2 RÊNGHAI 21 - PATHIAN LEKHABU IRTHIANG C.L. Bible (BSI)

Manasea Judahai rêng

¹ Kum sômhleihni a ni kumin Manasea chu Judahai rêng a chang irphuta, Jerusalema kum sômringa an lala. A nu chu Hezibi a ni.

² A mipuihai laia, Rengpa inhnotsuakhai nam tho dân intiromtak takhai khom Manasea’n a thoa, Rengpa mithmua thil saloi a thoa.

³ A pa Hezekia insiat, nam dang pathian biakna hmun irsânghai chu a siam insata, Baal ta hrangin maichâm a siama, Israel rêng Ahaba ang khan Aseri irlim a phuna, irvâna ârsihai khom a biak ngaia.

⁴ Jerusalem khua hi nin ni ibiakna hrang hmun chu a ni; tiin Rengpa’n a inthang a ni; kha tempila khan maichâm chi tinrêng a isia a ni.

⁵ Tempil sûnga tentan inhnia khan irvâna ârsihai hrang maichâm ar tâng inbita.

⁶ A nâipa inkhat chu hâlirvôm thilinhlanna hrangin a thata. Kutzia en le tasân a hmang uara, ramkhohri le mithi kaithoi theihai an phûthai ngaia. Rengpa mithmua thilsual tamtak a thoa, a milung an natir pe a ni.

⁷ Davida le a nâipa Solomona kuanga Rengpa’n, “Hi Jerusalem khuaa tempil hmun hi Israel nam sôm le nam hnihai laia ram murdihai ni biakna hmun hranga ki inthang a ni a ti, tempil sûnga khan Aseri irlim a iphun a ni.

⁸ “Israel mihaiin ki thupêkhai an zôma, ki dân, Mosia ihril kha an zôm zita a niin chu an irchihai hi, ram ki ipêkhai ata hi inhnothai no ning, a ti a ni.

⁹ Judai rama mihaiin Rengpa thu zôm loiin, an matona Rengpa inhnotsuakhai nam tho dân anga thilsual ual tho hranga Manasea’n a ihruai a ni.

¹⁰ Rengpa’n a siahlo deipuhai hmangin hiang hin a hril.

¹¹ ‘Manasea’n thil intiromtak takhai, hi rama an om mân ata om Kanaan mihai itho ngai nêka intirom a thoa, millim siamin Judahai a ihruai insual a ni.

¹² Khanchu, kei Rengpa, Israelhai Pathian hin, an hriat murdihaiin a’rkhêl an ti thei hrang dôrin Jerusalem le Judai ram siatna intungtir ki ti.

¹³ Samari khua le Israel rêng Ahaba ki isoisak ang khan, Jerusalem khom soisak ki ti. Khêng ei irsûkinfâia ei inkhub ang hin Jerusalem khom a sûnga omhai hi irsûkinfâihai ki ti.

¹⁴ Ki mi, la thi zoi loihai khom hi hnôlhai ki ta, an râlhai kuta la pe ki ta, khanchu an nuam takin soisakhai an ti.

¹⁵ An irchihai Aigupta ram ata an hong suaka irthokin, atûn ten hin, an la itho insual a ni! ki iti anga om loiin ki ningmak an la itho mai ang hin ki mihai a sate’n la soisakhai,’ ki ti.

¹⁶ Manasea’n ite ti loihai a that intamhaia, Jerusalema thisen a iluang hluk a ni. Juda mipuihai chu millim biak an uartirhaia, Rengpa ta hrangin thilsual an itho a ni ta.

¹⁷ Manasea sintho dang thilsual a ithohai chu Juda rênghai thurchi irziakna lekhabua a chuang.

¹⁸ Manasea chu a thia, a rêng irhuan, rêng Uzia irhuan sûnga an phûma, a nâipa Amon chu a’rthûlin an lal nôk ta.

Juda rêng Amon

¹⁹ Amon chu kum sômhni inhni a ni kumin Judahai rêng a changa, Jerusalema kum hni an lala, a nu chu Jotba khuaa mi Haruza nâinu Mesulemiti a ni.

²⁰ A pa Manasea angin Rengpa mithmua thilsual a thoa.

²¹ A pa tho dân a lâka, a millim biak ngai a biak uara,

²² An irchibulhai Pathian Rengpa chu a hnôla, Rengpa thupêkhai zôm nuam loiin a oma.

²³ A ituanghai laia mihaiin an khitphiara, rêng in sûnga an thata.

²⁴ Judahaiin Amon nâipa Josia chu ar thûlin rêngin an siam nôk ta.

²⁵ Amon sintho danghai chu Juda rênghai thurchi irziakna lekhabua a chuang.

²⁶ Amon chu Uzia irhuan thâna khan an phûma, a nâipa Josia chu a’rthûlin an lal nôk ta.