2 SAMUELA 10 - PATHIAN LEKHABU IRTHIANG C.L. Bible (BSI)

Davida’n Amon le Suria mihai an hnêna

¹ Zoro sôttak hnunga chu Amon rêng Nahasa kha a thia, a nâipa Hanuna kha rêng a hong chang tâka.

² Reng Davida khan, “A pa Nahasa khan lung a ni lei inkham ang khan kei khomin Hanuna hi lung ki inkham hrang a ni,” a tia. Khanchu Davida khan a pa chungchâng thua lungngam sak hrangin a mihai a tîra. Davida mihai kha Amona irchihai omna ram an va tungin chu,

³ Amona irchihai hruaituhai khan an rêng Hanuna kuang khan, “Davida hin ni pa mahrip a tho sikin lungngam nang sak hrangin a mihai ni kuang a hong itîr ni isôn ma ni? Ni ma, Davida hin a nin hnê theina hranga le hi khua hong en infel hranga anni hi, a hong itîrhai an ni,” a tia.

⁴ Kha hnung chu Hanuna khan Davida mihai kha a chela, an hnerkamulhai a ep inkolpai pehaia, an silkaihai khom a chimrip an zer bul tena hin a tan inbongtir pehaia, a tîr paihaia.

⁵ Insûnga hong kîr kha an inzak ok tâka, Davida’n kha thu kha an hriatin chu, a don hrangin mi a tîra, “Nin hnerkamul a mônga a sei mâka chu Jeriko-a om unglân, kha zoi le la hong ta roi,” a tia.

⁶ Amona irchihai khan Davida kha râl an inchangtir tah ti an hriat tâka. Khanchu Amon irchihai khan Bethrehob-a le Zoba ata Suria sipai sînghni, Tob ata mi sîngkhat sânghni le rêng Maaka mi sângkhat an hruaihaia.

⁷ Davida’n kha kha a len hriatin chu Joaba le sipai irdoi mi murdihai kha anni doi hrangin a tîra.

⁸ Amon irchihai kha an hong suaka, an rêngpa khopui, Raba lûtna kotbâi tianga khan omhmun an siama; mi danghai Zoba le Rehoba ata Suria sipaihai le Tob mihai le Maaka mihai kha chu a bingin irnak songna hmun an siama.

⁹ Khaangin an maton tiang le an hnung tiang râlhai khan an hong idoi hrang a nih iti Joaba’n an hriatin Israel sipaihai laia mi hrât le sa an thanghaia, Suria mihai doi hrangin omhmun an lei siama.

¹⁰ A sipai danghai murdi kha a sangpa Abisaia hruaina hnuaia a siahai vinga, Amon irchihai doi hrangin irnak songna hmun a lei siam saa.

¹¹ Joaba khan a sangpa Abisaia kuang, “Suria mihai kin hnê no hrangin chu, nangin ni hong san ni ta; khante nangma’n Amon irchihai nin hnê no hrangin chu, nang hong san ki ti.

¹² Hrâttak le hâitakin om unglân, ei mihai le ei khopuihai sanin pasal satakin doi ei ti duah; Rengpa khan a sa a iti lam takin tho ni ri se,” a tia.

¹³ Joaba le a mihai khan, doi hrangin an hong panin chu Suria mihai kha laizâm an tho tâka.

¹⁴ Amon irchihaiin Suria mihai laizâm an tho ti an inhriatin chu anni khom kha Abisaia kuanga khan laizâm an tho tâka, khuaa khan an lûta, kha hnung chu Joaba khan Amon irchihai kha a mâkhai raka, Jerusalema a kîr tâka.

¹⁵ Suria mihaiin Israelhai kôla an dinghmun siatzia an hon hriatin chu, an sipai murdi an koi bûma,

¹⁶ Reng Hadadezera khan mi a tîra, Eufrates vadung nisua tiang Suria mihai kha a hruai suakhaia, Zoba rêng Hadadezera sipai hruaitu Sobaka khan a hruaihaia, Helama an fea.

¹⁷ Kha kha Davida’n a len hriatin chu Israel sipaihai a bûm nôka, Jordan dung an irkâna, Helema khan an fea, Suria mihai khan Davida doi hranga khan omhmun an lei siama, an lei doia.

¹⁸ Suria mihai kha Israelhai kuanga khan laizâm an tho tâka, Davida le a mihai khan Suria mi tâli chunga chuang mi irzasari le sakor chung chuang mi sîngminli an thata, an sipai hruaitu Sobaka khom an inphop nenga, irdoina hmuna khan a ithi tâk a ni.

¹⁹ Khaang khan Hadadezera thuhnuaia an rênghai khan Israelhai makunga an dinghmun a siat tâk ti an inhriatin chu, Israelhai leh irngeina an siama, an thuhnuaia an om tâka. Khanchu Suria mihai khan Amon irchihai kha san nôk ngam ta mahai.