2 SAMUELA 8 - PATHIAN LEKHABU IRTHIANG C.L. Bible (BSI)

Irdoinaa Davida hrâtna thu

¹ Zoro sôt ian hnunga chu rêng Davida khan Filistia mihai kha a doia, an hnea. Khanchu Davida khan Filistia mihai thuneina bulpui kha a lâk pea.

² Kha zoiin Moab mihai a doi inhne nôka, a hringa a ichelhai kha irnênga an zâltirhaia, inthum laia inhni a thathaia. Khanchu Moab mihai kha a thuhnuaia an om tâka, khâzana an hong ichôi ngai a ni ta.

³ Kha hnung chu Davida khan Eufrates vadunga a ram la nôk hrangin a fe malamin Zoba rêng Rehoba nâipa Hadadezera khom a doi inhnêa.

⁴ Khanchu Davida khan a sakor chung chuang mi sângkhat irzasari le sipai sînghni a chel pea. Khan Davida khan, tâli irzakhat kai hrang sakor rukbak a lâka, a dang kai chu an irthahrui a tuk sat pehaia.

⁵ Damaska-a Suria mihai Zoba rêng Hadadezera san hranga fehai kha Davida khan a lei doia, mi sînghni le sânghni a thata.

⁶ Kha hnung chu Davida khan Suria rama Damaska khan sipai a siaa; khanchu Suria mihai kha Davida thuhnuaia an om tâka; khâzana an hong pêk ngaia. Rengpa’n Davida chu a fena tina inhnêna a pêka.

⁷ Davida khan Hadadezera mi lianhai rângachak phohai a lâkpai pea, Jerusalema a chôia,

⁸ Hadadezera khua Beta irthokin, Berothai-a irthokin, Davida khan dâr tamtak a lâka.

⁹ Hamath rêng Toia khan Hadadezera sipai murdi Davida’n an hnê ti a len hriata.

¹⁰ Khanchu Hadadezera kha a doia, an hne sikin chubai mûk hrang le lômpui hrangin Toia khan a nâipa Jorama kha Davida kuang a tîra. Hadadezera khan Toia hi a lei idoi ngai a ni. Khante, Jorama khan sumru le rângachak hai, dâra siam thil a hong chôi pea.

¹¹ Reng Davida khan kha thilhai kha Rengpa ina hmang hrangin an hlana, khabana ram dang mi a inhnê tâkhai ata sumru le rângachak a ilâkhai khom kha an hlan sa tâka.

¹² Khahai kha Suriahai ta, Moabhai ta, Amona irchihai ta, Filistia-hai ta, Amalek-hai ta, Zoba rêng Rehoba nâipa Hadadezera rengata a râllâkhai an ni.

¹³ Davida kha michi phâizôla, Edom mihai sîngkhat le sângriat a that zoia a hong kîr tena len vâng chu ar hming kha a inthang ual hrang a ni.

¹⁴ Edom ram hmun tina sipai a siahaia, khanchu Edom mi murdi kha Davida thuhnuaia an om tâka, khâzana an hong chôi ngaia. Rengpa’n Davida chu a fena kipa an hnêtir maia.

¹⁵ Davida khan Israel mihai chunga roi a rêla, mi murdi chunga khan fel takin roi a rêla.

¹⁶ Zeruii nâipa Joaba kha sipai hruaitu ulian tak a nia; Ahiluda nâipa Jehosafata kha thurchi irziaktu a ni;

¹⁷ Ahituba nâipa Zadoka le Abiathara nâipa Ahimeleka kha ochai an nia; Seraia kha ziaktu a ni;

¹⁸ Jehoiada nâipa Benaia kha Davida hrungtu laia hruaitu a nia; Davida nâipasalhai kha ochai an ni.