Biblia Todo Logo
Bìoball air-loidhne

- Sanasan -

2 SAMUELA 1 - PATHIAN LEKHABU IRTHIANG C.L. Bible (BSI)


Davida’n Saula thi thu an hriat

1 Khan, Saula thi zoi hnungin Davida kha Amalek-hai a rûn zoiin a hong kîr nôka, Ziklag khuaa khan sûn hni a om tâka.

2 Sûn thum nî khan chu ruatharte inkhat Saula riakbuk ata irthokin a zuang tunga. A beidong inlangtirna hrangin a puanhai an pot thêra, a lua pil ar thua. Ama kha Davida kuang a fea, irnênga inbokin chubai a mûka.

3 Davida’n a kuang, “Kho tianga irthoka zuang mo ni ini?,” a tia. Ama khan, “Israelhai omhmun ata zuang ki ni,” a tia.

4 Davida khan a kuang, “Itin mo thil a iom nin hril ro,” a tia. Ama khan a sâma, “Irdoina hmun ata ei sipaihai kha laizâm an thoa, ei mihai tamtak an thata, Saula le a nâipa Jonathana khom an thi sa tâk,” a tia.

5 Davida khan a hriltu ruathartepa kuang, “Itin mo Saula le a nâipa Jonathana an thi ti ni inhriat thei?,” a tia.

6 Ruatharte khan, “Gilbo tânga khan ki lei va om ropa, Saula kha ufei irhnêla ngîrin ki hmua, râlhai tâlihai le sakor chung chuang mihai lakin an hong nâi tâk sikin.

7 Khanchu a hnung tiang ar heiin ki hmua, a ni koia ‘Imo ki itho thei hrang,’ ki tia.

8 Khanchu ki kuang, tu mo ni ini? a ni tia. Keima’n, ‘Amalek mi ki ni,’ ki tia.

9 Kha hnung chu ama’n ki kuang, ‘Hin hongin lân, ni that ro, ki sâbe tuang a na hrai ta, ki ithi ngêt hrang a ni ta,’ a tia.

10 Khanchu a kôla ki fea, an rîlin chu a ithi ngêt hrang a nih ti kin hriat sikin, ki ithat tâk a ni. Kha hnung chu a lu rênglukhum le a bâna bâla kha ki lâka, ka pu, hin ni kuang ki zuang ichôi a ni,” a tia.

11 Kha hnung chu Davida hin beidongin a sil le kaihai an potthêr a ni; khaang khan a kôla om murdihaiin an thoa.

12 Khanchu Saula le a nâipa Jonathana le Rengpa mihai kha khandaia that an ni tâk sikin, Israel mihaiin an sûna, an châ tâka. Khohloi dênin bu an ngheia.

13 Davida khan thurchi zuang hriltu ruatharte kuang khan, “Kho tianga mi mo ni ini?” a tia. Ama khan, “Amalek mi ki nia, khannisian nin rama om ki ni,” a tia.

14 Davida khan a kuang, “Rengpa sahriak irthûtir irhmangtir hrang chunga kut ni thâka, itina chi loi ngân mo ni ini?,” a tia.

15 Khanchu Davida khan a mi inkhat a koia, “Fe’n lân va that ro,” a tia. Amalek mi kha a va tuk that paia.

16 Davida khan Amalek mi kuang khan, “Ni thisen chu nangma lu chunga om ri se. Ni bâi ngeiin Rengpa sahriak irthutir kha ki ithat tiin nin puang tâk sikin,” a tia.


Davida’n Saula le Jonathana a sûnhai

17 Davida khan Saula le a nâipa Jonathana kha hiang hin a châhaia.

18 (Hi hla hi Juda irchihai irchuhai hrangin thu a pêka; khanchu hi hla hi Jasara lekhabua chuang a ni.)

19 “Israel tânghaia khan ei hruaituhai an thi ta na! Ei sipai hrâthai an inrîl zoi ta!

20 Gath khuaa khan insîr no unglân, Askelon kotsuahai khan inpuang no roi; khano’nchu Filistia nâinuhai lôm an ta, sertan loi nâinuhai raifânin pâi an ti.

21 Gilbo tânghai khan irdo le rua tho no sian, Loia khom ite vâng no ri se! kha hmuna mi lian pho kha mualphoi takin paiin a oma, Saula pho ngei kha sahriak pol ta loiin a iom a ni.

22 An ithathai thisena irthok le, mi lian thala irthokin Jonathana thal kha kîr ngai maka, Saula khandai kha chanlamboiin kîr ngai ma.

23 Saula le Jonathana chu inditomin an sa vang na! An hring khomin, an thi khomin, irsen ngai mahai. Irmupuihai nêkin an hrât uala, kâmkeibakneihai nêkin an ihrât ual a ni.

24 Nangni Israel nâinuhaio, Saula kha châ roi, puan sen satakhai leh nangni a’rvotira, rângachak le lunghluhaia nangni irvotu kha.

25 Sipai hrâthai an inrîla, irdoina khan an thi tâk e; Jonathana chu tâng chunga khan a thi ta.

26 Ki’rzirpuipa Jonathana, ni chungthua hin ki bei a idong a ni; ki ta hrangin ni hlu vang na! Lung ni ni thung dân hi ar khêla, nupanghai lungthungna a ikhêl a ni.

27 Sipai hrâthai an inrîla, An hriamhreihai khom ar hmang zoi tâk e,” tiin.

Hrangkhol CL Bible - PATHIAN LEKHABU IRTHIANG

Copyright © 2008 by The Bible Society of India

Used by permission. All rights reserved worldwide.

Bible Society of India
Lean sinn:



Sanasan