2 RÊNGHAI 25 - PATHIAN LEKHABU IRTHIANG C.L. Bible (BSI)

Jerusalem siatna thu

¹ Zedekia chu Babulon rêng kôl ata a’rhela; khanchu Zedekia kum kuak an lal kuma tha kuakna sûn sôm niin, Nebukadnezara chu a sipaihai leh an honga, Jerusalem an hong rûna an khuaa dâi kôla hmun an khuara, bang an irkul vinga.

² Zedekia inlal kum sômhleikhatna dênin an irhuala.

³ Kha kuma tha minlina sûn kuak nî chu an khua khom châm a sate’n a tâka, tûte fâk hrang nei ta mahaia.

⁴ Khua an irkulna bang chu an inseta, Babulon haiin irhualhai khomsian sipai le rênghai zâna an suak tâka. Reng irhuan kôla an fea, kulbang inhni kâra mikota an suaka, Jordan tui panin an intân tâka.

⁵ Babulon sipaiin rêng Zedekia chu an irzûla Jeriko kôla phâirama an chela, a sipaihaiin an rotsan vinga.

⁶ Zedekia chu Ribla khua Nebukadnezara makunga an hruaia, a chungthu a lei rêl pe zôia.

⁷ Zedekia mithmua ngeiin a nâihai chu Nebukadnezara’n a thathaia, Zedekia mit ru khom a kêlterpai pe sa; kut khit pumin Babulon-a a hruai ta.

Tempil insiatna

⁸ Babulon rêng Nebukadnezara inlal kum sômhleikuakna tha ringa le sûn sari ni sûn chu Nebukadnezara hrungtuhai laia an ulian Nebukadnezara chu Jerusalem khuaa a lûta.

⁹ Tempil chu a hâla, rêng inhai le Jerusalema mi lianhai in khom a hâl pehaia.

¹⁰ A sipaihaiin khua an irkulna bang an seta.

¹¹ Nebukadnezara’n khopui sûnga mi la omhai chu Babulon tiang a hruaihaia, mi kut theithiamhai le Babulon la hmu ngai loihai khom suak hrangin a hruaihaia.

¹² Mi chukloitehai vai grep irhuan le loi infâi hrangin Judai rama a mâksanhaia.

¹³ Kaldaihaiin tempil dâr chopui, tâli le tuipanghai an insiat, a dâr pumin Babulon-a an chôi.

¹⁴ Maichâma irvut luakna le a siana, meiser siana hmangrua, thilinhlan zoro thisen dôna tâbor, mirimhoi hâlna, tempil sin thôna an ihmang dâr lam pang rêng rêng chu an lâk vinga.

¹⁵ Rângachak le sumrua siam murdi chu berbu lian le a chîn tetehai ite hôi loiin an ilâk infâi ving a ni.

¹⁶ Solomona’n tempila hrang dâra siam chopui, tâli, tuipanghai chu var thei loi raka rik a ni.

¹⁷ Chopui inhnihai chu an irang mai, mûk sômhleiriata irsâng an ni.

Judahai Babulon-a an hruai

¹⁸ Sipai uliantak Nebuzaradana’n ochai inlaltak Seraia le a hnuaia ochai Zefania le tempila ulian inthumhai khom Babulon-a a hruaia.

¹⁹ Kho sûnga ulian dang la omhai, sipai hruaitu dang sipai irdâi tianga thei le mi kâmnang a dang sômrukhai chu,

²⁰ Nebuzaradana’n Hamath bial Libna khua Nebukadnezara omna khuaa khan a hruaihaia.

²¹ Reng a vîkhaia, a lei that polhaia. Khaang khan an rama suaka hruai an ni ta.

Judai ram optu Gedalia

²² Babulon rêng Nebukadnezara’n Ahikama nâipa Gedalia, Sefama tupa chu Judai ram op hrangin an thanga, Babulon-a hruai loihai enkolin a kuta pêkin a oma.

²³ Juda sipai le an ulian Babulon rêng kôla irpêklût nuam loihaiin an inhriatin chu Mizpa khuaa Gedalia kuang an fea; kha sipaihai kha Nethania nâipa Ismaela, Karea nâipa Johana’n le Netofa khua mi Tanhumeta nâipa Seraia le Maaka khua mi Jaazania le a mihai an ni.

²⁴ Gedalia’n an kuang le an mihai inhriatin, “Kaldai sorkâr sinthohai hi chi no ro. Rama hin om papai unglân, Babulon rêng hnuaia kûn unglân nin ta hrangin sa a ti,” a tia.

²⁵ Kha kum sûng tha sarina chu Nethania nâipa Ismaela Elisama tupa, rêng irchia mi chu mi sômkhathai le Mizpa khuaa an fea, Gedalia chu a doia, a thatpai tâka. A kôla om Israel le Babulon mihai khom a thathai saa.

²⁶ Israel mi murdi inriangtehai le sipai ulian lei ni tâkhaiin Babulon-hai an chi no sikin Aigupta ram an fe ta.

Jehoiakina zêl intâng suakna

²⁷ Evilmerodaka babulon rêng a ni kumin, Judai rêng Jehoiakina chu lung an khama, intângna in ata an suaka, Jehoiakina chu kum sômthum sari le tha sômhleihni sûn sômhni sûn sari ni an tâng zoiin an insuaka.

²⁸ A sate’n a chong a hoia, a rêngtoihmun chu rêng danghai nêkin a’rsângtir pea.

²⁹ Intângna ina songkol a kheka, a dam sûng chu rêng kôla bu a nêk tâka.

³⁰ Sûn tin a bituk neiin a innang murdihai chu an pêk mai ta ngai a ni.