2 SAMUELA 3 - PATHIAN LEKHABU IRTHIANG C.L. Bible (BSI)

¹ Khan Saula insûngkua thophai le Davida thophai kha zoro sôttak an irdoia. Davida kha a hong hrât ual uala, Saula insûngkuahai kha an dok tîr tîra.

Davida nâipasalhai

² Davida khan Hebron khuaa khan nâipasal ruk a neia; a ulian dônin hihai hi an ni. Amnona, a nu chu Jezreel mi Ahinoami kha a ni.

³ Kileaba, a nu chu Karmel mi Nabala dôngma Abigaili kha a ni. Absaloma, a nu chu Gesur rêng Talmaia nâinu Maaki a ni;

⁴ Adonija, a nu chu Hagithi a nia. Sefatia, a nu chu Abitali a nia.

⁵ Ithreama, a nu chu Egli a ni. Hihai hi Davida nâi Hebrona suakhai chu an ni.

Davida tiang Abnera a kop

⁶ Saula in sûngkua tianga thophai le Davida mihai an irdoi sûnga khan Abnera kha Saula thoptuhai laia khan thu a hong nei u uala.

⁷ Sûn khat chu Isbosetha khan Abnera kuang, “I lo hrangin mo ka pa Saula lâksîrnu Rizpii, Aii nâinu kha ni izâlpui?,” a tia.

⁸ Isbosetha thuhril khan Abnera lungrîl a dêng pe hraia, a ning an mur pe oka, “Judahai ui lu ang ringot hi mo ki ini? A vuan tena hin ni pa Saula chunga le a urênghai chunga le a rualhai chunga iamomna kin langtira, Davida kuta nang inhlan ma unga, nikhomsianlân a vuan hin nangma’n hi nupang chunga sualin ni ni ibe tâka.

^9-10 Saula le a insûngkuahai kut ata ram kha lapai pea, Israelhai le Judahai chunga Dana irthokin Beerseba dênin Davida rêngtoihmun indingtir nôk hrangin Rengpa’n Davida kuang chong a irkhâm angin ki tho tuanintung no’n chu Pathianin Abnera chu a ilo lam takin lo ri se, kha nêka irkhêl ual khomin,” a tia.

¹¹ Khanchu Isbosetha khan Abnera kha a chi sik ringotin ite don ngam maka.

¹² Abnera khan Hebrona om Davida kuang mi a tîra, a kuang, “Hi ram sûnga hin tu mo roirêl hrang? Keima kuang thuthungin lân, khanchu Israel mi murdihai hi nangma tianga kop chang hrangin nang thop ki ti,” a tia.

¹³ Davida khan, “A sa, nangma kuang thu thung ki ti. Khannisianlân, thil inkhat nan phût hrang ki nei, nir hmupui hrangin ni hong tika Saula nâinu Mikali hong hruaiin lân, khanchu ki hmêl hmu thei ni ti,” a tia.

¹⁴ Davida khan Saula nâipa Isbosetha kuang khan, “Filistia mihai servun irzakhata ki irchôk ki dôngma Mikali kha ni hong pe ro,” tiin mi a tîra.

¹⁵ Khanchu Isbosetha khan a pasal Laisa nâipa Paltiela kuang ata kha an hruaia.

¹⁶ A pasal khan chap pumin Behurim kho dênin a hong zuia. Khannisianlân Abnera’n a kuang, “Kîr nôk ta roh,” a tia. A kîr nôk tâka.

¹⁷ Abnera kha Israel hruaituhai kuang a fea, an kuang, “Matona khan chu Davida kha nin rêng hrangin nin nuam ngaia.

¹⁸ Atûn hin nin tah hrangin zoro inchum a ni. Rengpa’n Davida chungthua khan, ‘A ni zui Davida kutin ki mi Israelhai kha Filistia mihai kut ata le an râlhai murdi kut ata kha saninsuahai ki ti,’ a iti kha inhre mai roi,” a tia.

¹⁹ Abnera’n Benjamina namhai khom kha a chongpuia, kha hnung chu Abnera kha Israel mihai le Benjamina nam murdihaiin, a sa an iti murdi Hebrona Davida mikuar inhriata insîr hrangin a fe tâka.

²⁰ Abnera kha Hebrona Davida kuang mi sômhnihai leh an fea, Davida khan Abnera le a kuanga sômhleihnihai ta hrangin hruai an thea.

