2 RÊNGHAI 24 - PATHIAN LEKHABU IRTHIANG C.L. Bible (BSI)

¹ Jehoiakima an lal lai hin Babulon rêng Nebukadnezara’n Judai ram a doia, a hnuaia Jehoiakima chu kum thum an lala, a tehel pe tâka.

² Rengpa’n Babulon sipai rualhai, Moab hai, Amon sipaihai hmangin Jehoiakima a doia. Judai ram insiat hrangin a tîra. Hianga a tho hrang thu hi Rengpa’n a deipuhai hmangin a lei insîr sai a ni.

³ Reng Manasea thilsual tho hai, ite ti loia a thathai hluk sikin, a hmuphâk loina rama Judahai a’rzûlhai theina hrangin hi thil hi Rengpa thupêk zuang tung a ni;

⁴ Rengpa’n Manasea thilthohai hi a ingaidam thei loi a ni.

⁵ Jehoiakima thiltho danghai chu Juda rênghai thurchi irziakna bua a chuang.

⁶ Jehoiakima chu a thi tâka a nâipa Jehoiakina an lal nôk tâk a ni.

⁷ Eufrates tui le Aigupta hmâr tiang ramri kâr murdi hi Babulon rêng thuneina hnuaia a om tâk sikin Aigupta rêng le a sipaihai chu irthok suak ngam ta mahai.

Juda rêng Jehoiakina

⁸ Jehoiakina chu kum sômhleiriat mi a niin Judahai rêng a changa, Jerusalema tha thum an lala. A nu chu Jerusalema mi Elnathana nâinu Nehusti a ni.

⁹ A pa angin Jehoiakina khomin Rengpa mithmua thilsual a itho a ni.

¹⁰ An lal lai hin rêng Nebukadnezara sipaihaiin Jerusalem an hong irhuala.

¹¹ An irhual lai hin rêng Nebukadnezara chu Jerusalema a lei hon zin lai tak a nia.

¹² A nu nâi a sipaihai le rêngin a mi lian omhai le Jehoiakina chu Babulon kuta a irpêk lût a ni. Nebukadnezara’n an lal kum riatna hin Jehoiakina chu suakin a chela.

¹³ Tempil le rêng ina sum om murdi le Babulon khuaa a chôia, Rengpa lei ihril tâk angin rêng Solomona tempila hmang hrang rângachak bêlbûr a isiahai an siata.

¹⁴ Reng Nebukadnezara’n Jerusalem khua mi, rêng in sûng mi murdi mi lian ualhai sîngkhat suak chang hrangin a hruaihaia. mi kut theithiam, thîrsuhai khom a hruaihai zita. Judai rama chu mi’nmôltehai vai a mâksanhai ta.

¹⁵ Nebukadnezara’n Jehoiakina chu a nu le a dôngma a mi lianhai le Judai rama mi lian ualhai chu Babulon suaka an omtira.

¹⁶ Nebukadnezara’n sipai chang thei loihai chu Babulon tiang a hruaihai zita, mi sângsari le kut theithiam, thîrsuhai sângkhat a hruaihai a ni. Sipai chang zit an ni.

¹⁷ Nebukadnezara’n Jehoiakina pa sangpa Matania chu Judahai rêngin a siaa, a’rhming a thûl pea, Zedekia a iphua a ni.

Judahai rêng Zedekia

¹⁸ Zedekia chu kum sômhni inkhat a niin Judahai rêng a changa. Jerusalema kum sômhleikhat an lala. A nu chu Libna khua mi Jeremia nâinu Hamutali a ni.

¹⁹ Reng Jehoiakina angin Rengpa mithmua thilsual a thoa.

²⁰ Rengpa chu Jerusalem le Judai ram mihai chunga a ning an mura, a hmuphâk loina rama an hnotsuakhai tâk a ni.