DANIELA 11 - PATHIAN LEKHABU IRTHIANG C.L. Bible (BSI)

¹ Khan keima chu Media mi Daria kum khatnaa khan, ama indet hrang le inhrât hrangin ngîr ngit ki ti.

Aigupta le Suria ram

² Atûn hin thudik nan entir ki ti. Irngai ro, Persia rama khan, rêng inthum hong suak an ta, a minlinapu tena chu a danghai nêkin irchong a ta; ar chongna sikin irsong a ta, Grik rama mihai inphûthai a ti.

³ Khan rêng hrâttak, thu neina roiinpuitak roirêl hrangin hong suak a ta, a thu thuin tho a ti.

⁴ A hong suak ata chu a ram chu irsem ni a ta, kôlkil minlia hin irsem ni a ti, ar chihai hrang ni loiin, a thunei laia a irêl ang ni loiin; a ram chu a mihai hrang ni loiin, mi danghai hrang sutpai ni a ti.

⁵ Khanchu sim tianga rêng kha hrât a ta; a hruaituhai laia mi inkhat chu ama nêkin hrât a ta, irchamnei tak ni a ti.

⁶ Kum hek tiang chu irzom nôk an ta, sim tianga rêng nâinu chu hmâr tianga rêng kuang irngeina siam hrangin zuang a ti, khannisian hrâtna chu nei insôt no ni; a hnông khom hnông ual no nia, a hrâtna khom rêng nâinu pêk ni a ta, a hong hruaihai le ama inhrâttirtu le.

⁷ Khannisian a’rzung ata hon cher thar chu, mi dang inkhat ama hmuna hong om nôk a ta, ama kha chu sipai rualhai le zuang a ta, hmâr tianga rêng irkula khan lût a ta, doihai a ta, inhnê a ti.

⁸ Khan an pathianhai, an irlim siamhai le an sumru le rângachak bêlbûr sahai leh khan Aigupta rama chôipai ving a ta, kum idôr vêl mani chu hmâr tianga rêng ata lei irngam ni a ti.

⁹ Sim tianga rêng rama khan, hmâr tianga rêng kha hong lût a ta, khannisian a rama la kîr nôk a ti.

¹⁰ A nâihaiin doi an ta, sipai pâl tamtak irchunin hong an ta, inhnea paltanhaiin, kîr nôk an ta, doihai an ti, a kuldet khom.

¹¹ Sim tianga rêng chu ningmurin suak a ta doi a ti, hmâr tianga rêng kha, mipui tamtak leh suak an ta, mi tamtak a kuta pêk ni a ti.

¹² Mi tamtak chu hruai irhmang ni an ta, a lungrîl inrangin, sîngkhat vêl chu naminrîlhai a ti, khannisian zoro sôt ual ni no ni.

¹³ Hmâr tianga rêng kha hong pût nôk a ta, mipui matona nêka tam hong hruaihai nôkin, zoro hnungkhôn kum hek tiang chu sipai râltukfam leh tamtakin hong pan an ti.

¹⁴ Kha tika khan chu, mi tamtak, sim tianga rêng doi hrangin irsiam an ta; nir chia mi nakhrâtsong mihai le inlârna chu natakin irlek an ta, khannisian irtet no nihai.

¹⁵ Kha tena chu hmâr tianga rêng hong a ta, khopui kul dettak nei khom luapai a ti: khanchu sim tianga hrâtnahai khan danh zoi no nia, a mi inthanghai khomin, danh zoina hrang hrâtna nei ta no nihai.

¹⁶ Khanchu a doitu khan a nuamlam takin doi a ta, a kôla tûte ngîr ngam no nihai, ama chu ram roiinpuia khan om a ta, a kuta siatna om a ti.

¹⁷ Khanchu a ram pumpui hrâtna songin zuang tum a ta, irngeina siam a ti, khan chanlamboi inchangtir hrangin a nâinu kha dôngma’n pe a ta, hlochuk no nia, an lâp khom inlâp no ni.

¹⁸ Hi zoia hin chu ramchârna tiang irhei a ta, tamtak lâk a ta; khannisian hruaitu inkhatin insîrsiatna sapsuakna chu mong a ta, an sîrinsiatna chu ama chunga irlet a ti.

¹⁹ Khanchu an rama kul omna tiang irhei a ta, khannisian kal khatin irlet a ta, hmu thei ni ta no ni.

²⁰ Khanchu ama omna hmun khan mi inkhat ram roiinpuina sia irfuangtu khêlpai hrangin hong ngîr suak nôk a ta; khannisian sûn sôtnotea, ningmurna sika ni loiin, irdoina sika khom ni loiin, irhmangtirin om a ti.

Suria rêng sual

²¹ Khanchu a hmuna khan mi ien nuamloi, ram chôiindômna a ipêk loi chu hong suak a ta; ram a hoi lai takin hong a ta, chongbâi hoitak hmangin ram chu nei a ti.

²² Matona mi kha chu tuilian itânin om a ta, koichitin om a ti; a ni, thuthung hruaituhai khom.

