AMOSA 9 - PATHIAN LEKHABU IRTHIANG C.L. Bible (BSI)

Lôi thei viatloi Rengpa roirêlnahai kha

¹ Maichâm kôla ngîrin Rengpa kha ki hmua, khan, ama khan, “Mikot kôlhai an hnîng theina hrangin a sîp michalhai kha zêmin lân, an rênga lu chunga zêmirnôi zit roh. Khan, a thi banhai kha chu khandaiin that ki ta, inkhat khom intân irhmang no nihaia, inkhat khomin lôi sa no nihai a ti.

² Mithi khua dênin an lampui kha choi theng thaihai khom sianlân, khatak ata kha ki kutin la suak ki ta; irvâna kâihai khom sianlân, khatak ata kha kai thâk ki ti.

³ Karmel tâng sîpa irbîkhai khom sianlân, zong ki ta. Khataka khan anni kha kaisum ki ta, khan, tuikhanglian monga ki mit hmu loia irbîkhai khom sianlân, khataka mirûl kha irchamneina pe ki ta, inchukhai a ti.

⁴ An râlhaiin sala an ihruai kha thu pe ki ta, khandaiin sât thâk a ti, changpui nêkin annihai kha thatpai ki itum a ni.

⁵ Ram kha a tôna, inzôitirtu kha Rengpa sipaihai Pathian kha a nia. Khan, khataka om murdihai kha an chardong a ta; khan, ivadung angin zuang lian a ta, Aigupta vadung angin zuang irkai nôk a ta;

⁶ irvâna a tentanhai siama, tuikhanglianhai siama, irnêng chunga a tentan irkual siama, tuikhanglian tuihai koia, irnêng chunga bunpaitu, ar hming chu Rengpa a ni.

⁷ Rengpa thu suak khan, “O Israel nâihaio, ki chunga Ethiopia nâihai angin nin iom loi ma ni? Aigupta ram ata Israel le Kaftor ram ata Filistia mihai le Kir ram ata Suria mihai nangni hruai suakhai ma ung mo?

⁸ Rengpa thu suak khan, ‘Irngai u ta, Rengpa Pathian mit kha hi Israel ram sualhai chunga hin a chum tâka, irnêng chung ata ki inboipaihai ving hrang a ni. Aniachu, Jakoba insûng mihai kha inboipaihai zit no ning,’ a tia.

⁹ “Irngai u ta, thu nangni ki ipêk hrang a nia, khan, mâikachaia bu an insolpai angin, Israel sûngkuahai kha nam tin tin laia khan insol thapai ki ta; khannisianlân, ar mal chîntak khom irnêng chunga ta no ni.

¹⁰ Ki mihai mi sual murdihai, ‘sat loina khan ni’rzûl pha no nia, ni phâk sa no ni,’ tihai kha khandaiin thi an ti,” a tia.

Israel indingtir nôkna

¹¹ Hi thil thotu Rengpa thu suak khan hiang hin a ti, “Kha nikhuaa khan Davida kairêng chim kha indingtir ki ta, a pophai kha tuam ki ta; a siathai kha irfûktir nôk ki ta, tianlaia a iom angin sin nôk ki ti.

¹² Edom hmuna la omhai le ki’rhminga koi nam murdihai kha an nei theina hrangin,” a tia.

¹³ Rengpa thu suak khan, “Irngai u ta, nikhuahai a zuang tung thiai a ni,” kha nikhuahaia khan irnêng tukirlettu khan bu âttu le grep chîltu khan chi inthektu kha irzûl phâk a ta; khan, tâng irsâng khan uain thum inzungtir a ta, tâng murdi zôi irhmang a ti.

¹⁴ Khan, ki mi Israelhai kha sal ata hruai kîr nôk ki ta; khan, kho ram tâkhai kha siam nôk an ta, lua an ta. Khan, grep irhuanhai siam an ta, a uain kha in an ta: irhuanhai khom siam an ta, a ra kha fa an ti.

¹⁵ Khan, an rama anni kha phunhai ki ta, an kuanga ki ipêk ram ata kha inpot suakin om nôk ta no nihai, Rengpa ni Pathian khan a ti.