2 SAMUELA 12 - PATHIAN LEKHABU IRTHIANG C.L. Bible (BSI)

Nathana thu intung le Davida irletna

¹ Rengpa khan Davida kuang deipu a tîra, Nathana kha Davida kuang a fea, “Khua inkhata hin mi inhni an oma; inkhat kha mi irchong a nia, inkhat kha mi inriang a ni.

² Mi irchongpa khan kêlbelra tamtak le sâ tamtak a neia,

³ mi inriangpa khan kêlbelra a chînte inkhat vai ar chôka, a ivâi inkhat vai a neia. A insûnga a nâihai leh seilian an ni, a ifâk ang an fâktira, ama khilâta ngei an intir ngaia, a mal chunga pomin a moinu angin a ibe a ni.

⁴ Sûn khat chu mi irchongpa kuang khan khualinzin mi inkhat hi a va tunga; mikhual hong tung kha ama belra le kêl thatpui nuam loiin, mi inriang belrate kha a va sutpaia, a mikhualpa kha a ithatpui a ni,” a tia.

⁵ Davida kha mi irchongpa chunga khan a ning an mur pe tâka; Nathana kuang khan, “Rengpa irhming sâmin ki iti a ni, kha thil thotu kha chu that inruk a ni.

⁶ Khaanga thil kha a tho sikin le lungkhamna a nei no sikin, a kêlbelrate lak kha ama’n bâk minliin a ithuan hrang a ni,” a tia.

⁷ Khanchu Nathana khan Davida kuang, “Kha mi kha nangma hi ni ni,” Rengpa Israelhai Pathian khan hiang hin a iti a ni, “Israel rêng hrangin sahriak nang ki’rthutira, Saula kut ata nang ki saninzôka,

⁸ a rêng ram le dôngmahai nang ki pêka; Israelhai chunga le Judahai chunga rêngin nang ki siama. Khahai kha a la tôm hraiin chu thil danghai khom nang ki ipêk nôk hrang mo ni ma?

⁹ Itho mo ki thupêkhai zôm loia, hi thil saloi tak hi ni itho tâk? Hit mi Uria kha irdoina hmuna nin thattirhaia, Amon irchihai nin thattirhaia, khanchu a dôngma kha ni luapai pea.

¹⁰ Khasika khan khandai khan ni insûngkua kha masan viat no ni, nangma’n ki thu zôm loiin Hit mi Uria dôngma ni sutpaia.

¹¹ Irngai roh, nangma insûngkua laia irthokin ni chunga thil saloi insua ki ta, ni mithmu ngêta ni dôngmahai nang sut ki ta, ni kôla mihai pehai ki ti. Khanchu sûn khovâra ni dôngmahai zâlpuihai an ti.

¹² Nangma’n chu inrûkin sual ni sina, keima’n chu Israel mi murdi mithmua sûn khovâra, khahai kha nan tungtir pe hrang ki ni,” a tia.

¹³ Davida khan Nathana kuang, “Rengpa chunga thil ki tho insual tâk a ni,” a tia. Nathana’n, “Rengpa khomin nang an za ta, thi no chi ni.

¹⁴ Khannisianlân hi ni thil tho hin Rengpa irhming a insiat hrai sikin ni nâi kha chu a ithi ngêt hrang a ni,” a tia.

¹⁵ Kha hnung chu Nathana kha a ina a fe tâka. Uria dôngma’n Davida nâi a ineipui chunga khan Rengpa’n kut a thâka, dam loiin a na ok tâka.

Davida nâi thi thu

¹⁶ Davida’n nâite ta hranga khan Pathian kuang a chongchaia, bu a ngheia, a tentana a lûta, zânsôt irnênga a zâl raka.

¹⁷ A ina mi lianhai kha an hong lûta, irnêng ata kaithoi an tuma, khannisian thoi nuam maka, an laia khom bu khalâi ot nuam maka.

¹⁸ Sûn sari nî chu nâite kha a thi tâka. Davida mi lianhai khan nâipangte kha a thi tah ti hril kha an chia. Anni khan, “Nâite a dam laia an kuanga thu a insîr kha ei chong irngai nuam ngai maka, nâite kha a thi ta, itin mo ei insîr ngam ta hrang? thil saloi a tho itinin,” an tia.

¹⁹ Khannisian Davida khan an chonginrûk kha a hmuhaiin chu nâite kha a ithi tâk a nih ti an hriat tâka. Khanchu Davida khan an kuang, “Nâite kha a ithi ta mo?,” a tia. Anni khan, “O a thi ta,” an tia.

²⁰ Khanchu Davida kha irnêng ata a thoia, tui a’rsila, sahriak a’rthua, a silkai a thûla, khanchu Rengpa ina a fea, Pathian chubai a mûka. A ina a zuang kîr nôkin chu bu a zonga, a makunga an hong doa, a nêk tâka.

²¹ A mi lianhai khan a kuang, “Ni thil tho hi itina mo a ini? Nâite a la dam lai khan bu ni ngheia, ni chapa, khannisian nâite a thi leh chu ni thoia, bu ni inêk tâk hi,” an tia.

²² Davida khan, “Nâite dam lai khan bu ki ngheia, ki chap ngaia. Nâite a dam theina hrangin Rengpa’n lung a nin kham duaiin ki iti a ni.

²³ Khannisian atûn hin chu a thi tâka, itho mo bu ki la inghei mai hrang? Nâite kha ki la ikoikhîr thei hrang mo? Itik nî mani chu ama kuang keima hi ki la ife ngêt hrang a nia. Khannisianlân, ama chu keima kuang zuang kîr ta no ni,” a tia.

Solomona suakna

²⁴ Kha hnung chu Davida khan a dôngma Bethsebi kha lungngam a saka, a kuang a va lûta, a zâlpuia, nâipasal a neipuia. Davida’n a nâi irhming kha Solomona tiin a phua tâka. Nâipang kha Rengpa’n lung a thunga.

²⁵ Khanchu deipu Nathana kha a tîra, nâipang kha Rengpa lungthung a ni sikin, nâipang irhminga khan Jedidia ti hrangin thu a pêka.

Davida’n Raba a lâkna

²⁶ Kha laia khan, Joaba khan Amon irchihai khopui Raba kha a rûna, khopui kha a lâk tâka.

²⁷ Joaba khan Davida kuang mi a tîra, “Raba kha ki rûna, a tui fâk chu ki lâk tâka.

²⁸ Atûn hin ni sipai la omhai kha bûmhaiin lân, khopui kha rûnin lân, nangma ngêtin la roh. Keima’n khopui kha ki lâkin chu irhming satna irputna ki ti,” a tia.

²⁹ Khanchu Davida khan a sipaihai kha a bûma, Raba-ah khan a fea, an va rûna, an va lâkpai tâka.

³⁰ Amon irchihai pathian Milkoma illima irthokin Davida khan rângachak rênglukhum her sômthum ringa dôra rik kha a lâka, lukhama khan lunghluhai khom a kop saa. Davida khan a lâka, a lua a khuma. Khopuia irthokin râllâk sum tamtak an lâka.

³¹ Khopuia mihai kha thing âtna hai, kodâl hai, hreipui hai, hmangin sin an thoa, pilrôngar hai an siama, Amon irchihai khopui murdihai chu khaang khan an loa. Kha hnung chu Davida le a mihai kha Jerusalema an kîr nôk tâka.