²³ Khanchu a kuang thuthung a siam zoiin chu a sate’n siat zôi a ta; hong ngîr suak nôk hrangin, mipui tômte khomin an hong ihrât thei hrang a ni.

²⁴ Irngei zoro laiin ram bial hoina laia hor siam nôk a ta, a pa le a puhai tho ngailoi la tho a ti; mihai laia râllâk le râllâk thilhaia sum kha sem a ta, a ni kuldet chunga khan, khit thunghai chu la khithai an ta,

²⁵ a sinthotheina le a hâina chu, sipai pâl tamtak le, sim tianga rêng chunga inphût a ta; sim tiang rêng khan sipai pâl tamtak leh hong doi a ta, khannisian ngîr zoi no nia, a chunga irkhitin a la irkhit mai hrang a ni.

²⁶ A ni, a bu tuitak nêkhai ngêt khan ama irhmangtir an ta, a sipai pâlhai khom ihnôlin om an ta, tamtak chu thatin om an ti.

²⁷ Hi rênghai hi chu an lungrîla sat loina irput ni an ta, Dokâng hmun khata minlak tho an ta; hlo chu chuk pe ual no ni, a mongna chu zoro inkung saia ni a ti.

²⁸ Khanchu sum tamtak chôiin ama rama ngêt kîr nôk a ta, a lungrîla thuthung irthiang doiin om a ta; khaanga thoin, a rama ngêt kîr a ti.

²⁹ Zoro indang nî khan hong kîr nôk a ta, sim tiang fe a ti, khannisian an hnung ual hin chu matona ang kha chu ni no ni.

³⁰ Kil tina irhualhaiin ama hong doi an ta; khanchu a milung chuk no nia, kîr nôk a ti, thuthung irthiang chunga khan ningmur irlâk a ta, khaanga tho’n kîr nôk a ti, thuthung irthiang hnung songsanhai chu lôm a ti.

³¹ Sipaihai khan doipui an ta, hmun irthianghai porinchetir an ta; a kulhai khom khan hâlirvôm thilinhlan omhai chu pai an ta, irsîna intirom chu inding nôk an ti.

³² Khan thuthung chunga dik loina sual thotuhai chongbâi hoina khan insiat ni an ta, khannisian mi an Pathian inhretuhai chu det an ta, thil tamtak tho thei an ti.

³³ Khan mihai laia a vârhai chu, mi tamtak irchutirhai an ta, khannisian, khandai hai, meichok hai, sal intângna le inrûk irhmangna’n mi tamtak irlet an ti.

³⁴ An irlet khomin changpuina chîntea indomin om an ta, mi tamtak êsêlin, êrôhai an ti.

³⁵ Khan a vârhai laia senkhatin, anni infâi le irthiang hrang le invâr hrangin irtetpui an ta, a mongna ni dênin; zoro inkung a la ni mai sikin.

³⁶ Reng khan a nuamlam takin tho a ta; ama chôiirsângin, Pathian tinrêng chunga a lian irti a ta, pathianhai Pathian sêlin thil irkhêl hril a ti: khan a ningmurna a hek pe ving mâka chu hlochuk a ta, a iti chu tho ngêt hrang a nia.

³⁷ A’rchihai Pathian khom ite bê’n bê no nia, nupanghai irngainat pathianhai le pathian danghai khom ngaisak viat loiin: mi murdi chunga lian irti a ti.

³⁸ Khannisian khahai nêkin kulhai pathian chu chôiindôm a ta, pathian, a pahai inhriat ngailoi khan, rângachak le sumru le, lunghluhai le thil indit omhai le chôiindôm a ti.

³⁹ Khan pathian dang changpuina’n kuldet taktak chu doi a ta, mi tukhom a pom murdi chu roiinpuitir a ta; tamtak chunga roi inrêltir a ta, a ram chu man neiin sem a ti.

⁴⁰ Khan mongna nî chu sim tianga rêngin ama hong nor a ta; hmâr tianga rêngin tâli le sakor chung chuang mi le irhuang tamtakhai le kêllaiher angin ama doi an ta, ramhai lûtin, chin zoi a ta, palthuanhai a ti.

⁴¹ Ram roiinpui khom lûtkhum a ta, tamtak that ni a ti: khannisian a kut ata hihai hi sansuak ni an ti: Edom, Moab, le Amon mihriam sahai chu.

⁴² Ram chunga a kut thâk a ta, Aigupta ram khom inzôk ual no ni.

⁴³ Khanchu rângachak le sumru siakhômhai chunga le Aigupta rama thil hluhai chunga thu nei a ti. Khan, Libna le Ethiopia mihai chu ama hrungtu ni an ta,

⁴⁴ khannisian nisua le hmâr tianga thu saloiin buai a ta; khanchu mi tamtak irhmangna le lungkânga ningmurin suak a ti.

⁴⁵ Khan Tuipui le tâng irthiang roiinpui tak kâra khan a rêng puan in chu sung a ta, khannisian a mongna tung a ta, tûte’n san thei ni no ni.