2 RÊNGHAI 3 - PATHIAN LEKHABU IRTHIANG C.L. Bible (BSI)

Israel le Moab irdoina

¹ Judai rama Jehosafata kum sômhleiriat an lal kumin, Ahaba nâipa Jehorama chu Israel rama an lala. Samari khuaa kum sômhleihni an lala.

² Rengpa mithmua thilsual a thoa, a nu Jezebeli le a pa ang dôra sual chu ni maka. A pa millim, Baal biakna hmun a isiahai chu an siatpai pea.

³ Khannisian, a matona rêng Nabota nâipa Jeroboama thilsual tho chu masan thei maka Israelhai a hruai insuala, irlet nuam maka.

⁴ Moab rêng Mesa khan kêlbelra a vâia, a kum tin Israel rêng kuang chôirual angin belrate nuaikhat le belrachal nuaikhat mul a pêk ngaia.

⁵ Israel rêng Ahaba a thi’n chu, Moab rêng chu Israelhai a doia.

⁶ Reng Jehorama chu Samari khua ata a suak lata, a sipaihai a buk khômhaia.

⁷ Judahai rêng Jehosafata kuang, “Keini chunga hin Moab rêng a ni tehel pe tâka, ni doipui theiin mo?,” tiin chong an thuana. Reng Jehosafata’n, “Nangni hong san ki ti; ki mihai le ni mihai chu pumkhat kêng ei ni.

⁸ Kho tiang ata mo hong doihai ning?” a tia. Jehorama’n, “A hlana tiang Edom tâng châr ata hong phut ki ti,” a tia.

⁹ Reng Jehorama, Judai rêng le Edom rênghai chu an hong irsiam suaka, sûn sari an fe tena chu tui an irsama. Mihriam in hrang le an puakpêl sahai in hrang ite an nei ta no sikin.

¹⁰ Jehorama’n, “Ei Pathian Rengpa hin Moab rêngin a nuam taka nin soisaktir hranga a ni hong ihruai a ni hi te, a’rkhêl bâka,!” a tia.

¹¹ Reng Jehosafata’n, “Rengpa kin irdon hrang deipu mo an om?” a tia. Jehorama sipai hruaitu inkhat hin, “Safata nâipa Elisa, hitaka hin a om, deipu Elija hnungzui ngai kha,” a tia.

¹² Reng Jehosafata’n, “Deipu diktak a ni kha te,” a tia. Reng inthumhai chu deipu Elisa kuang an va fea.

¹³ Elisa’n Israel rêng kuang khan, “Itin mo nangni ki isan hrang nin nu le pahaiin an lei irdonhai ngai deipuhai var donhai unglân sa no ni mo,” a lei ti pehaia. Jehorama’n, “Ama Rengpa kêng hi a ini eini rêng inthumhai Moab rêng kuta ni siatu chu,” a tia.

¹⁴ Elisa’n, “A sin ki tho mihring Rengpa irhmingin Judai rama rêng Jehosafata hi irngaisâng no inlân chu i ang khomin nangni san lam inhre ma ung kêng nangni ki iti na mo ni ma,” a tia.

¹⁵ Elisa’n, “Irhâihoi tum thei hong hruai hi roi” a tia. Irhâihoi tum theiin a hong tum inringin chu, Rengpa kutin Elisa kut a zuan thema.

¹⁶ “Hi irhôra hin khur choi unglân, Rengpa’n a ti.

¹⁷ Rengpa’n hiang hin a ti, ‘Phâivua tho loiin sûm hmu khom unglân, hi irhôrhai hi tuiin sip zit a ti; khahai kha nin neinun vâihai le nin rêngin in ta nin ti,’ a tia.

¹⁸ Khaanga hai kha chu Rengpa hranga tho intak ni ma, nin kuta Moab hai khom nangni pe a ti.

¹⁹ Kul neihai le khua hoi ualhai insiat unglân, thing sa chihai irkit unglân, tuikuang sûnga buk unglân, loi hoina hmunhai khom lung dêng hnôk inbit roi,” a tia.

²⁰ Zîngkhua a hong vâra hâlirvôm thil an inhlan zoro a hong phâkin chu, Edom ram rengata tui a zuang luanga, an omna hmunhai tuiin a sip tâka.

²¹ Moab haiin, an nihai doi hranga rêng inthumhai an hong tih an inhriatin chu pasal diarkai thei murdi’n, nâipang ata ulian dênin an irbuka, an ramrihai an hrung tâka.

²² Zîngkhua a hong vâra, misa a hong suakin chu tui a êl insen phuta, thisen anga senin an langa.

²³ “Thisen a ni khu te, sipai pâl thumhai an irdoia, an irthat ngêt ni a ti. Tho an omna hmun zu en ei ti,” an tia.

²⁴ An râlhai omna hmun an zu tungin chu Israelhaiin an lei doihaia, an irzûl kîrhaia, Israelhaiin an irzûlhai maia, Moabhai chu an thathai oka.

²⁵ An khua khom an insiat pehaia, an loi hmun hoihaia khan Israelhai fe hongna lamin lung an intheka, an loihai chu lungin a sip zoi tâka. An tuikuanghai khom thing leh an inbit pehai tâka, a hnungkhôn taka chu an khopui Kir-hareseth vai la siat maka, kha khom kha sâilungdêng hmang theihaiin an irhuala.

²⁶ Moab rêngin a râlhai inhnê loi hrang ti an hriatin chu khandai chôi sipai irzasarihai leh a râlhai chu nakhrât songin a palthûthaia, Suria rêng rama intân a tuma; khannisian intân thei maka.

²⁷ Khanchu, a nâipa uliantak, ama thûl hrangtu chu, a chela, Moabhai pathian kôla kulbang bula khan a thata, ar hlan tâka. Israel mihaiin an hmu’n chu an chia, kha khua kha an mâksana, an rama an ikîr nôk tâk a ni.