2 RÊNGHAI 20 - PATHIAN LEKHABU IRTHIANG C.L. Bible (BSI)

Hezekia damloi dam nôkna

¹ Kha laia khan rêng Hezekia chu thi hrang angin a naa. Amoza nâipa Isaia’n a hong pana. “Rengpa’n hiang hin a ti, nin sûngkua rêl infel ro, ni thi hrang a ni sikin, dam suak ta no chi ni,” a hong tia.

² Hezekia’n bang tiang a’rheia, a chongchaia:

³ O Rengpa ni mithmua hin dik takin ki om ngaia, lungrîl irthiang irputin thil sa ki tho ngaia, irngaihoi takin inhre mai ro, a tia, a chap ngûi ngûia.

⁴ Isaia chu a fea, rêng in tual a khêlin an Rengpa mihai chunga roirêltu Hezekia kuang khan Rengpa’n a tîr kîr nôka.

⁵ “Kei Rengpa ni pu Davida Pathian hin ni chongchaina kin hriata, ni mitrithi tâk ki hmua, nan damtir ki ta a vuan ata sûn thum zoia chu tempila fe thei ni ti.

⁶ Kum sôm kum ringa ni dam sûng kum nang ki bôk pe. Assuria rêng kut ata nangma le ama khua hi kei leh ki siahlo Davida zârin inzôk ki ti, a ti va ti ro,” a tia.

⁷ Isaia’n, “Theipui ra hmin hor hmal roi,” a tia. Thei ra hmin chu an lâka, a sakhuaia khan an khop pea, a hong dam pe ta.

⁸ Reng Hezekia’n, “Rengpa’n nin damtir a ta, sûn thum zoia chu tempil fe thei ki tih iti, itina kin inhriat thei mo?” a tia.

⁹ Isaia’n, “Rengpa’n nang indam a tih ti inhriatna hrang irsinsiana nan entir a ti, nir hlîm so kal sôm a fe mo ni nuam kal sôma kîr nôk mo, ni inuam tak inthang ro,” a tia.

¹⁰ Hezekia’n, “kal sôma infetir chu a olhrai ta, kal sômin kîr nôk ri se,” a tia.

¹¹ Isaia chu a chongchaia, rêng Ahaza irhlîm siam chu Rengpa’n kal sôm an kîrtira.

Babulon rêng palai

¹² Kha laitaka khan Babulon rêng Balada’n nâipa Merodak-baladana’n Hezekia chu a dam nôk tah ti an hriatin thilpêk le lekha a hong thona.

¹³ Hezekia chu a sân a lôma, a sum siana inhai an entira, a sumru, le rângachak hai, a mosola le mirimhoi danghai, a râlthuam hrêna inhai le a ram sûnga hmun poimohai inentir loi zel nei maka.

¹⁴ Deipu Isaia chu Hezekia kuanga a fea, “Hi mihai hi kho rengata hong mo an ini, imo an hong ihril?” a tia. Hezekia’n, “Ram hlatak, Babulon ata hong an ni,” a tia.

¹⁵ Isaia’n, “Reng ina i zât thil mo an hmu?” a tia. Rengin, “Itinrêng an hmu ving thil hrênahai khom itinrêng hmu loi zel nei mahai,” a tia.

¹⁶ Isaia’n Hezekia kuang, “Irngai roh Rengpa thu hi:

¹⁷ ni ina thil om murdi, ni pahaiin a vuan sûn tena an ihrêkhômhai hi Babulon-a an lâk ving zoro hong tung hrang a ni, ite mâksan ni no nihai, Rengpa’n a ti.

¹⁸ Nangma inei ngei, ni nâipasalhai chel an ta, an til la pehai an ta, Babulon rêng sintho pe ta an ti,” a tia.

¹⁹ Reng Hezekia chu a dam sûng kum chu raifân takin om a ta, an izôk hrang tiin ar bêa, “Rengpa thu ni zuang intung chu raifân a om” a tia.

Reng Hezekia thi thu

²⁰ Reng Hezekia thil tho danghai chu, a hâi lam le tui lût thei loina hmun Akera khuaa tui a inlûtna thu hai, Juda rênghai thurchi irziakna lekhabua a chuang ving.

²¹ Hezekia chu a thia, a nâipa Manasea chu ar thûlin an lal nôk ta.