AMOSA 5 - PATHIAN LEKHABU IRTHIANG C.L. Bible (BSI)

Irlet hranga ngênna

¹ O, Israel irchihaio, hi thu hi nangni sûnna hranga ki insîr hi inhre roi.

² Dôngmate irthiang Israel kha a tûk tâka; inding nôk ta no ni; a ram chunga pai thâk a ni ta; ama inngîrtir hrangin tûte om mahai.

³ Rengpa pathian khan hiang hin a iti a ni: Israel irchihai kuanga khan, khopui irsâng suakna khan, irzakhat mâksan a ta, khopui irzakhat suakna khan, sômkhat mâksan a ti.

⁴ Rengpa khan Israel irchihai kuanga khan hiang hin a ti, ni zong unglân, hring nin ti:

⁵ Khannisianlân Bethel khua zong no unglân, Gilgala lût viat no unglân, Beerseba khuaa kâi no roi: Gilgal khua kha irningloiin sala an iman hrang a nia, Bethel khua kha chanlamboi hong ni a ti.

⁶ Rengpa kha zong unglân, hring nin ti; khano’nchu, Josefa ina mei angin suak a ta, kâng zoi a ta, Bethel khuaa thatpai hrang tûte om no nihai:

⁷ roirêlna sâipui thinga inchangtira, felna kha irnênga pai thâkhaio;

⁸ Sîruk le sîvazûn siamtu le thina dâihlîm zînga inchangtirtu le sûn kha zân inthima siamtu, tuikhanglian tuihai koia, irnêng chunga inluangtirtu kha, ama kha zong unglân, ar hming chu Rengpa a ni,

⁹ kul chunga irhmangna hong tung dôra, mi hrâthai chunga irhmangna intungtu kha.

¹⁰ Kul mikota dik taka roirêltu kha a khôkmâka, thu diktak hriltu kha.

¹¹ Khasikin mi’nrianghai sirpha’n nakhrâtin bu nin lâkpai pea: lung irchuan inhai nin sina, khannisianlân a sûnga lêng no chin ni; grep irhuan hoihai nin siama, khannisianlân a uain in no chin ni.

¹² Nin sualnahai a tamzia le nin sualnahai a’rkhêlzia kin hriata; mi felhai dengintheitira, fâkinrûkna lâka, kul mikota mi irsamhai dongtum ngei khom pêk phal loihai.

¹³ Khanchu mi vâr kha, khaang zoroa chu a dâihreka zoro saloi a ni sikin.

¹⁴ Nin hring theina hrangin sat loina zong loiin, satna zong unglân; khan, nin insîr angin Rengpa sipaihai Pathian kha nin kuang om mai a ti.

¹⁵ Sualna kha khôkmâk unglân, satna irngaiinhlu unglân, mikota roirêlna kha inding indet roi: Josefa-hai mi la omsunhai chunga khan Rengpa, sipaihai Pathian khan lungkhamna a inei loi ma ni.

¹⁶ Khasikin Rengpa, sipaihai Pathian, Rengpa khan hiang hin a ti: kholaidung irzat murdia chap rak rakna om a ta; kholai murdia, a poi bâka! ti an ta; chardong hrangin loi neituhai leh chap rak rak hrangin a sûn thiamhai koi an ti.

¹⁷ Khan, grep irhuan murdia chap rak rak an ta; nin laia ki ife theng hrang a nia, Rengpa’n a ti.

¹⁸ Rengpa nikhua nuamhaio, nin chung a zîng e! Ithoa mo Rengpa nikhua kha nin inuam? vâr ni loiin inthim a ni ual.

¹⁹ Kâmkeibaknei rotsana, savom tong mi ang le ina lûta, bang chunga kut irnghata, mirûlin a inchuk ang a ni.

²⁰ Rengpa nikhua kha vâr ni loiin inthim a ini loi hrang ma ni? Inthim irsa le vâr rêng rêng khom nei loiin?

²¹ Nin kûthai ki khôkmâkin ki hnuaisiaa, inkhômpui ir-uphai khan lôm ual no ning.

²² A ni, nin hâlirvôm thilinhlan le nin bu inhlan, nin hlan khom unglân, pom no ning, nin sâ mar irngeina inhlanhai khom uksak ual no ning.

²³ Nin perkhuang irhâi hoi kha irngai no ning: Khasikin keimaa ni hla nin chok kha lapai roh.

²⁴ Khannisianlân, roirêlna dik kha vadung angin luang sianlân, felna kha ivapui kang ngailoi angin luang ri se.

²⁵ O, Israel in sûngkuahaio, kum sômminli sûngin ramchâra khan irbôlnahai le thilinhlanhai ki kuang nin hong ichôi ma ni?

²⁶ A ni, nin rêng Sakut le nin Molok puan inhai le, nin Kaiuan millimhai, nin ârsi pathian, mâni hranga nin isiam kha, nin pêla.

²⁷ Khanchu Damaska khua khêl tiang sala nangni infetir ki ta, Sipaihai Rengpa pathian khan a ti.