DANIELA 10 - PATHIAN LEKHABU IRTHIANG C.L. Bible (BSI)

Tigris tui kôla Daniela’n inlârna a hmu

¹ Persia rêng Kura kum thumna khan, Daniela, ar hming Beltesazzara an iti kuang khan thil a hon langa; kha thil kha a dik a ni, irdoina roiinpuitak a ni: khanchu thil kha an hriat theia, inlârna inhriat theina a neia.

² Kha nikhuaa khan, kei Daniela chu hapta thum a luzôl hîpin irthanvâiin ki oma.

³ Bu zel ne ma unga, sa mani uain mani ki bâia thun viat loiin, hapta thum a luzôl a hîp zoi mâka chu sahriak khom irthu loiin.

⁴ Khan tha khatna, sûn sôminhni le minli nia tui roiinpui tak Tigris kôla ki om laiin,

⁵ ki mit ki hor heia; irngai ro, mi puanze irhmia irvo, a konga Upaz rângachak irthianga irkhit hi a oma:

⁶ a taksa khom Berul lung anga om a nia, a hmêl chu kôlirtêk anga om, a mit khom meiser anga, a bân le a kehai chu dâr irtêk anga, a chong irhâi khom mipui irhâi ang a ni.

⁷ Kha inlârna kha keima Daniela vai hin ki hmua, ki kôla omhai khan inlârna chu hmu mahaia, khannisian a sate zelin an inthinga, an irbîk zoi ta.

⁸ Kha tena chu keima vai ki om tâka, inlârna roiinpui chu ki hmua, hrâtna irthahrui boiin ki oma, ki hmêl satna khom a chuaia.

⁹ Khannisian a chong irhâi chu kin hriata; a ni, a chong irhâi kin hriatin chu, inbokin ki hmâi hnuaia siain ki in irnghil tâka.

¹⁰ Irngai ro, kutin a ni hon thema, ki hong har zoka,

¹¹ ki kuang, “O Daniela nang inditom tak, ni kuanga ki thuhril hi inhre theiin lân, ngîr ta ro; ni kuang a ni hong itîr a ni,” a tia. Hi thu hi a hril zoiin chu inthing pumin ki ngîra.

¹² Ki kuang khan, “Chi no ro Daniela, ni Pathian kuang ni’rngaiintôm hrang le inhrethei hranga nir pêk ni ata ni thuhai chu irngaitua a nia, ni thu sika zuang ki ni.

¹³ Khannisian Persia ram hruaituin sûn sômhni sûn khat a nir doipuia; khannisianlân irngai ro, Mikaela hruaitu lian chu ni san hrangin a honga; Persia rêng kuanga khan ki hong oma.

¹⁴ Sûnmaton tianga ni mihai chunga thil hong tung hrang inhriat theina nei hranga zuang ki ni: inlârna chu sûnmaton tiang a la ini hrang a ni,” a tia.

¹⁵ Hi thu ang taka ki kuang a hril laiin, kei chu ki kûna, chong thei loiin ki oma.

¹⁶ Irngai ro, mi inkhat, mihriam nâipa anga inlang hin ki hmûr a zuan thema; khanchu ki bâi ki hong ânga, ki kôla ngîrpa kuang khan, “O Rengpa, inlârna sikin ki char kin donga, a ni delin kin hriata, irthahrui boi angin ki oma,

¹⁷ hi ki rêngpa siahlo hin, hi ki rêngpa hi itin mo a ichongpui thei hrang? kei lakin irnak boi angin ki oma, thoi khom thoi thei loiin ki oma,” ki tia.

¹⁸ Khanchu mihriam anga inlang khan a ni hon them nôka, ki hong hrât suak tâka.

¹⁹ Khanchu ki kuang, “O mi inditom tak, chi no’n lân, irtharngam takin om ro, a ni, hong hrât ta ro,” a tia. Ki kuang thu a hril lai takin ki hong hrât thei tâka. “Ki rêngpa’n thu hril ri se, nangin ni nin hrâttir tâka,” ki tia.

²⁰ Khanchu, ni kuanga ki izuang nasan hi nin hriat mo? Atûn chu Persia ram hruaitu doi hrangin ki ikîr nôk hrang a ni; ki phut tena chu, irngai ro, Grik ram hruaitu hong a ta.

²¹ Khannisian thudik irziaknaa irziak chu hril ki ta: hitaka hin, nin hruaitu Mikaela ti no chu, tûte ni san hrang om no nihai.