²¹ Abnera khan Davida kuang, “Thoi ki ta, ni kuang thu an thung theina hrangin Israel mi murdihai hi ki rêngpa kuang koi bûmhai hrangin fe ta ki ti,” a tia. Davida khan, Abnera kha a tîra, khanchu irtharngam takin a fe tâka.

Joaba’n Abnera a that

²² Inhnung ual viata chu Joaba le Davida mihai ram riak kha an hong kîra, râllâk sum tam tak an hong chôia. Khannisianlân Abnera kha Hebrona Davida kuang khan lei om ta maka; Davida’n a lei tîr tâk sikin, ama khom irtharngam takin a ife tâk a ni.

²³ Joaba le a kuanga mipuihai kha an hong tungin chu, “Nera nâipa Abnera rêng kuang a honga, ama khan a len fetir nôk tâka,” ti Joaba kha an hrila.

²⁴ Khanchu Joaba kha rêng kuang a fe thala, “Ni thil lei tho hi itina mo a ini? Abnera kha ni kuang a honga, itho mo khaanga ni lei itîrpai nôk?

²⁵ Ama khan nang huang hrang le ni fena, ni hongna le ni thiltho murdi inhre hranga hong kêng a ini,” a tia.

²⁶ Davida kuang ata a hong suakin chu Joaba khan Abnera irzûl hrangin mi a tîra, Sira tuisunsuaka irthokin an hong hruaipai nôka, nikhomsianlân Davida khan kha thu kha ite inhre maka.

²⁷ Abnera kha Hebron a hong tungin chu Joaba khan kul kotbâia inrûkin chongpui zâi hrangin a koia khanchu Joaba khan a sangpa Asahela thisen suak thuanna hrangin Abnera kha a phînga a sun that tâka.

²⁸ Inhnung Davida’n an hriat tena chu, Davida khan, “Nera nâipa Abnera thisen suak thua hin keima le ki ram chu Rengpa mithmua irthiang kumkhua kin ti.

²⁹ Kuttum kha Joaba le a insûngkuahai murdi chunga chum ri se. A irlo rikipa Joaba insûngkuahai laia khan pân saloiin mani, inphârin mani, nupang sin vai tho theiin mani, khandaia thi mani, fâk irsamin om ri sehai,” a tia.

³⁰ Khaang khan Joaba le a sangpa Abisaia khan an sangpa Asahela kha Gibeona irdoina khan a that sikin Abnera kha an ithat tâk a ni.

Abnera an phûm

³¹ Kha hnung chu Davida khan Joaba le a kuanga mipui om murdihai kuang khan, “Nin puanhai inpotthêr unglân, bora puan sil unglân, Abnera kha sûn roi,” ti thu a pêka. Reng Davida khan irlâng kha a chela.

³² Abnera kha Hebrona khan an phûma, rêng kha Abnera thâna khan a chap ngûk ngûka; mipui om murdi khom an chapa.

³³ Davida khan Abnera kha a châ sabaka, “Itina mo Abnera hi into thi angin te a ithi tâk hi o?

³⁴ Ni kut kha khitindet ni ual maka, Ni ke khom thîrhrui bun ni ual maka, Mi sualhai makunga mi an inrîl angin te nin rîla?,” a tia. Khanchu mi murdiin an châ nôk tâka.

³⁵ Sûn sôtin mi murdihai khan Davida kha fâk inzongtir hrangin an inthêma; khannisianlân Davida khan, “Misa a tâk mâka chu bu mani, thil dang mani ite ki irtem a omin chu, Pathianin a ilo loin ni lo ri se, hi nêka irkhêl ual khomin,” tiin chong an kunga.

³⁶ Ama kha mi murdi’n an inhriatin an lôm oka, rêng thiltho murdi khan mipuihai kha an lômtirhai maia.

³⁷ Davida mi murdihai le Israelhaiin Nera nâipa Abnera thata om kha rêng thu suak ni mah ti an hon hriat suaka.

³⁸ Reng khan a mi lianhai kuang, “A vuan hin Israel mi lian le roiinpui a ithi a ni, iti nin inhriat loi ma ni?

³⁹ Reng hranga Pathian sahriak irthutir ni khomin lân, a vuan hin ki irzal zap a ni. Hi mi Zeruii nâipa hai hi ki ta hrangin an ivîk hrai a ni. Rengpa’n thil saloi thotuhai kha an sual lam ang takin thuanhai ri se,” a tia.