2 RÊNGHAI 19 - PATHIAN LEKHABU IRTHIANG C.L. Bible (BSI)

Rengin Isaia ar donna

¹ Reng Hezekia’n kha thu kha an hriatin chu a puan an potthêra, bora puan a sila, Rengpa tempila a lûta.

² Reng in sûng enkoltu Eliakima, changpuitu Sebna le ochai laia ulianhai chu bora puan sil deipu Isaia kuang a tîra.

³ Reng Hezekia’n hiang hin a tia. “A vuan hin kin ta hrangin lungzîngna a itung a ni ta, an ni hmumâka, an ni hnuaisia ok ta a ni. Nâi nei zoro a tunga nuhai an irzal ngôi ngôi angin kin iom a ni ta.

⁴ Pathian hring êsêl hranga Assuria rêng itîr, Rab-sakea ihril ang kha, Rengpa ni Pathianin nang len hre suak a ti; Rengpa ni Pathianin inhriatin deng nan theitir khomsian, kin mihriam a la damhai ta hrangin, nangma’n chongchai ro,” an va tia.

⁵ Reng Hezekia mi a itîrhai khan Isaia kuang an va tunga,

⁶ Isaia’n an kuang, “Rengpa’n hiang hin a ti; Assuria rêng siahlohaiin an ni imanêp dân thu ni inhriat kha chi ual no roh.

⁷ Irngai ro, a lungrîl indôptir ki ta, thu nan hretir ki ti; a rama kîr nôk a ta, a ram sûnga ngêt chemseiin thatpai an ti, tiin nin pu makunga hril roi,” a tia.

Assuria rêngin a râi nôk

⁸ Rab-sakea chu a chuma, Lakis ata Assuria rêng chu a’rsona Libna khua a doi ti an hriatin chu, kha lam kha a pana, a va hmua,

⁹ Ethiopia rêng Tirhaka thurchi Assuria rêng chu an hrila. Ama doi hrangin a hor thok a nih ti an hriatin Hezekia kuanga tirtôn a tîra, lekha a thona,

¹⁰ “Judai ram rêng Hezekia kuang, ni iam ngai ni Pathianin Assuria rêng kuta Jerusalem chu pe no ni, tiin nang ni huang no ri se.

¹¹ Assuria rênghaiin a ram lua murdia an sinthohai le, an ram an insiat thu chu nin hriata. Nangma hi mi nin zôk thei ual bîk hrang ma ni?

¹² ka pahaiin an insiathai nam Gozan, Haran, Rezep le Telasar-ah om Edom mihai kha an pathianhaiin an isan theihai hrang mo?

¹³ kho tiang mo Hamath hai rêng, Arpad rêng Sefarvaim khuaa om rêng Hena rêng Iva rênghai kha an iam ta va ti ro,” an tia.

¹⁴ Rual koi fe lekhathon chôitu kha Hezekia’n a lei hmu’n chu a lekhathon a tepa, Rengpa tempila a lûta, Rengpa makunga khan a phara.

¹⁵ Hezekia chu Rengpa makunga a chongchaia, “O Rengpa, Israelhai Pathian, cherub chunga toi, nang hi Pathian tak chu ni ni, ram murdi luatu le roirêltu ni nia, irnêng le irvân khom hi nangma isiam a ni.

¹⁶ Rengpa ni mikuar sungin lân irngai ro. O Rengpa, mengin lân, hei en ro; Pathian hring hnuaisia hranga Senakeriba’n thu a ihrilhai hi irngai ro.

¹⁷ O Rengpa Assuria rênghaiin nam tin an doia, an ramhai an insiat pehaia.

¹⁸ An pathianhai chu meia an hâl pehaia, khahai kha chu pathian chu ni mahaia, mihriam kuta siam thing le lung mamai an ni, siat thei thil chu an ni.

¹⁹ O Rengpa, hi a kut ata hi ni sansuakin lân; khanchu, rammual hmun tina mihaiin nang vai hi Pathian Rengpa ni nih ti nan hrethei an ti,” a tia.

