DANIELA 9 - PATHIAN LEKHABU IRTHIANG C.L. Bible (BSI)

A mihai hranga Daniela chongchaina

¹ Ahasuera nâipa Daria, Media irchia mi, Kaldai rama rêng kum khatna,

² a roirêl kum khatna khan, keima Daniela’n lekhabua chuang deipu Jeremia kuanga Rengpa thu zuang tung, Jerusalem siatna tung hrang a inkung kumhai chu kin hriat thei tâka, kum sômsarina chu.

³ Bu ngheiin, bora puan hai, vâiphin irthua chongchaina le zongin, Rengpa Pathian tiang ki hor heia.

⁴ Rengpa ki Pathian kuang khan ki chongchaia, ki’rphuanga, “O Rengpa Pathian roiinpui tak le ichiom tak, ama lungthunga; a thupêk zôm ngai kuanga khan, thuthung le za’rngaithei nei ngaitu.

⁵ Ni thupêk le roirêlnahai ata rotsanin kin suala, dikloi le felloi takin kin tho tâka;

⁶ ni siahlo kin rênghai, hruaituhai, pa le a rama mipuihai murdi kuang nir hminga thuhril ngai deipuhai thu irngai nuam loiin.

⁷ O Rengpa felna chu ni ta a nia; keinihai chu inzakna vai a ni, atûn lai ang hin; Judai mihai, Jerusalema omhai, Israelhai murdi, ramhla le anaia mi, ni chunga an sin insiatnahai sikin le ram tina ni irzûl indarhai khom danglam loiin.

⁸ O Rengpa ni chunga kin lei sual tâk sikin keini dongtum chu inzakna vai a ni ta, kin rênghai, kin hruaituhai le kin pahai khom.

⁹ Za’rngaina le ngaidamna chu Rengpa kin Pathianin a nei, a chunga irhel pe khom inlân;

¹⁰ a siahlo deipuhai hmangin kin mân tiang a oma, a dânhai zômin Rengpa kin Pathian thu khom zôm nuam loiin.

¹¹ A ni, Israelhai khomin ni he la loia fe’n sualin kin om tâka. Khasikin khosâlna chu kin chunga a itung a ni ta. Pathian siahlo Mosia dâna irziak thuhai le a chunga ei sual tâk sikin.

¹² A thu kin chunga a ihril le kin roirêltu, kin chunga roirêltuhaiin thil saloi tamtak a hong tung irkip ta. Jerusalem chunga tho ang khan vân hnuai pumpuia tho thei ni maka.

¹³ Mosia dâna irziak angin hi thil saloi murdihai hi kin chunga a hong itung a ni; khannisian kin dik loinahai mâksanin, ni thudik inhriat theina kin nei theina hrangin Rengpa kin Pathian milung chukna zong loiin.

¹⁴ Khasikin, Rengpa’n thil saloi chu a en maia, kin chunga a itung a ni ta: Rengpa kin Pathian chu a sin thônahai hin a fela, a hê kin ilâk loi vai hi a ni.

¹⁵ “Atûn hin o Rengpa kin Pathian Aigupta ram ata kut hrât taka a mihai hruai suaktu le irhming inthanga atûn tena irhming insatu, kin suala, a sate’n kin isual zoi tâk a ni.

¹⁶ O Rengpa nang ki ngên, ni felnahai sikin ni ningmurna le nuarna chu ni khopui Jerusalem tâng irthiang ata kîr sianlân; kin sualhai le kin pahai dik loina sikin Jerusalem le ni mihai hi kin kôla om murdihai hi insîrinsiat kin ni ta.

¹⁷ Khasikin o kin Pathian atûn hin ni siahlo chongchaina le zongnahai hi irngaiin lân, Rengpa zârin ni hmun irthiang lei ram tâk chunga hin ni hmêl invâr nôk roh.

¹⁸ O ki Pathian, ni mikuar do’n lân, irngai ro, ni mit mengin lân, kin chiarna le ni khopui irhming phuaa om hi en ro, nang kin izongnahai hi kin fel sika ni kuanga kin hong intung ni ual ta maka, ni za’rngai theina sika a ni ual.

¹⁹ O Rengpa irngai ro, o Rengpa ngaidam ro; O Rengpa irngaiin lân tho ta ro; ir-ial no ro; o ki Pathian, nangma sikin ni khopui le ni mihai nir hming pêla an om sikin,” tiin.

Gabriela’n lei hrilna a hrilfia

²⁰ Keima le ni mi Israelhai sualna sikin thuphachôia, chongchaia, thuhrila, Rengpa ki Pathian kuanga Pathian tâng irthiang hranga ki zong lai takin,

²¹ a ni, chongchaia ki zong lai takin, mi Gabriela, a phuta ki ihmu inlârna khan, khohloia thil inhlan zoro lai angin hrât takin a ni hong pana.

²² Inhriat thiamna a nin neitira, a ni chongpuia, “O Daniela inhriat theina vâr tak inneitir hranga zuang ki ni.

²³ Ni zong phut lai khan thupêk a suak tâka, hril hranga zuang kêng ki ni; inditom tak ni nia; khasikin thil chu irngaitua’n lân, inlârna chu inhre thei roh.

²⁴ “An insiatnahai irhîptir le, sualna inhek hrang le, dik loina inboi hrang le, kumtuanga felna hrang le, inlârna le lei hrilna irsinsia hrang, hmun irthiangtak chu sahriak inthek hranghaiin, ni mi le khopui irthiang hrang, hapta sômsari inkung a ni.

²⁵ Khasikin Jerusalem inding nôkna siam insat nôkna hranga thupêk a suak ata hriak inthek rêng a om nî tena hapta sari ni a ta, ti inhre thei ro; khan hapta sômruk le hapta hni, kholâi le irnênghai siam ni a ta, zoro buai lai taka khom.

²⁶ Khan hapta sômruk inhni zoia hriak inthek chu inboi ni a ta, ite nei ta no ni: khan rêng la hong hrang mihaiin khopui le a hmun irthiang chu insiat an ta; khanchu a mongna chu tuilian leh ni a ta, a mong dênin irdoina om a ta, siatnahai chu inkung sai a ni.

²⁷ Khan hapta khat hrangin mi tamtak kuang thuthung det siam a ta; khan hapta chimrip hrangin irbôlna le thilinhlan bâng a ta, a chiartu chu intirom tha chunga chuangin zuang a ta; khan a mongna, zuang tung ngêt hranga inkung khan ningmurna chu chiartuhai chunga khan buak khumhai ni an ti,” a tia.