EFESI 1 - PATHIAN LEKHABU IRTHIANG C.L. Bible (BSI)

Chubai mûkna

¹ Pathian nuam lama Krista Jisua Tirtôn Paula khan, mi irthiang Efesi khuaa om, Krista Jisua mi iamomhai chubai ki mûk.

² Pathian ei Pa le Rengpa Jisua Krista kuang ata lungkhamna le inrenna nin kuang om ri se.

Kristaa irtha tianga satvurna

³ Ei Rengpa Jisua Krista Pa Pathian chu inpâk ei ti. Ama khan Krista zâra irvân hmunhaia khin irtha tiang satvurna tinrêngin sat a ni vura.

⁴ Irthiang le sêlnaboia a kuang ei om theina hrangin irnêng irsiang mân khan lung a ni thunga, Kristaa khan a nin thang ta.

⁵ Ama nuamlam le a tum lam ang taka Jisua Krista zâra a nâi ni hrangin a ni lei inkung sa ta.

⁶ A lungkhamna roiinpui tak sika a Nâipa lungthunga thilmanboi pêk sikin Pathian inpâk ei ti.

⁷ Krista thisenin irtan ei ni tâka, ei sualnahai ngaidam a ni tâk. Pathian lungkhamna chu an thûk tak taka.

⁸ Kha lungkhamna kha vârna le inhriattheina chuminbak takin a ni ivur tel a ni.

⁹ Pathianin a lungdo irthup Krista zâra zoi a itum kha zoiin a nin hriattir ta.

¹⁰ Kha a lungdo kha a zoro a chuk tika Pathianin thilsiam murdihai, irvân le irnênga omhai murdi intêl zita, Krista kha a lu taka siam hrang a ni.

¹¹ Thil tinrêng hi Pathian lungdo le ti lam taka tho a ni; Khante, Pathianin a phuta a ti lam angin Kristaa a mihai ni hrangin a ni inthang tâk a ni.

¹² Tho! eini Krista lei tûng masahai hin Pathian roiinpuina kha ei inlangtir hrang a ni.

¹³ Nin saninhringna Thurchi Sa, thutak kha nin inhriatna khan Pathian mihai nin hong ni ta. Krista nin iam sikin Pathianin Irtha Irthiang inkung kha nangni pêkin, Ama ta nin nih ti irsinsiana nin chunga a isia a ni.

¹⁴ Kha kha Pathian roiinpuizia inpâkna hranga ama ta ngei irtan suakna hranga ei irchon luana hranga khapna a ni.

Paula chongchaina

¹⁵ Khasikin kei khom, Rengpa Jisuaa nin iamna le Pathian mihai murdi lung nin thungzia kha kin hriat rengata chu,

¹⁶ ki chongchainahaia khom nangni inhre maiin nangni sikin Pathian kuang lômthu insîr mong ma ung.

¹⁷ Ei Rengpa Jisua Krista Pathianin roiinpuina Pa khan inhriatna lama vârna le inhriat infelna nin nei theina hrangin, Irtha kha nangni a pêkna hranga ngên maiin.

¹⁸ Ama vâr nin hmu theina hrangin nin lungrîlhai ar honga, nangni a koinaa tûngna om hai, a mihai hranga a inkung satvurna irkhêl tamzia hai leh.

¹⁹ Keini a iamhai laia sintho mai sinthotheina lianzia hai kha nin inhriat theina hrangin ki ingên a ni. Hi sinthotheina, einia sintho mai hi irtha lian,

²⁰ Pathianin thina irthoka Krista a kaithoia, irvân Rama a chang tiang an toi laia a ihmang dên kha a ni.

²¹ Krista chu irvân roirêltuhai, irchamneituhai, sinthotheituhai le rênghai chung vita roirêlin hi rammual le rammual la hong om hranga irhming tinrêng laia irhming inchungtak a inei a ni.

²² Khan, Pathianin thil tinrêng Krista ke hnuaia a sia ta, ama chu thil tinrêng Rengpa hrangin Koiindanghai kuang a pêk ta.

²³ Koiindang chu Krista takpum a ni, hmun tina thil tinrêng irkiptirtu irkipna kha.