2 PETERA toc2 2 PETERA 1 - PATHIAN LEKHABU IRTHIANG C.L. Bible (BSI)

Chubai mûkna

¹ Jisua Krista suak le tirtôn Simon Petera khan, a ni saninhringtu Jisua Krista zâra le ei Pathian felna zâra iamna kin idong ang donghai chubai ki mûk.

² Pathian le ei Rengpa Jisua nin inhriatnaa lungkhamna le irngeina nin chunga inpungin om ri se.

Pathian koina le inthangna

³ A roiinpuina le a satna dong hranga ni koipu ei inhriatna sika, sakhua diktak hringnuna ei om theina hrangin, thil ei innang murdi Pathian sinthotheina lianin a ni pêk ta.

⁴ Khanchu; thilpêk roiinpui tak le hlu tak a inkung chu, a ni pêk tâka, khasika khan rammual irzukna, a nin siatthei ata nin suaka, Pathian zia nin irkoppui thei tâk a ni.

⁵ Hi sika hin thei dôr insua nin iamnaa khan satna inkoptir unglân, nin satnaa khan inhriatna,

⁶ nin inhriatnaa khan mâni irsepna, mâni irsepnaa khan diarna,

⁷ nin diarna khan Pathian uksakna, Pathian uksaknaa khan urênghai inrenna, nin urênghai inrennaa khan lungthungna chu bôk sa roi.

⁸ Hi nitna hi nin innang a ni, kha kha chu nin neia, a pung maiin chu ei Rengpa Jisua Krista nin inhriatnaa takirtâi tak le poimo takin nangni siam a ti.

⁹ Kha thil nei loihai chu mitcho, hmu irzat loi, an tianlai sual irsûkinfâi pe an nih ti irnghil tâkhai an ni.

¹⁰ Khanchu, urênghaio, nangni a ikoina le nangni a inthang hi inlangtir hrangin theidôra takirtâina insua’n, det takin ngîr roi; khaanga ngîrhai chu itiklai khomin tûk siat no nihai.

¹¹ Khanchu ei Rengpa le saninhringtu Jisua Krista kumtuang rama lôm takin nangni inlûttir a ti.

¹² Khasikin thutak nin inhriata khan det takin om ta khom unglân, hi thu hi nangni inhriat nontir mai ki inuam a ni.

¹³ Khan, hi takpum ki’rput sûng hin chu hi thuhai nin inhriatna kha inhar thiai mai hrangin nangni ki nuam a ni.

¹⁴ Ei Rengpa Jisua Krista’n a ni ihril angin hi ki takpum hi ki isuaksan lat ta hrangin ki irhriat a ni.

¹⁵ Ki suaksan hnung khomin, itiklai khoma hi hi nin inhriat mai theina lam nangni siam pe hrangin thei dôrin irnak ki isong a ni.

Krista roiinpuina mit ngeia hmutuhai

¹⁶ Ei Rengpa Jisua Krista, sinthotheina le, a izuang nôkna thu nangni kin ihril lai khan thonthu phuachôp mai mai nangni hril ni ma ung, a roiinpuina chu mit ngeia hmutuhai kin ni.

¹⁷ Pa Pathian kuang ata chôiindômna le roiinpuina a dong lai khan, Roiinpuina Irsângtak kuang ata irhâi a zuang suaka, “Hi hi ki Nâipa lungthungtak a chunga ki lôm tak tak a ni,” a zuang tia.

¹⁸ Kha hnuk irhai, irvân ata zuang chum kha, keini khom tâng irthianga a kuang kin om lai khan kin inhriat a ni.

¹⁹ Deipuhai thu lei inpuang kha a dik ngêt tih keini khomin kin pom indet uala, nangni khomin, Vârpâr Ârsi a zuang inlang mân vâr angin, kha thu kha nin milunga invârtu hmang unglân sa a ti.

²⁰ Pathian Lekha thua lei hrilna thuhai hi mâni ngaidân ringota hrilfia hrang ni mah ti inhre masa phot unglân.

²¹ Lei hrilna rêng rêng hi mihriam thua suak ni maka, Irtha Irthiang hruaiin Pathian kuang ata an insîr ngai a ni.