2 SAMUELA 20 - PATHIAN LEKHABU IRTHIANG C.L. Bible (BSI)

Seba tehel thu

¹ Gilgal-a khan Benjamina rama mi Bikria nâipa Seba; mi nunsia inkhat hi a lei oma. Ama khan bekul a tuma, “Davida kuang hin ite dongtum nei mak me, zui ta no ih! O Israel mihai mâni in chita kîr ta ei ti,” a tia.

² Khanchu Israel mihaiin Davida zui ta loiin Seba hai leh an rot tâka; khannisian Juda mihai kha chu an det maia, Davida kha Jordan dunga irthokin Jerusalem dênin an zui tâka.

³ Davida khan Jerusalema a rêng in kha a tungin chu, a lâksîr sômkhat, in a innghâktirhai kha a hruaihaia, a khumpaihaia, an innang murdi a lâk pehaia. Khannisian anni kha chu zâlpuihai ta ma. Khaang khan an thi ni dênin ikhumin meithâiin an om tâka.

⁴ Reng khan Amasa kuang, “Sûn thum sûngin Juda mihai koi bûmin lân, nangtûk pên annihai leh hin hong roi,” a tia.

⁵ Amasa kha Juda mihai koi bûm hrangin a fe tâka; khannisian a sûn khit pe nêkin a va sôta.

⁶ Khanchu rêng khan Abisaia kuang, “Seba hin Absaloma nêkin a ni inbuai ual hrang kêng. Ki mihai hi hruaiin lân, irzûl roi, khano’nchu khua kulpui neia lût irman a ta, ei kut ata a izôkna hrang kêng,” a tia.

⁷ Khanchu Joaba pâl, rêng hrungtu pâlhai le sipai dang murdihai khan Abisaia an zuia, Jerusalema irthokin Seba irzûl hrangin an suak tâka.

⁸ Gibeona lungpui an va tungin chu, Amasa khan a lei sâma. Joaba kha irdoina râltukfamin a’rvoa. Khandai kha a kok pumin a kongkhita a vonga, a fe pumin a khandai kha an thâka.

⁹ Joaba khan Amasa kuang, “Ki rualpa ni idam chu a ni mo?,” a tia. Joaba khan Amasa tum hrangin a hnermul kha a chang tiang an tûka.

¹⁰ Amasa khan Joaba’n khandai kut hi tianga a ichôi kha uksak ta maka, khanchu Joaba khan a phînga an vita, a rîlhai kha a che duar tâka. Voikhat zelin a thi tâka. Joaba khan sun nôk ual ta maka. Kha hnung chu Joaba le a sangpa Abisaia khan Seba kha an irzûl thala.

¹¹ Joaba pâlhai laia ruatharte inkhatin, kha Amasa ruak kôla a ngîra, “Joaba le Davida tianga kop murdi khan Joaba zui mai ri se,” a tia.

¹² Amasa ruak, thisen irsil zit kha lampui inlaina taka khan a lei intâl raka. Joaba mi khan Amasa ruak kôla mi, en ngîr rumhai a va hmu’n chu, Amasa ruak kha lamlian ata ram tiang a kaia, puan leh a’rkhu tâka.

¹³ Lampui ata a ruak kha khâipai a ni tena chu, Seba irzûl hrangin mi murdi’n Joaba kha an zui tâka.

¹⁴ Seba khan Israel namhai murdi ram kha hroin Abela Beth Maaka khopuia a tunga; Bikria panama mihai murdi an irbûma. Khopuia khan an zui tâka.

¹⁵ Joaba mihai khan Seba kha Abela Beth Maaka khopuia a om ti an inhriatin chu khopui kha an irhual khak tâka. Kulpui pên tiang irdîna khan irnêng an inpônga. Inchimtir hrangin kulpui bul kha an choi suaka.

¹⁶ Khopuia khan nupang vâr inkhat a oma, kulpui ata a zuang khêka, “Lei irngai roi, lei irngai roi! Joaba kha hin hong hrangin hril roi, ki ichongpui nuam a ni,” a tia.

¹⁷ Joaba kha a fea, a va nâia; nupangnu khan, “Joaba mo ni ni?,” a tia. Ama khan, “O ki ni,” a tia. Khanchu nupangnu khan, “Ka pu ki thu’nsîr hi ni lei irngai pe ro,” a tia. Joaba khan, “Tho ki’rngai,” a tia.

¹⁸ Nupangnu khan, “Tianlai khan chu, Abela khuaa khan fe’n lân, sâmna chu hmu ni ti, an ti ngaia; khaang khan thu an itan ngai a ni.

¹⁹ Hi kin khua hi Israel khua laia chu irngei nuam le kho iamom pâla mi kin ni. Nangma’n chu Israel khuaa kulpui hi itho mo irhmangtir ni itum hi? Rengpa irchon hi itho mo irhmangtir ni itum?,” a tia.

²⁰ Joaba khan, “Khaang khan ni no ni, nangni insiatchit mani, nangni irhmangtir mani ite tum ma ung.

²¹ Kha kha kin thiltum ni ma. Efraima tâng rama mi Bikria nâipa ar hming Seba khan rêng Davida chunga tehelzongin a kut an leka; ama kha ni pe unglân, khuaa irthokin kîr nôk zel ki ti,” a tia. Nupangnu khan Joaba kuang, “A lu kha kulpui chunga irthokin nangni zuan tha pe kin ti,” a tia.

²² Kha hnung chu nupangnu vârna hmangin khopuia mipuihai laia khan a fea. Bikria nâipa Seba lu kha an tanpaia, Joaba kuang tiang khan an paisuak tâka. Joaba khan a mihai khopui an mâkna hrangin bekul a tuma, khanchu an mâni in chita an lût tâka. Joaba chu Jerusalema rêng kuang khan a kîr nôk tâka.

Davida hnuaia hruaituhai

²³ Joaba kha Israel sipai murdi hruaitu a nia, Jehoiada nâipa Benaia kha rêng hrungtuhai hruaitu a nia.

²⁴ Adonirama kha sintho hranga nakhrâta an ihruaihai hruaitu a nia; Ahituba nâipa Jehosafata kha thurchi irziaktu a nia.

²⁵ Seva kha irziaktu a nia, Zadoka le Abiathara hai chu deipu an nia,

²⁶ Jair kho mi Ira khom kha Davida ochai inkhat a ni sa.