶ Krosa khan irdoina kha an boitira, Jentailhai le Judahai kha pumkhata hong omin Pathian leh ei irngei tâka.

¹⁷ Krista a zuanga khan hla uala om, nangni kuang irngeina Thurchi Sa a hrila, nâi uala om, keini kuang khom irngeina Thurchi Sa dên kha a hrila.

¹⁸ Krista zârin ei rêngin Judahai le Jentailhai, Irtha hmunkhatin Pa kuang ei itung suam thei tâk a ni.

¹⁹ Khanchu, atûn hin mikhual le mi châm mai ni ta mak chêia, mi irthianghai leh khan tualkhat le Pathian in sûngkua nin ni sa tâk.

²⁰ Tirtônhai le deipuhai lungphûm chunga sia nin ni, kha lungphûm a kila lung poimo tak kha Krista Jisua hi a ni.

²¹ Kha in pumpui kha amaa khan siam sa a nia, Rengpa hrangin Tempil irthiang a hong ni ta a ni.

²² Nangni khom amaa khan Irthaa Pathian omna in hrangin mi danghai leh sia insa nin ni.