2 PETERA toc2 2 PETERA 2 - PATHIAN LEKHABU IRTHIANG C.L. Bible (BSI)

Deipu dol le irchutirtu dikloi

¹ Mipuihai laia deipu dol an iom ngai ang khan nangni laia khom irchutirna dikloi la hong om a ti; mi insiat thei irchutirna dikloi inrûkin la hong lûtpui an ta; Inlaltak anni irtantu kha, hnôlin mâni siatna inrang takin intungtir an ti.

² An omlam intirom tak chu mihaiin hong zui an ta, anni sika khan thutak lampui hi hrilinsiatna ni a ti.

³ Sum an hmu theina hrangin huatirham takin an thu phuachôp khan bepârna hrangin nangni an hmanga; khannisianlân, tiana an chunga roirêl sai tâk chu om chian chian no ni, anni irhmangtirtu hrang kha a ihar chian tâk a ni.

⁴ Vântîrtônhaiin thilsual an tho lai khan Pathianin hôihai ma, hremhmuna a paia, Roirêl Ni nghâk hrangin khura inthima khan an iom tâk a ni.

⁵ Tianlai rammual khom hôi ma, rammual sual tak chunga tui an lêttira khom khan, Nova, felna thu’npuangtu le mi dang sari vai an izôk a ni.

⁶ Sodom le Gomora khua khom a’rvuttir chita, Pathian uksak loihai a ihrem lam hrang entîrna hrangin a insiat chittir a ni khate.

⁷ Lota, mi fel, mi sualhai omlam a sâna poi ti ngaitu kha a sansuaka,

⁸ Kha mi satak kha an laia om sa ngai a nia, an thil tho’nsual a hmu le a inhriathai chu a sân a milung an natir ngaia.

⁹ Rengpa khan ama chituhai chu tuangna ata sansuak lam le roirêl Ni a zuang tung mâna khom mi sual hrem lam an hriat;

¹⁰ an takpum irzukna porinche anga omhai le Pathian irchamneina hmusittuhai len vâng chu hremna lam an hriat nôk ual. Hi irchutirtu dik loihai hi an invêtin an hâia, an lârirpâka, irvân mi roiinpuihai khom khi mahrip tho loiin an hrilinsiat ngai a ni.

¹¹ Anni nêka hrât le sinthothei ual vântîrtônhai khomin, Rengpa makunga hi mi roiinpuihai chungchâng an insîrin chong siat hmang ngai mahai.

¹² Khannisian, hihai hi ngaituana nei loi, ramsa, chela that zôi hranga zuang suakhai ang hi an ni, an inhriat thiamloi murdi an hrilsiata, ramsahai anga that ni an ti,

¹³ an sual man kha tuang an ti. Sûn sosôta a hoihôkna uar ngai an ni, nin laia mi intirom le mi porinche irphûm an nia, nin hruaithêna an hong kopa hin nangni an ihuang a ni.

¹⁴ An mitin uire hrang an en vêl maia, sual tho hnông thei mahai. An lungrîla huatirhamna lam a sân an inhriata, Pathian khosâl tong an ni.

¹⁵ Lampui dik an pêtsana, an irhmang ta. Beora nâipa Balaama lampui an zui ta. Ama khan chu thilsual tho an lâp takin ar hriata.

¹⁶ Khannisian, a tho’nsualnaa khan halirchu’n a om tâka, sakuartung chong theiloi chu mihriam angin a hong chonga, deipu invêtna chu inmongtir a ni ta.

¹⁷ Kha kha tuikuang tui om loi le sûm phâivua’n a isêmpai ang an ni; khahai ta hrangin chu Pathianin hmun inthim inthûk tak kha a sia pehai ta.

¹⁸ Thu chanlamboi uar tak taka hrilin, suala omhai laia irthoka intân suak lai takhai chu taksa irzuknaa intiromna an inthêm inhnêhai ngaia.

¹⁹ Anni sual suaka om chianin mi zalênna pe hrangin an inkung ngai, tu mihriam khom ama inhnêtu suaka chu a iom a ni.

²⁰ Rengpa le Saninhringtu Jisua Krista an inhriat sikin rammual porinchenahai an intân suaksan hnungin kha dêna khan intân nôk an ta, inhnê nôkin an omin chu, a phuta nêkin inhnunga an dinghmun kha chu siat ual tak ni a ti.

²¹ Lampui fel inhriat hnunga thupêk irthiang an kuang inkoltir kha chu irheisan nêkin chu lampui fel inhre no sianlân a ta hrangin a isa ual hrang a ni.

²² An om lam ata hi, hi thuvâr dikzia hi an lang infel ok: “Ui chu a miluak a fâk nôka,” ti le “Vokpui dialdôka a irbual nôk ngai,” tihai hi.