2 SAMUELA 14 - PATHIAN LEKHABU IRTHIANG C.L. Bible (BSI)

Absaloma hong kîr nôkna hranga Joaba insâp

¹ Joaba khan rêng Davida lungrîl kha Absaloma chunga a om pe mai ti an hriata.

² Khanchu Joaba khan Tekoa khuaa om nupang vârtak inkhat va hruai hrangin mi a tîra. Nupangnu kha a hong tungin chu Joaba khan a kuang, “Lusûn angin irsiamin lân, lusûn puan silin lân, sahriak khom irthu loiin nupang sôttaka mithi chûl angin om roh.

³ Kha hnung chu rêng kuang fe’n lân, ki he nang bê lam ang tak hin va ti ro duah,” a tia. Khanchu Joaba khan a ti hrang kha an hril tâka.

⁴ Nupangnu kha rêng kuang a fea, a makunga irnêng sikin an boka, chubai a mûka, rêng kuang khan, “O rêngpa, ni san ro,” a tia.

⁵ Reng khan a kuang, “Imo a ini tâk?,” a tia. Nupangnu khan, “Meithâi ki nia, ki pasal a thi tâka.

⁶ Ka pu, nâipasal hni ki neia, sûn khat chu loia an ruaiin an irsuala, tûte a sel hrang lak om mahaia, inkhat khan a thatpai tâka.

⁷ Atûn hin ki urênghaiin an ni hmumâka, a’rzirpuipa thattu kha, a urêngpa a that sikin an that theina hrang zongin ki nâipa kha an kuta bâng hrangin an ni tia. Khaang khan an that nôkin chu nâipasal boiin om ki ta, ki sabeina la omsun lua kha a ihek hlet hrang a ni. Ki pasal kha irhming nei loi le irnêng chunga irchi nei ta loiin a iom hrang a ni ta,” a tia.

⁸ Reng khan nupangnu kuang, “Ni ina fe nôk tan lân, ni chungchâng chu la ngaitua rong,” a tia.

⁹ Nupangnu khan rêng kuang, “O rêngpa, ka pu i khom tho’n lân, a mophurna chu keima leh ki in mihaiin la pêl ro ung; rêng le rêng insûngkua khan mophur no ri sehai,” a tia.

¹⁰ Reng khan, “Mi tukhomin nang an insîin chu, ki kuang hong hruaiin lân, nangni inbuai ta no nihai,” a tia.

¹¹ Nupangnu khan, “O rêngpa, ki nâipa thina chungchânga thisen phuba lâk hrang chu ki takmitihai hin ki nâi la omsun, thatpai nôkna hrangin irkhêl tak an tho ta loina hrangin Rengpa ni Pathian kuang chongchai mai ro duah,” a tia.

¹² Nupangnu khan, “Irngaihoi takin, o rêngpa ni kuang thu bâikhat ngot la ti nôk ki ti duah,” a tia. Ama khan, “Ti roh,” a tia.

¹³ Nupangnu khan, “Itho hranga mo Pathian mihai chunga hianga dik loi ni itho mo? Ni nâipa lele kha a laizâm thôna hmun ata hong kîr nôk hrangin phal pe mak chea. Khasikin atûna ni thu tihaia irthokin nangma le nangma thei loi ni ichang a ni.

¹⁴ Ei rêngin ei la ithi ngêt hrang a ni; eini chu tui irnênga irpai tâk ei ihrût thei ta loi ang hi ei nia; Pathian lua khomin mi thi tâk chu hringna pe ual ta ngai ma, khannisian rêng khan a rot tâk mi kha hong hruai kîr nôk hrang dân lampui a izong thei a ni.

¹⁵ Atûn hin rêngpa hi thu insîr hranga ki ihong khom hi mi’n an ni khâl luan ni lei intungtir pe a tih ti ki sabei.

¹⁶ Reng khan keima le ki nâipa hi Pathianin a mihai a ipêk ram lua loi hranga irhmangtir tumtu ata ni saninzôk hrangin ni lei irngaitua pe ni ti, ki tia.

¹⁷ Hiang hin nang a zuinu ta hrangin ka pu, ni thu kha irtharngam om tak a ni; a sia le sa theithâk hrangin rêng chu Pathian vântirtôn ang an nih ti ki iti a ni. Rengpa ni Pathian chu ni kuang om ri se,” a tia.

