2 SAMUELA 15 - PATHIAN LEKHABU IRTHIANG C.L. Bible (BSI)

Absaloma’n pualoi sin tho a tum

¹ Kha zoiin chu Absaloma khan tâli le sakorhai le mi sômringa a matona fe hrangin a’rsiamtirhaia.

² Absaloma kha zîng taka thoiin a fea, kul kotbâi lampuia khan a lei ngîra, rêng kuanga an thubuai hong intung hranga honghai kha Absaloma’n a lei koihaia, “Tu kho mi mo nin ini?,” tiin a lei irdonhaia, khante mihai khan tu nama mi mo an inih ti an hril zoiin chu,

³ Absaloma khan, “Nin sûnga nin thu kha a dikin a isa a ni; khannisian a lei irngaitu rêng khan tûte phun ual ma,” a lei ti pehaia.

⁴ Absaloma khan, “Mi tin thubuai neihai mani, zong hrang neihai mani chu keima kuang an hong theina hrangin keima hi, hi rama roirêltu’n ni siam sianlân, ki inuam a ni. Khanchu fel takin rêl pehai ki ta, a lei ti pehai sa ngaia.

⁵ Kha bana tukhom ama chubai mûk hranga honghai kha a lei chelhaia, an kuahaia, a tum tumin chubai a lei thohai ngai.

⁶ Khaang khan Israel mi, rêng kuanga an thu intung hranga honghai kha Absaloma khan a lei ilômhai ngai a ni, khanchu an lungrîl kha a len hôp inhnê pehai tâka.

⁷ Kum minli ar zoi tena chu Absaloma khan rêng Davida kuang, “RENGPA kuanga ki chonginkung thangsua hrangin Hebron khuaa ni tîr ro.

⁸ Suria rama Gesur-a ki om laia khan, Rengpa’n Jerusalema a ni hruai nôkin chu Hebron khuaa Rengpa chubai mûk ki ti,” tiin Rengpa kuang chong ki lei inkung tâk a ni, a tia.

⁹ Reng khan a kuang, “Irtharngam takin fe ro,” a tia. Khanchu Absaloma kha Hebron khuaa a fe tâka.

¹⁰ Khannisian, Absaloma’n nam tin laia palai a tîrhaia, “Bekul irhâi nin inhriat tena chu Absaloma chu Hebrona khan rêng a chang ta ti roi,” tiin an hriltirhaia.

¹¹ Absaloma kuang khan a mi fial, irzahnihai Jerusalema irthokin an fea, lungrîl satak irputin an fea.

¹² Absaloma khan irbôlnahai kha an hlan laiin, Gilo khuaa mi Ahithofela, Davida roizêkpui ngai mi inkhat kha, kha khua Gilo ata kha a koia, rêng chunga an thuphan inrûk kha a’rkhêl hraia; Absaloma tiang khan mipuihai kha an pung tîr tîr tâka.

Jerusalema irthokin Davida a rot

¹³ Davida kuang khan, “Israel mihai lungrîl kha Absaloma tiang a fe ok tâk,” tiin mi inkhatin a hong hrila.

¹⁴ Khanchu Davida khan Jerusalema ama kuanga omhai mi lianhai murdi kuang khan, “Absaloma kut ata zôk ei nuamin chu laizâm ei itho zel hrang tâk a ni. khano’nchu hin a ni hong ide zel hrang a nia, ei chunga thil saloi a hong itho hrang a nia, khopuia mihai hi a hong ithat hrang a ni,” a tia.

¹⁵ Reng mihai khan rêng kuang, “A ni, ka pu, nang a zuituhai hin kin pu iti murdi tho hrangin kin irsiam diam a ni,” an tia.

¹⁶ Khanchu rêng kha a suaka, a in sûng mi murdi le a mihai khan an zuia. Rengin a in nghâk hrangin lâksîr sômkhathai vai kha a mâka.

¹⁷ Reng le a mihai murdiin khopui ata an suak lai khan, inhnungkhôn taka an la’rngam chota.

¹⁸ A mi lianhai kha a makunga an ngîra, rêng hrungtu sipai kha a maton tiang a hong thenga. Sipai irzaruk Gath-a irthokin ama hong zuituhai khom kha an hong tunga,

¹⁹ rêng khan an hruaitu Git mi Itaia kuanga khan, “Itina mo nangma khom hi kin laia ni ihong sa mo? kîr nôkin lân, rêng thar kuang khan om ro. ram dang mi ni nia, ni ram rengata hong irthon ni nia.

