2 SAMUELA 23 - PATHIAN LEKHABU IRTHIANG C.L. Bible (BSI)

Davida thuhril hnungkhôn tak

¹ Jesaia nâipa Davida chu Pathianin mi roiinpuiin a siama, Jakoba Pathianin rêng hrangin an thanga, Israelhai hranga hla satak phuatu a ni. Hihai hi Davida thuhril hnungkhôn tak a ni.

² Rengpa irtha khan keima hmangin an sîra, A thu kha ki mileia hin a oma.

³ Israelhai Pathian khan an sîra, Israelhai saninzôktu khan ki kuang, “Rêng, mi chunga fel taka roirêl ngai, Pathian chi puma roirêl ngai kha.

⁴ Misa a hong suaka, sûm om viat loi kha, zîng irlen ving ang hi a nia, Rua tho zoia hloisûl inhartir ang hi ni a ti,” a tia.

⁵ “Khaang khan Rengpa’n ki’rchihai hi sat a ivur hrang a ni, kumtuanga thuthung kha keima kuang a tung tâk sikin, thuthung inkhiak thei loi. A ni, chonginkung danglam thei loi ngêt kha, ama kha ki saninhringna irkip le ki lungdo irkip a nia. Rengpa’n intungtir ngêt a ti.

⁶ Khannisianlân mi siathai kha chu an rêngin a pai irhmangtir ngaia, ilhling ang an ni. Tûte’n kut korongin tôn thei no ni.

⁷ A tôntu hrang khan thîr hriamhrei le ufei ngul a ihmang ngêt hrang a ni; khanchu an hmuna hâlirvôm ving ni an ti,” tiin a hrila.

Davida sipai irhminginthanghai

⁸ Hihai hi Davida sipai hâitakhai irhming chu a ni, a maton taka chu Takemon mi Joseb-basebetha, sipai hâitak inthumhai laia hruaitu a nia, ama hin voikhat irdoina khan mi irzariat ufei leh a idoi a ni, an rêngin a thathai ving a ni.

⁹ Inhnina chu Aho panama mi Dodoa nâipa Eleazara a nia. Sûn khat chu ama le Davida khan Filistia mihai irdoi hranga irbûm kha irsual an va ota. Israel mihai hnung an irtôl vinga.

¹⁰ Khannisian ama chu a om chiana, Filistia mihai kha a kut a khama khandai khom intha thei loi rakin a thata. Kha ni khan Rengpa’n inhnêna roiinpui tak an tungtir pea. Kha irzoiin chu Israel mihai kha Eleazara omna an hong kîr nôka, mithihai hriamhrei kha an hong ilâkpai a ni.

¹¹ Inthumna pu chu Horar mi Agea nâipa Sama a nia. Dâl kung omna hmuna Lehi-ah khan Filistia mihai kha an irbûma, Filistia mihai laia irthokin Israel mipuihai kha laizâm an thoa.

¹² Khannisian Sama chu kha hmuna khan a om chiana, a hrung maia, Filistia mihai kha a thata. Rengpa’n inhnêna roiinpui tak, kha nî khan an tungtir pe a ni.

¹³ Sipai hâitak sômthumhai laia pasal thumhai kha bu ât irphut lai takin Davida omna Adulam rôla khan an fea; Filistia sipaihai khan Refaim phâia omhmun an khuara.

¹⁴ Kha zoroa khan Davida chu tânga irhuana a oma, khan Filistia sipaihai pâl khan Bethelehem-a an oma.

¹⁵ Davida khan a khuaa tui kha a sân a’rzuka, “Bethlehem-a tuisunsuak tui, kul kotbâi kôla khan mi tu’n mani ni va chôi pe sianlân chu o!,” a tia.

¹⁶ Khanchu sipai hâitak pasal thumhai khan Filistia sipaihai kha an palthûkhaia, Bethlehem kul kotbâi kôla tuisunsuak tui ngêt kha an thâla, Davida kuang an hong chôia. Khannisian Davida’n lei in nuam maka, Rengpa kuang thilinhlanin a bun thuana.

¹⁷ “O Rengpa hi hi in viat no ning, thi ngama fehai thisen in ang ki ini hrang a ni,” a tia. Khanchu in nuam loiin, khahai thil kha sipai inthang hâitak inthumhai khan an itho a ni.

¹⁸ Zeruii nâipa Joaba sangpa Abisaia kha sipai inthang hâitak sômthumhai laia hruaitu tak a nia, a ufei leh mi irzathum a doihaia, a thata, mi hâitak sômthumhai laia khan an lârtak a ni tâka.

¹⁹ Sômthumhai laia khan an lârtak a ni tâk sikin an hruaitu tak a ni tâka. Khannisian mi hâitakhai pasal thumhai laia chang pha maka.

²⁰ Kabzeel mi Jehoiada nâipa Benaia kha sipai hâitak inkhat chu a ni saa. Ama khan thil ichiom tamtak chu a thoa, Moab mihai râlpa inthang inhni a ithathai a ni. Voikhat chu ivur tâk zoro lai takin khurpuia a fea, kâmkeibaknei a zu thata.

²¹ Ama hin Aigupta mi roiinpui tak a thata, Aigupta mi khan ufei a chôia, nikhomsian Benaia khan hêmvuak chôiin a va pana, Aigupta mi ufei chôi kha a sutpaia, ama ufei leh khan a sun thatpai a ni.

²² Jehoiada nâipa Benaia thilthohai kha khaang kha a ni, sômthumhai laia khan irhming sa a ihlo a ni.

²³ Mi sômthumhai laia khan mi inlârtak a nia, khannisian râlpa hâitak pasal thumhai dôr chu ar hming lan thang ma. Ama kha Davida khan ama hrungtuhai laia hruaituin a sia tâka.

²⁴ Joaba nâi Asahela kha mi huaisen sômthum laia mi a nia. Bethlehem khuaa mi Dodoa nâipa Elhanana hai,

²⁵ Harod mi Sama hai, Harod mi Elika hai,

²⁶ Pelet mi Heleza hai, Tekoa mi Ikesa nâipa Ira hai,

²⁷ Anathot mi Abiezera hai, Husa mi Mebunaia hai,

²⁸ Aho mi Zalmona hai, Netofa mi Maharaia hai,

²⁹ Netofa mi Baana nâipa Heleba hai, Benjamina irchi Gibea kho mi Ribaia nâipa Itaia hai,

³⁰ Pirathon mi Benaia hai, Gaas vadungtea mi Hidaia hai,

³¹ Arabat mi Abi-Albon-a hai, Bahurim mi Azmaveta hai,

³² Saalbon mi Eliaba hai, Jasena nâipahai laia mi Jonathana hai,

³³ Harar mi Sama hai, Harar mi dên Sarara nâipa Ahiama hai,

³⁴ Maaka mi Ahasbaia nâipa Elifeleta hai, Gilo mi Ahitofela nâipa Eliama,

³⁵ Karmel mi Hezroa hai, Arba mi Paaraia hai,

³⁶ Zoba mi Nathana nâipa Igala hai, Gad mi Bania hai,

³⁷ Amon mi Zeleka hai, Joaba râltukfam chôitu Beerot mi Naharaia hai,

³⁸ Jatir mi Ira le Gareba hai,

³⁹ Hit mi Uria hai an ni. An rêngin chu sômthum sari an ni.