2 SAMUELA 7 - PATHIAN LEKHABU IRTHIANG C.L. Bible (BSI)

Davida kuanga deipu Nathana chongbe

¹ Reng Davida kha a ina a oma, Rengpa khan a râlhai lai ata lungngam takin an omtir tâka.

² Kha hnung chu rêng khan deipu Nathana kuang, “Hin keima chu, sidar thinga siam ina ki oma, nikhomsianlân Pathian Thuthung Bôm kha chu puan in ma maia a oma,” a tia.

³ Nathana khan, “Ni lungrîla om lam takin tho ro, Rengpa ni kuang a om mai kha te,” a tia.

⁴ Khannisian kha ni zân ngêta khan Rengpa’n Nathana kuang,

⁵ “Fe’n lân, ki suak Davida kha va hril ro, Rengpa khan ki omna hrang tempil chu nangma’n sin no chi ni.

⁶ Israel irchihai Aigupta ram ata ki hruai suaka irthokin atûn ten hin tempila la om mai ma ung, puan ina kêng ki la iom.

⁷ Israel irchihai laia ki fena hmun tina khom ki mi Israelhai enkol hranga thu ki ipêk nam hruaituhai kuang, itho mo sidar thing leh in nin ni isin pe loi? ti ngai ma ung.

⁸ “Khasikin ki suak Davida kuang, itinrêng sinthei Rengpa khan hiang hin a ti, kêlbelra lêngna khan belra enkolin ni oma, ki mi Israelhai chunga hruaitu hrangin nang kin thang suaka.

⁹ Ni fena hmun tina ni kuang ki om maia, ni maton tianga râl omhai ki’rzûlpaihai ngaia. Irnênga mi inthangtak takhai irhming angin irhming inthangin nang ki siama.

¹⁰ Ki mi Israelhai hrang hmun kin kung, kha khan anni chu mihai sirbea an om loina hrangin ki inomtir tâk a ni. Hi ram an hong lût ata mi pualoihai deng an intheitirhaia, khannisian khaang kha chu om viat ta no ni.

¹¹ Ni râlhai lai ata zôkin nang inomtir ta ki ti, khabana irchi suanpâr nang pe ual ki ti.

¹² Ni zoro a heka ni puhai kuang ni zâl tika khan, nir chi, ni rîla ra nâipasal inkhat rêng inchangtir ki ta, a ram kha indet ni a ti.

¹³ Ama khan keima tempil sintu chu ni a ti, a ram rêngtoihmun chu kumtuanga hrangin indettir ki ti.

¹⁴ A pa ni ki ta, ama kha ki nâipa ni a ti. Khan, ama khan thil a tho insualin chu mihriamin nâi a ihêm ngai angin hêm ki ti.

¹⁵ Nikhomsianlân, rêng ni chang theina hrangin Saula ki ikhâi irhmang kuang ata lungkhamna ki ilâkpai pe ang khan ama chu masan ual no ning.

¹⁶ Ni in sûngkua le ni ram kha kumtuangin indet ni a ta, ni rêngtoihmun kha kumtuangin indet ni a ti,” tiin Rengpa thu a zuang tunga.

¹⁷ Rengpa’n a kuang thu a inlang murdi kha Nathana khan Davida kuang an sîr tâka.

Davida lômthu hrilna chongchai

¹⁸ Khanchu Davida kha irtongna puan ina khan a lûta, Rengpa makunga toiin a chongchaia, “O Rengpa Pathian, tu mo ki nia, ki in sûngkuahai khom i ual mo kin nia, hi ten ramhai hi ni ni ihruai?

¹⁹ O Rengpa Pathian hi khom hi nangma mithmua chu thil chînte ni a ti, khannisian kum tamtak la hong tung hranga ni suak irchi suanpârhai hong om mai hrang lam lei hrilin, O Rengpa Pathian thoithar la hong om hrang kha ni nir hmutir tâka.

²⁰ Davida kuang hin imo la hril infel ual hrang? Ni suak hi ni nin hriat hleta, O Rengpa Pathian.

²¹ Ni suak hi nir chutir hrangin ni lungdo le thiltum ang lam takin hi thil roiinpui tak hi ni tho tâka.

²² Khasika khan O Rengpa Pathian nang chu ni iroiinpui a ni; nangma anga hi tûte zel om mahai. Nangma tih no chu Pathian dang zel om mahai ti ki inhriat mai ngai a ni.

²³ Nangma mi innitir hrang, sal ata ni irtansuakhai, ni mi Israelhai anga rêng rammuala hin om mahai. An ta hranga thil roiinpui le thil irkhêl ni ithohai khan rammual pumpuia nir hming chu inthangin a iom a ni. Aigupta ram ata ni dongtum hranga ni inzôkhai kha, ni mihai kha maton tiang an fe mai lai khan nam dang le an pathianhai kha nin hnotsuak pehaia.

²⁴ Khaang khan Israelhai chu kumtuanga ni mihai ni hrangin ni siamhai tâka. Nangma, Rengpa chu an Pathian ni nia.

²⁵ “Khan, atûn hin O Rengpa Pathian, ni suak chungchâng thu le ar chi suanpârhai chungthu ni insîr kha kumtuanga hrangin indetin lân, ni ihril tâk ang khan tho roh.

²⁶ Itinrêng sinthei Pathian chu Israelhai Pathian a nia tiin nir hming chu kumtuangin chôiindômin om ri se. Khanchu ni suak Davida in sûngkua khom ni makunga indetin om ri se.

²⁷ O itinrêng sinthei Rengpa, Israelhai Pathian, ni suak kuang hin, Ni’rchihai rêngin siam ki ti, tiin nin puang tâka, khasikin ni suak hin hi chongchaina hi ni kuang a intung ngam a ni.

²⁸ O Rengpa Pathian nang chu Pathian ni nia, ni thu chu thutak a ni, hi thil sa hi ni suak kuanga ni inkung tâk a ni.

²⁹ Khasikin ni suak in sûngkuahai chu ni makunga kumtuanga a om mai theina hrangin satvur ro; o Rêngpa Pathian, ni lei inkung tâka, ni satvurna’n ni suak irchihai hi kumtuangin satvurin om ri sehai,” a tia.