¹⁸ Reng khan, nupangnu kuang, “Thu inkhat nang irdon ki ta, ite ip viat loiin thudik ni insîr hrang a ni duah,” a tia. Nupangnu khan, “Rengpa ka pu, nir don roh,” a tia.

¹⁹ Reng khan, “Hi thu rêng rênga hin Joaba hin kopna mo a nei?,” a tia. Nupangnu khan, “Rengpa, ka pu nir hmingin ki iti a ni, ni chong irdon kha tûte’n vei tiang mani, chang tiang mani, pial thei no ni. Ni sipai hruaitu Joaba khan a ni tîra, ki tho hrang le ki iti hrang murdi he a ni ibe ving a ni.

²⁰ Khannisianlân hi chungchâng thuhai hi siam intûn nôk hrangin Joaba khan a itho a ni. Rengpa ka pu chu, Pathian vântirtôn ang dôra vâr a nia, rammuala thil tung murdi hi an hriat ving,” a tia.

²¹ Inhnunga chu rêng khan Joaba kuang, “Irngai ro, ni inuam lam taka tho hrangin ki inuam a ni. Fe’n lân, ruatharte Absaloma kha va zongin lân, hin hong hruai nôk ta ro,” a tia.

²² Joaba kha a hmâi irnêng sikin Davida makunga khan an boka, chubai a mûka, a kuang, “O rêngpa, Pathianin sat nang vur ri se. Ki ingênna kha hlo a nin chuktir pe sikin. A vuan hin ni mit ki tung ti kin hriat ta,” a tia.

²³ Kha hnung chu Joaba kha a thoia, Gesur-a khan a fea, Absaloma kha Jerusalema a hruaia.

²⁴ Khannisian rêng khan Absaloma kha rêng ina om loi hrangin thu a pêka, “Ama in tiang fe sianlân, ki hmêl la hong hmu no ri se,” a tia. Khanchu Absaloma kha ama in tiang khan a om tâka, rêng hmêl kha la va hmu maka.

Absaloma le Davida an irngei nôkna

²⁵ Israel murdi laia Absaloma ang dôra hmêl sa le inpâk inruk tûte om mahaia. A kemitin ata a lusîp dênin demna zel a iom loi a ni.

²⁶ A sam khom a tama, a sei pe’n chu a rik hrai ngai sikin, a kum tin voikhat chu a iep ngai a ni. A sam ep kha an var ngaia, rêng varna ngai khan her hni nêka rik a ni ngai.

²⁷ Absaloma khan nâipasal thum le nâinu inkhat a neia, ar hming chu Tamari a nia, hmêl satak a ni.

²⁸ Absaloma kha kum hni Jerusalema a oma, khannisian rêng hmêl kha hmu viat maka.

²⁹ Kha hnung chu Absaloma khan rêng kuanga tîr hrangin Joaba kha chong an thuana, khannisian Joaba kha hong nuam maka. Absaloma khan chong an thuan nôka, Joaba kha nuam pe nôk maka.

³⁰ Khanchu Absaloma khan a zuituhai kuang, “Tho Joaba loi chu ki loi kôla om a nia, barli a neia, fe unglân va hâl roi,” a tia. Khanchu an fea loi kha an va hâlpai tâka.

³¹ Kha hnung chu Joaba kha Absaloma ina a fea, a kuang, “Itho sika mo nang a zuituhai khan ki loi an ihâl?,” a tia.

³² Absaloma khan Joaba kuang, “Irngai ro, i lo hranga mo Gesur ata hi ki ihong? Gesur-a khan om mai inlân, ki ta hrangin a isa ual hrang ti hrangin rêng kuanga fe hrangin nang ki tia, ni ihong nuam loi. Khasikin rêng hmêl ki hmu theina hrangin zoro nir fûktir pe hrangin nang ki inuam a ni. Siatna ki neiin chu ni thatpai zel ri se,” a tia.

³³ Khanchu Joaba kha rêng Davida kuang a fea, Absaloma thu hril murdi kha a hril tâka. Reng khan Absaloma kha a koia, rêng kuang a fea, rêng makunga khan irnêng sikin an boka. Reng khan Absaloma kha a lei tuma a lôm oka.