2 RÊNGHAI 14 - PATHIAN LEKHABU IRTHIANG C.L. Bible (BSI)

Juda rêng Amazia

¹ Jehoahaza nâipa Jehoasa chu Israel rêng nih a ta, kum hninaa khan Joasa nâipa Amazia chu

² kum sômhni ringa mi a niin Judai rama rêng a changa, Jerusalema kum sômhni kum kuak an lala, a nu chu Jerusalem khuaa mi Jehoadini a ni.

³ Rengpa mithmua sin a thoa, a pu rêng Davida ang dôr a ni no khomin, a pa Joasa ithohai anga tho theiin a oma.

⁴ Nam dang pathian an ibiakna hmunhai chu insiat ual maka, mipuihaiin thilinhlanin rimhoi an la hâl mai ngai a ni.

⁵ Amazia an lal det ata chu, a pa thattuhai a thathaia.

⁶ An nâihai chu thathai ma; Mosia dân bua Rengpa thupêk, “Nâihai chu an pahai sual sika thathai hrang ni ma, an pahai khom nâi sual sikin that hrang ni ma, mi tin mâni sualna sik vaiin kêng that an ini hrang ti kha a izôm a ni.

⁷ Amazia chu michi suakna hmuna, Edom mi in sûngkhat a thathaia, Sela khua a doia an hnêhaia, ar hming khom Joktheel tiin a phuaa, atûn ten hi khua irhming a la ni mai.

⁸ Amazia chu Jehoahaza nâipa Jehoasa, Israel rêng kuang palai a tîra, “Pasal le pasal ir-en ei ti,” a tia.

⁹ Israel rêng Jehoasa’n Judahai rêng Amazia chu chong an thuana, “Lebanon tânga thing saiso kôla khan, ni nâinu kha ki nâipa dôngma hrangin ni pe ro, a tia. Ramsahai hin thing sûlhnahai hi an isir siat zoi hrang nêkin chu, a tia.

¹⁰ Edom-hai kin hnê ta ni tia, ni irsorpui ok mani ta; lunghoi takin in sûnga irngam chian ta ro, nangma le Judai ram siatna hrang buaina kêlsua ta no ro,” a tia.

¹¹ Amazia’n ite bê’n bê maka, Israel rêng Jehoasa chu ar siam irfôk nôka, Juda khuaa khan, pasal le pasal an irtong tâka.

¹² Judahai chu dokin, an in tiang an rot tâk a ni.

¹³ Israel rêng Jehoasa’n Juda rêng Amazia chu Beth-Semes-a khan an chela. Jerusalema an hruaia, kul bang Efraima inkhâr ata kul lampui kôina inkhâr dênin, mûk irzaminli tena hla chu an siata.

¹⁴ Rengpa tempil sûng le rêng sum siana in tangka le rângachak bêl le bûrhai a lâka, Samari khua tiang panin an fe tâka.

¹⁵ Jehoasa sintho dang, a roiinpuina; Juda rêng Amazia leh an irdoina thuhai chu Israel rênghai thurchi irziakna lekhabua a chuang.

¹⁶ Jehoasa chu a thia, Samari khuaa rênghai thâna an phûma, a nâipa Jeroboama inhnina chu ar thûlin an lal nôk tâka.

Juda rêng Amazia thina thu

¹⁷ Israel rêng Jehoahaza nâipa Jehoasa thi hnungin Amazia chu kum sômhlei ringa a la dama.

¹⁸ Amazia sintho danghai chu Juda rênghai thurchi irziakna bua a chuang.

¹⁹ Jerusalema, Amazia chu an khita, Lakis khuaa an tâna; khannisian a râlhaiin an irzûla an thatpai ta.

²⁰ A ruak chu Jerusalem tiang sakorin an pêla; Davida khopuia, rênghai thâna an phûma.

²¹ Judai ram mihaiin a nâipa kum sômhleiruka, a nâi Uzia chu a pa Amazia irthûlin rêng an inchanga.

²² A pa thi zoiin Uzia’n Elat khua chu Judai ram an changtira, a isiam insa nôk a ni.

Israel rêng Jeroboama inhnina

²³ Joasa nâipa Amazia chu Juda rêng kum sômhlei ringa a ni kumin Jehoasa nâipa Jeroboama inhnina chu Israel rêng a nia. Samari khuaa kum sômminli an lala.

²⁴ Rengpa mithmua thilsual a thoa, an pu Nebata nâipa Jeroboama thilsual tho, Israelhai a hruai insualna chu masan nuam maka.

²⁵ Israel ram lei ni ngai, Hamath fena tianga tuipui thi kâra ram chu a lâk kîr nôka. Kha ram kha a siahlo Gath Hoper mi Amitaia nâipa, deipu bâia Rengpa Israelhai Pathianin a insîr kha a ni.

²⁶ Israelhai ituang intak lam chu Rengpa’n a hmua, khit thung irkhol loi reng om mahaia, tûte changpuitu nei mahaia.

²⁷ Rengpa’n Israelhai chu insiathai chit chu tum maka, a sanhai hrangin Jeroboama inhnina hi a zuang ihmang nôk a ni.

²⁸ Jeroboama sintho dang murdi chu, irdoina hmuna a hâi lam le Damaska le Ferkânna Hamath, Israelhai ram a ilâkna thuhai chu Israel rênghai thurchi irziakna lekhabua a chuang.

²⁹ Jeroboama chu a thia, Samari khuaa rênghai thâna an phûma, a nâipa Zakaria chu a’rthûlin an lal nôk tâka.