2 SAMUELA 6 - PATHIAN LEKHABU IRTHIANG C.L. Bible (BSI)

Jerusalema Thuthung Bôm lâk kîr a ni

¹ Davida khan Israel mihai laia sipai inthang ngot mi sîngthum a buk nôka.

² Judai rama Baala khuaa irthokin cherubhai chunga chuang itinrêng sinthei Rengpa irhming irput Thuthung Bôm kha zu la hrangin Davida khan a fepuihaia.

³ Pathian Thuthung Bôm kha tâng chunga Abinadaba in ata an lâksuaka, tâli thara an bânga. Abinadaba nâipasalhai Uza le Ahioa hai khan tâli thar kha an chalaia;

⁴ Ahioa kha Pathian Thuthung Bôm maton tiang khan a fea.

⁵ Davida le Israel mihai khan an hrâtna murdi le hlasaka lâm pumin Rengpa an chôiindôma, irhâihoi chi tinrêng perkhuang hai, belem hai, khuang hai leh rosem hai, dâr irbu hai sukin an oma.

⁶ Nakona hruizôl kha an tungin chu sehrât kha a pêmlûta, Uza khan a hon bana, Thuthung Bôm kha a hong intûka.

⁷ Rengpa ning kha Uza chunga an mur pe thuta, Thuthung Bôm a hong tôn sika khan Pathianin kha zela khan a thata. Pathian Thuthung Bôm kôla khan a thi tâka.

⁸ Khasika khan kha hmun irhming hranga khan Pereza Uza iti a ni ta. Rengpa khan ningmurin Uza kha kuttum a tho tâk sikin Davida kha a ning an mur pea.

⁹ Kha hnung chu Davida khan Rengpa kha a chia, “Itin mo Rengpa Thuthung Bôm kha ki kuang ki ichôi thei hrang?,” a tia.

¹⁰ Khanchu Davida khan Rengpa Thuthung Bôm kha Jerusalema chôi ta loi hrangin a ngaituaa; Git mi Obed-edoma in sûng tiang a sia tâka.

¹¹ Rengpa Thuthung Bôm kha Git mi Obed-edoma ina khan tha thum a oma, khanchu Rengpa khan Obed-edoma le a insûngkuahai kha sat a vurhaia.

¹² Reng Davida khan Pathian Thuthung Bôm sika khan Obed-edoma in sûngkua le loi murdi Rengpa’n sat a vur ti an hriat tâka. Khanchu Davida khan Pathian Thuthung Bôm kha Obed-edoma in ata Jerusalema chôi hrangin a zu lâk tâka.

¹³ Thuthung Bôm irzôntuhai kha kal ruk an phêt tena chu Davida’n a’rngamtirhaia, sehrâtchal le sehrâttehai kha irbôlna hrangin Rengpa kuang an hlana.

¹⁴ Davida khan puanzâiirhmi ochai songkol irfîngte vai innghâkin thei dôrin Rengpa makunga a lâma.

¹⁵ Khaang khan Davida le Israel mihai kha râifâna pâi pumin le bekul tum irhâi inring du durin Rengpa Thuthung Bôm kha Jerusalema an hong ichôi a ni.

¹⁶ Khan, Rengpa Thuthung Bôm kha Davida khopuia hong chôi inlût a ni lai khan Saula nâinu Mikali khan tukvera irthokin a lei thîra, Rengpa makunga Davida irchôm le lâm kha a hmuin chu, a hmusit lungrîl tâka.

¹⁷ Thuthung Bôm kha an hong chôia, a siana hranga Davida indang sai, puan in sûnga a hmun hranga khan an sia tâka. Kha hnung chu Davida kha hâlirvôm thilinhlanhai le irngeina thilinhlanhai Rengpa kuang an hlan tâka.

¹⁸ Davida’n hâlirvôm thilinhlan le irngeina thilinhlanhai kha an hlan zoiin chu itinrêng sinthei Rengpa irhmingin mipuihai kha sat a vura,

¹⁹ mipui murdi, Israel pumpuihai kha nupang le pasal, mi tinin bai tiam inkhat le sa tin inkhat le grep ra châr a sem pehai chita. Khanchu an mâni in chita an fe ta.

²⁰ Kha irzoiin chu Davida kha a insûng mihai satvur hrangin a kîr nôk tâka. Saula nâinu Mikali kha Davida don hrangin a hong suaka, “A vuana Israel rêng chu a roiinpui vang na! Mi chanlamboi inzakna inhre viat loi, korongboia om ang dôra a vuan hin a zuitu dôngmatehai mithmua korongboiin a iom kha na!,” a lei tia.

²¹ Davida khan Mikali kha a sâma, a kuang, “Ni pa le a in sûngkuahai murdi nêkin Israelhai chunga rênga nin thangtu Rengpa makunga kêng ki ilâm. Rengpa makunga khan ki ilâm mai hrang a ni.

²² Hi nêk khom hin inzakpuiin om ki ti, keima le keima khom la’rsit ki ta; khannisianlân kha a zuitu dôngmate ni itihai chôiindômin om ki ti,” a tia.

²³ Khaang khan Saula nâinu Mikali khan a thi dênin nâi nei ta maka.