AMOSA 8 - PATHIAN LEKHABU IRTHIANG C.L. Bible (BSI)

Inlârnaa thei koka om a hmu thu

¹ Rengpa Pathian khan inlârna a nir hmutir nôka, kholum thei kok ki hmua.

² Khan, ama’n, “Amosa, imo ni ihmu?” a tia. Keima’n “Kholum thei kok,” ki tia. Khan, Rengpa khan ki kuang, “Ki mi Israelhai mongna hrang a zuang tung ta; tehel zong ta no ning,” a tia.

³ Rengpa Pathian thu suak khan, “Kha nikhuaa khan biak in hlahai kha lusûn hlaa chang a ta; mithi ruak tam a ta, hmun tina dâihrekin pai suak an ti,” a tia.

Israelhai chunga thil saloi tung hrang thu

⁴ Hi hi irngaitua roi, O! mi’rsamhai fâk zoi nuama, ram mi’nriang inboi nuamhaio.

⁵ Bu kin zuar theina hrangin tha thar kha itika mo a ihek hranga, baidi bu ei zuar theina hrangin irngam nî kha itika mo a ihek hrang, titu; epha inchîntir kin ta, sekel inriktira, dikloi taka huangna irtêna hmanga;

⁶ tangkaruaa mi’nriang irchôka, mi’rsamhai kha kekok bun khata irchôka, bu’rsi hâl irhmang theina hrangin, tituhaio.

⁷ Rengpa khan, Jakoba roiinpuina sâlin khomâk a’rsâma, irlêkloiin an sintho rêng rêng irnghil viat no ning, tiin.

⁸ Hi mi sika hin ram kha an thingin a sûnga om murdihai kha an char a idong hrang mo ni ma? A ni, vadung ang khan hong lian zit a ta; Aigupta ram vadung angin a hong buaiin hong kang a ti.

⁹ Khan, Rengpa pathian thu suak khan, kha nikhua khan, hiang hin hong ni a ta, sûn laia misa intâktir ki ta, misa lum lai khan irnêng kha inthimtir ki ti.

¹⁰ Nin kût nikhuahai kha chardongnaa le nin hlahai murdi kha chapnaa inchangtir ki ti; nin kong murdi kha bora puan diar inkaitir ki ta, lu sîp tina khan inkolna hong intungtir ki ta; mi’n a nâipa neisun a isûn angin om nin ti. Kha nikhua kha chu a mong dênin dengtheina, intakna nikhua ni a ti.

¹¹ Rengpa Pathian thusuak khan, irngai u ta, nikhuahai kha a zuang itung thiai a ni. Kha nikhuahaia khan rama khan châm zuang tîr ki ta, bua châmna ni loiin, tuia châmna ni loiin, Rengpa thu inhriatnaa châmna kha.

¹² Rengpa thu kha irzukin nisua le nitâk, sim le hmâra irfang an ta, hmu ual hliak no ni hai.

¹³ Kha nikhuaa khan dôngmate le ruathartehai satlaihai ten khom kha dangchârin chinginrîl an ti.

¹⁴ Pathian irlim sâla khomâksâma, ‘O Dan, ni Pathian a hring angin,’ le Beerseba fena lampui a ihring mai angin, tihai kha, khaang mihai khom kha chu irtet an ti, thoi nôk viat no nihai, tiin.