CHAP HLA 1 - PATHIAN LEKHABU IRTHIANG C.L. Bible (BSI)

Jerusalem beiindongna

¹ E he! Jerusalem khua irhming satak ni ngai kha te, a lei siat rem rum ta ngaia! Nam tinhai irngaiirsâng lei ni ngai kha meithâi angin te a om tâka. Khua roiinpui tak lei ni kha, siatin te a om tâka.

² Zâna khom chap khovârin, A bianga mitrithi irte don don a luanga. Ama irngaiirsânga lungkhamtu dang nei loiin a rualhai huangin, a râl an chang zoi ta.

³ Judai rama mihai chu intak tuangin sala om pumin, Nam dang laia irzerepa omin phûkdâia omna hmun hmu zoi loiin, a’rzûltuhai ihmosonghaiin an lampui a iping a ni.

⁴ Zion panna lampui chu a ping khaka, Kût hmang hrang khom tûte om ta mahai, An khopui mikothai khom a siat zoi tâka, Changpân a ap zoi ta. Hla sak thei dôngmatehai khom an irzal zoi ta, An deipuhai khom khêkin an inrûm a ni ta.

⁵ An râlhai kha hruaitu nitna an changa, An ir-iam a ni ta, A sual hrai sikin Rengpa’n deng a intheihai a ni. An râlhaiin a nâinuhai suaka an hruaihaia.

⁶ Jerusalem roiinpuina chu a chuai zoi ta, hruaituhai khom sazuk phîngchâma irnak boi angin, A’rzûltuhai kôla irnak nei ta loiin, châmsôl irveiin an om ta.

⁷ Jerusalemin intak lungzîng a tuang zoiin, Tianlaia a roiinpuina an hriat suaka, a râlhaiin an hong sutpai laia khan, Tûte a san hrang nei maka. A dinghmun siat kha an hnêtuhaiin an innuisana.

⁸ Jerusalem hin thil saloi a tho intam hrai sikin, a innim a ni ta. A’rngaiinhluhai khan an en irhniama, a silkai boi kha an hmusuak tâk sikin, Inzakin a khêka, hnung songsanin a om.

⁹ A porinchena a silkaia kopin, thup thei ta loiin a om. A zoro hek hrang ngaitua ta loiin a oma, a siatna irkhêl hrai sikin, Irtharngam pêktu tûte nei ta loiin; En ro, Rengpa kin ngîrhmun siat lam hi, râlhai an ihrât a ni ta,

¹⁰ A neinun sa neihai râlhaiin an suta, Nam dang fe phal loina hmuna, Tempila an inlûthai hmuin a om chiana,

¹¹ Fâk hrang zongin an khêka, An hringna hrangin an neinun sahai zuarin fâk nêk an zonga, “Rengpa, ni en ro, kin intem lam hi,” tiin khopui chu a khêka.

¹² Khualinzin chaiirvâkhai kuang khan, Ni en roi, tukhom keima anga tuang hi la om ngai mahai. Rengpa ningmurna nikhua a tunga, ki itong a ni ta hi:

¹³ Irvân ata mei a zuang tîra, ki ru sûnga an lûttira, Ki ke ta hrangin lên a dâpa, hnungkîr a nin thotira lungrîl mumalboiin a ni siama.

¹⁴ Ki sualna murdihai kha, irsinsiain a irchunkhôma, ama’n ki ringa a nin hlitira, A rik hraina sikin ki’rzal zoi tâk, Rengpa’n ki râlhai kuta a ni pêka, an makunga ite tho loiin ki om tâk.

¹⁵ Rengpa’n ki sipai hrât murdihai chu an nuisanhaia, ki ruathartehai thathai hrangin. Ama’n sipai a zuang tîra, Grep sômna khura grep sôm angin ki mipuihai a sômhaia.

¹⁶ Khasikin kêng hiang dôra ki ichap, Ki mitrithi khom a irte don don a ni. Lungngam saktuhai an irthekindarh zoia, A nin hartir thei tûte om ta mahai, Râlhai an hrât tâk sikin, Ki nâi le tehai khom an chaninvâi zoi ta.

¹⁷ Zion khom a kut a phara chu, Irtharngam pêk theitu hmu zoi ta mah. Jakoba khom a kôla mihai Rengpa’n an hmumâktirhai vinga, Jerusalem chu porche tak angin an intir tâk a ni.

¹⁸ Rengpa hi chu a dik a nia, a thu ki zôm no sikin, mi murdi’n ki thurchi hi irngai ta roi, Ki ituang natinsat lam hi nin hmu ving, Kin ruatharte le dôngmatehai sala an in-ôk zoi tâk.

¹⁹ Lung ni lei thunghai ngai ki koihai lakin, An ni lei ihuang chian kêng a ni duah, Ki kôla fâk hrang an zong lai khan chu, Ochaihai le ulianhai fâk hmu loiin an ithi zoi hrang kêng tiin.

²⁰ Rengpa ki ituang lam hi ni en ro, Ki lum hlut hluta ite invol thei ma ung, Ki sual hrai sika a ni; Ki’rsîr tatak ta, Khandaia ni that hrang lak ki kôla hin an pung maia, In sûng tiang lak hripuiin a ni bôm.

²¹ Ki khêk irhâi hi nir ngai pe ro ba, Lungngam saktheitu tûte om mahai, A ni intuangtir a nih ti ki râlhaiin an inhriatin chu ki râlhai a sân an râi a fân, ni zoro ten chu hong tung ta sian, Keima ang hin tuang ri sehai.

²² An thil saloi thohai khom hmu pehaiin lân, Ki sual sika an ni iloh lam ang hin lôhai ro, Intak tuangin ki irzal ngôi ngôi a ni ta.