2 SAMUELA 16 - PATHIAN LEKHABU IRTHIANG C.L. Bible (BSI)

Davida le Ziba

¹ Davida khan tâng sîp a lui zoiin chu Mefiboseta zuitu Ziba khan a lei sâma, sakuartung inhni irfûkin, bai hlûm irzahni grep rachâr irku irzahni, fûr thei irzahni le uain bûr khat a hong chôia.

² Reng Davida khan, Ziba kuang khan, “Khahai kha imo ni ilo hrang?,” a tia. Ziba khan, “Sakuartunghai hi rêng in sûng mihai chuangna hrang a nia, bai le theihai hi ruathartehai fâk hrang a ni, uain hi chu ramchâra a sôl murdihai in hrang a ni,” a tia.

³ Reng khan, “Khante Saula tupa Mefiboseta teh kho tiang mo a iom?,” a tia. Ziba khan, “Jerusalema a om, a vuan hin Israelhaiin ka pu ram an ni ipêk nôk hrang a ni, a ti khate,” a tia.

⁴ Reng khan Ziba kuang khan, “Mefiboseta thil nei murdihai hi chu ni ta inzen a ni,” a tia. Ziba khan, “Chubai nang ki imûk ta tak a ni; o rêngpa, ka pu, ni mit intungtir mai tum ki ti,” a tia.

Davida le Simeia

⁵ Reng Davida kha Behurim a tungin chu, Saula urênghai laia mi Gera nâipa Simeia a lei hong suaka, a hong balamin khomâk a hong sâm thiaia.

⁶ Simeia khan Davida le a mi lianhai kha lung leh a dênga, a mipuihai leh a sipaihai murdihai khan Davida kha vei le chang tianga irhual pumin.

⁷ Simeia hin khomâk a sâma, hiang hin a tia, “Fe irhmang ta ro, fâk irhmang ta ro, nangma thisen insuak ngai, mihriam sa loipa.

⁸ Saula rêng ram kha ni lâkpai pea, atûn hin Saula in sûng mihai thisen kha Rengpa’n ni chunga a insum a ni ta. Rengpa khan ram kha ni nâipa Absaloma a ipêk a ni ta. Thisen insua ngai mi ni ni sikin ni bingin siatna ni chunga ni intungtir tâk a ni,” a tia.

⁹ Zeruii nâipa Abisaia khan rêng kuang, “I lo hrang mo hi mi hin rêngpa ka pu hi khomâk a isâm? Fe ki ta, a lu la va tanpai pe rong dua,” a tia.

¹⁰ Reng khan, Abisaia le a urêngpa Joaba kuang khan, “Nangni’n nin ni inhriatpui hrang ni ma. Rengpa’n ama kha khomâksâm roh a iti pe kêng, khasikin khomâk a ni isâm a ni’n te tu ngân mo a ini? I lo hranga mo hianga a itho? Tu ngân mo a ti thei hranga,” a tia.

¹¹ Davida khan Abisaia le a mi lianhai murdi kuang khan, “Irngai ta roi, ki nâipa, ki rîla ra ngêtin, ni that a itum a ni; khasikin hi Benjamina len vâng hin chu a itum irkhêl ual hrang a ni. Khasikin ite lôhai no roi, khomâk kha ni sâm ri sehai; Rengpa’n khomâk a ni isâm a ni.

¹² Rengpa’n ki dengtheizia hi zuang hmu a ta, Rengpa’n a vuana khomâk a ni isâm hi a sa lam pangin a ni thuan duai khom a ni thei,” a tia.

¹³ Khanchu Davida le a mi lianhai kha lampuia an fe maia. Simeia khan a phâkhaia, tâng panga khan a luia, a fe pumin khomâk a sâm thiaia, lung leh a dêng maia, pildihai leh a dênga.

¹⁴ Reng le a kuanga om murdihai khan sôltakin Jordan an tunga, khatak khan an sôl an irngamtir tâk a ni.

Absaloma’n Jerusalem khua a lût

¹⁵ Absaloma le a kuanga Israel mi om murdihai khan Jerusalem an hong lûta, an laia khan Ahithofela khom a oma.

¹⁶ Ark mi Husaia, Davida rualpa khan Absaloma kuang a tungin chu, a pâia, “Reng chu dam sôt ri se, rêngpa chu dam sôt ri se,” a tia.

¹⁷ Absaloma khan Husaia kuang, “Hiang hin kêng a ini na, ni rualpa lung ni inkham dân chu? Itho mo ni rualpa kuanga ni ife loi?,” a tia.

¹⁸ Husaia khan Absaloma kuang, “Itin mo ki ife hrang? Rengpa le hi mipuihai le Israel mi murdi’n an inthangpu tianga kop ki ni. Ni kuanga om hrang ki ni.

¹⁹ Tu sin mo ki itho hrang? a nâipa sin ki itho hrang mo ni ma? Ni pa sin ki itho ngai ang khan, ni sin ki itho hrang a ni,” a tia.

²⁰ Khanchu Absaloma khan Ahithofela kuang, “Itin mo ei itho ta hrang, nir ngaidân insîr ro,” a tia.

²¹ Ahithofela khan Absaloma kuang, “Ni pa’n lâksîrnu in nghâka a isia kha zâlpuiin lân; khanchu Israel mi murdi’n ni pa inuam loi sin ni tho ti len hria an ta, khanchu nangma tianga kophai kha inthor inhrât ok a ti,” a tia.

²² Khanchu rêng in chunga khan Absaloma ta hrang puan in an sunga, Israel mihai murdi mithmua Absaloma kha a pa lâksîrnu zâlpui hrangin a lût tâka.

²³ Kha laia khan chu Ahithofela roizêkhai chu Pathian thu ang dôrin an ibe ngai a ni; Davida le Absaloma khan an izôm ngai a ni.