2 SAMUELA 11 - PATHIAN LEKHABU IRTHIANG C.L. Bible (BSI)

Davida le Bethsebi

¹ Kum a hong heka, rênghai irdoi hranga an suak zoroa khan, Davida’n Joaba kha a mi lianhai le Israel sipaihai leh khan a tîra, anni khan Amon irchihai kha an inhnêhaia, Raba khua kha an irhual vinga, khannisian Davida chu Jerusalema a oma.

² Sûn khat chu, khohloi misa dâia zâlhmun ata Davida kha a thoia, rêng in chunga a hong fea. In chunga a hong fe’n chu nupang inkhat tuiirsil lai hi a hmua, kha nupang kha hmêl satak a nia.

³ Khanchu Davida khan nupang thurchi inhriat infel hrangin mi a tîra. “Eliama nâinu, Bethsebi, Hit mi Uria dôngma a ni,” an tia.

⁴ Davida khan hong hruai hrangin mi a tîra, an hong hruaia, a lei zâlpui tâka. (Ama kha a tha tina irvei a hmua irthâr zoi chak a nia.) Khanchu a in tiang a kîr nôk tâka.

⁵ Khanchu nupangnu kha a hon râi tâka; “Nâi ki vong ta,” iti kha Davida a hong inhrila.

⁶ Kha hnung chu Davida khan Joaba kuang, “Hit mi Uria kha ki kuang hong tîr roi,” ti’n chong an thuana, khanchu Joaba khan Uria kha Davida kuang a tîr tâka.

⁷ Uria kha a hong tungin chu, Joaba le a sipaihai kha an dam mo, irdoina te itin mo a om iti ar dona.

⁸ Kha hnung chu Davida khan Uria kuang, “Ni ina fe’n lân, ni sôl zu irngam ro,” a tia. Uria kha rêng in ata a suaka, rêng khan fâk zât a zun thaktirhaia.

⁹ Khannisian Uria kha a ina fe maka, rêng hrungtuhai laia rêng in kotbâi kôla khan a riaka.

¹⁰ Davida khan Uria kha a ina fe mah ti an hriatin chu Davida’n Uria kuang, “Nikho thang a sôt ok zoia hong mo ni mak che, Itho mo ni ina ni ife nuam loi?,” a tia.

¹¹ Uria khan Davida kuang, “Israelhai le Judahai kha irsual buala an oma, Thuthung Bôm kha an kuang a oma, ka pu Joaba le a mi lianhai kha rama riakbuka an oma. Itin mo keima hi ki ina fein, ki fâkin ki in hrang, ki dôngma kôla ki izâl ngam hrang? Khaanga thiltho irhoiloi chu tho viat no ning,” a tia.

¹² Khanchu Davida khan Uria kuang, “A vuan chu hin om tan lân, nangtûk la fe ta roh,” a tia. Khanchu Uria kha Jerusalema khan, kha nî sûn le zînga khom a om tâka.

¹³ Davida khan khohloi bu khalâi otpui hrangin a koia, an ruitir nenga. Khannisianlân kha zân khom khan Uria kha a ina fe maka; a hrungtuhai tentana khan a riak nôk tâka.

¹⁴ Zîng nôka chu Davida khan Joaba kha lekha a thona, Uria kha an chôitira.

¹⁵ A lekhathona khan, “Uria kha râl ichiomna tiang taka maton insatir unglân, an thata a thi theina hrangin a bing ualin om ri se,” tiin a’rziaka.

¹⁶ Khanchu Joaba’n khua a’rhual khap laia khan râl hrât omna tia inhriatna hmuna khan Uria kha a tîra.

¹⁷ Kho sûnga mihai kha an hong suaka, Joaba kha an doia, mi senkhat Davida mi lianhai laia mihai kha an thata, Hit mi Uria khom kha a thia.

¹⁸ Khanchu Joaba khan irdoi chungchâng thu kha Davida hril hrangin mi a tîra.

¹⁹ A mi tîr kuang khan, “Reng kuang irdoi thurchi murdi nin sîr zoia,

²⁰ a ning an mur thuta, ‘I lo hrang mo khaang dôr nâirêta nin va idoi? Kulpui ata nangni an ikâp hrang ti nin inhriat loi ma ni?

²¹ Jerubesetha nâipa Abimeleka kha tu mo a thatpu? Nupangin bu nôina lungin kulpuia irthokin a zu dênga, Thebez-ah khan a thi mo ni ma? Itina mo kulpui nâirêta nin ife a niin te, ni mi lian Hit mi Uria khom kha a thi sa tâk,’ ti ro,” ti’n a hrila.

²² Khanchu a mi tîr kha Davida kuang a fea, Joaba’n a itîrna san murdi kha a hril tâka.

²³ Davida kuang, “Ei râlhai kha an hong suaka, rama an ni hong doia, khannisian keini’n a kho lûtna kotbâi dên rakin kin irzûlhaia.

²⁴ Khanchu kulpuia irthokin an ni hong kâpa, khanchu rêng mi lian senkhathai kha an thia, ni mi lian Hit mi Uria khom kha a thi ta,” a tia.

²⁵ Davida khan thurchi hong hriltu kuang khan, Joaba kuang khan hiang hin van sîr ro, “Hihai hin ni milung insôltir bâk no roh, khandaiin tûte inhnê thei ual ma, hi nêka na ual hin doi unglân kho sûng kha insiat chit roi, tiin inthorhai ro,” a tia.

²⁶ Bethsebi khan a pasal Uria a thi ti a len hriatin chu a sûna.

²⁷ A sûn zoro a khêl tena chu Davida khan a in tiang a hruaia, dôngma’n a nei tâka, nâipasal a nei pea. Khannisian Davida thil tho kha Rengpa milung chuk pe maka.