Reng kuanga Isaia chongbe

²⁰ Amoza nâipa Isaia’n Hezekia kuanga mi a tîra, a kôla ni chongchaina chungchâng le Assuria rêng Senakeriba chungchânga

²¹ Israelhai Pathian Rengpa thuhril chu, hi hi a ni. Zion nâinu’n nang en nuam maka, nang an nuisana. Jerusalem nâinu’n nang a rotsana a lu nang an thik khuma.

²² Tu mo nin nuisana, nang a inlâp pe? tu hrangin mo ni hnuk irhâi ni inringtir? Tu kôla mo mualphoi ni irlâk loi? Israel mi irthianghai lai ata a ni.

²³ Ni siahlohai hmangin “Rengpa ni hnuaisiaa, tâli tamtak le tâng irsânghaia ni luia, Lebanon tâng hmun tin ki’rfanga, Sidar thingkung irsâng ki ngôta, Meisâr thing sa zâthai ki iphûr ngai a ni. A tâng irsânghaia ramrîlhai khom ki’rfang vinga.

²⁴ Tui ki sun suaka, ki in ngai a ni, Aigupta tuihai ki kezaphain ki sira. ki sir chîl ta,” ni tia.

²⁵ Tian ata ki lei itho nuam a nia, lan hre mak che mo? Atûna thil hong tung hi tiana ki lei irêl zoi tâk a ni. Kulnei khuahai nin siatpaia.

²⁶ A sûnga omhai an thâiindôp lam le beidong taka mual an inphoi dân, ram le muala hloisûl pâr In chung laia phâizôl anga omhai le, phâivua lum isêm inthêmhai khom ki lei irêl sai tâk a ni.

²⁷ Ki chunga ni hla irkhenhai, ni toi le ni lûthai khom ki irêl sai a ni.

²⁸ Ki chunga hin ni chiar ngaia, ni mualinphoi dân ki len hriat ta, ni hnâra hin hnâr infôktirna irbun ki ta. Pat ritui hmuam angin, ni hongna lam tiang kaizang ki ti tiin.

²⁹ Reng Hezekia kuanga, “Hi hi ni hrangin irsinsiana ni a ti. Kumin hin farhli tûng nin ta, nakum khom kha farhli ngêt kha la tûng nin ti. A kum thumna tena chu ansuangrua song nin ta, a ra irhmal ta nin ti. Grep ling unglân, a ra fa ta nin ti.

³⁰ Judai rama la dam sunhai chu theikung, inthûk taka irzungthâka ra irkukhak ang la ni an ti.

³¹ Jerusalem ata la dam suak hrang an oma, Zion tânga a thi zoi loi an iom ngêt hrang a ni. Rengpa sathnem irngaina’n hi thil hi a itho ngêt hrang a ni.

³² Khasikin Assuria rêng chungchânga Rengpa’n hiang hin a ti, “Hi khopuia hin lût no nia, sîrkhat khom sir no nia, pho leh khom doi no nia, irnêng irkulna khom tuk ual no ni.

³³ A hongna lama ngêt kîr nôk a ta, khua lût viat no ni. Rengpa thu suakin a ti.

³⁴ Hi khua hi keima le ki siahlo Davida sikin hrung ki ta, ki inzôk hrang a ni,” a tia.

³⁵ Kha zâna khan, Rengpa tirtôn chu Assuria hai tuala khan a fea, mi nuaikkhat le sîngriat a thathaia, zînga an thoiin chu mi ruakin a sip zit tâka.

³⁶ Assuria le Senakeriba chu an chîna, Ninevi khuaa an om ta.

³⁷ Nisroka tempila Pathian a biaka, a kûn lai takin a nâipa Andramelek le Sarezera haiin khandaiin an tuk thata, Ararat rama an rotsan tâka. A nâipa Esarhadona chu ar thûlin an lal nôk ta.