²⁰ Mizâna la hong chak ni nia, a vuan hin kin laia a suk a tunga ni zui hrangin nang ki iti hrang ni mak che? Ki fena hrang lua ki la inhriat loi a ni, nang chu kîr nôkin lân, ni urênghai kha hruai kîrhai ro. Pathian lungkhamna le thutak ni kuang om ri se,” a tia.

²¹ Khannisianlân, Itaia khan rêng kuang khan, “Rengpa hringna le rêng, ka pu hringna irhming sâmin ki ti, thi le thi, dam le dam, ni fena hmun tina ki ife sa hrang a ni,” a tia.

²² Davida khan Itaia kuang, “A sa fe sa mai ta ro,” a tia. Khanchu Git mi Itaia kha a mihai murdi le, a nâitehai leh khan an fe tâka.

²³ Davida le a mihai kha an fe tâka, mipuihai khan, a ram châ pumin an irzuka. Reng khan Kidron vadung a’rkâna, a mihaiin an zuia, an rêngin ramchâr panin an fe tâk.

²⁴ Ochai Zadoka kha Pathian Thuthung Bôm irzônin Levihai murdi leh a kuang an fe sa tâka. Pathian Thuthung Bôm kha an insuma, mipuihaiin kho sûng kha an mâk irkip zoi mâka chu a oma. Ochai Abiathara khom kha kha khan a om saa.

²⁵ Kha hnung chu rêng khan Zadoka kuang, “Pathian Thuthung Bôm kha khopui sûnga irzôn kîr nôk roi, Rengpa mit tunga ki omin chu itik ni mani chu ni hruai kîr nôk a ta, Pathian Thuthung Bôm le a omna kha ni’rhmu nôk a ti.

²⁶ Khannisian ki chunga lômna zel a nei noa ni’n chu hiang hi ki nia, a sa a iti lam takin ki chunga hin tho ri se,” a tia.

²⁷ Reng khan ochai Zadoka kuang, “En ro, hi nâipa Ahimaaza le Abiathara nâipa Jonathana hi hruaihaiin lân, lungngam takin khopuia kîr nôk roi.

²⁸ Keima chu nin ni hong hril nôk mâka chu ramchâra ivadung omna hin ki lei iom mai hrang a ni,” a tia.

²⁹ Khanchu Zadoka le Abiathara khan Pathian Thuthung Bôm kha Jerusalema an fepui nôka, khatak khan an om ta.

³⁰ Davida chu chap pumin oliv tâng kha a luia, a beidong inlangtirna hrangin a lu a’rkhûa, ke leh ngot a fea. A kôla mihai khan an lu an khum chita, chap pumin an lui sa tâka.

³¹ Mi tu’n mani, Davida kha, Ahithofela kha Absaloma tianga kopin a thupêktuhai laia a kop sah ti an hrila. Davida khan, “O Rengpa Ahithofela roizêk kha chanlamboi inchangtir pe ro,” tiin a chongchaia.

³² Davida kha Pathian biakna tâng sîp a hong tungin chu, a rual satak Ark mi Husaia kha a silkaihai inpotthêr kha innghâkin, a lua vâiphin sip khakin ama don hrangin a lei honga.

³³ Davida khan a kuang, “Keima kuang ni hong sa’n chu ite ni san thei no chi ni.

³⁴ Khannisian khopui tiang khan kîr nôkin lân, Absaloma kuang, o rêngpa ni sinthotu inkhatin om ki ta, matona ni pa sinthotua ki iom ang khan atûn khom hin ni sin thoin om ki ti, ni va ti’n chu ni san thei ni ti. Khanchu, Ahithofela roizêk kha ni thei dôrin sêl inkal pe’n lân.

³⁵ Ochai Zadoka le Abiathara khom kha an iom sa a ni; rêng ina thu suak ni inhriat dôr chu ochai Zadoka le Abiathara inhril ngai ni ta.

³⁶ An nâipasalhai ruai Zadoka nâipa Ahimaaza le Abiathara nâipa Jonathana khom an laia om an ni. Ni thil inhriat murdihai kha ni hong hril hrangin annihai kha ni hong itîrhai hrang a ni,” a tia.

³⁷ Khanchu Davida rualpa Husaia kha Jerusalem khopuia khan Absaloma a hong tung le khan a lût tâka.