2 KORINTH 3 - PATHIAN LEKHABU IRTHIANG C.L. Bible (BSI)

Thuthung Thar sinthotuhai

¹ Mâni irhril insa ei iphut nôk mani ta rêk? A ninole, mi danghai ang dênin irhril insana lekha ei ichôi mo, nin kuang ata kin ilâk mo a inang ta ma ni?

² Nangni hi kin lekha, kin milung sûnga irziak, mi tin inhriat le tep kha nin ini kêng.

³ Nangni hi Krista lekha, keini a ni irziaktir, lekhatuia irziak ni loi, Pathian hring Irthaa irziak a ni, lungphêka irziak khom ni maka, taksa milung phêka irziak nin nih ti an lang infel a ni.

⁴ Krista zârin Pathian kuang iamna kin nei sikin kha kha kin iti a ni.

⁵ Keini ringotin chu chuk ma unga, keini itho anga insîr hrang ite om mah, kin ichukna chu Pathian ni ipêk a ni.

⁶ Ama khan Thuthung Thar sintho inrukin a ni siama, kha kha, Dân, horopa irziak ang kha ni maka; Thuthung Thar, Irthaa irziak kha a ni. Dân, horopa irziak khan, thina an tungtira, Irthaa chu hringna an tungtir a ni.

⁷ Mosia hmêl boi nôk zôi hrang lua Israel nâihaiin an ien mai thei loi dôrin a roiinpuia; lung horopa irziak, thina intungtu sin thôna lua, khaang taka roiinpui a ni’n chu,

⁸ Irtha sinthôna kha a iroiinpui ual hrang mo ni mah?

⁹ Thiamloina intung ngai dân lua mina a roiinpuiin te, saninhringna intung ngai sinthôna kha idôra roiinpui ual mo a ini hrang!

¹⁰ Roiinpuina vâr ual ok sika khan zoro thenga roiinpuina vâr kha chu om mah kin ti thei.

¹¹ Kha zoro sôtloitea lua khan roiinpuina a omin te, kumtuanga hrang vânga kha teh idôra roiinpuina lian ual mo a iom hrang tâk!

¹² Kha tûngna kha kin nei sikin kin ihâi a ni.

¹³ Keini chu Mosia ang khan ni ma ung, ama khan vâra chuai tîr tîr boidipna kha Israel mipuihaiin an hmu loina hrangin a hmâi kha irkhuna’n a’rkhûa.

¹⁴ A dik takin, an milung sûng kha ar khâr a ni, a vuan sûn ten khoma hin Thuthung Lui an tepin chu kha irkhûna ngêt khan an milung sûng ar khu ngai.

¹⁵ A vuan sûn ten khoma hin Mosia Dân an tep rikipin irkhûna khan an lung sûng a la’rkhu mai ngai.

¹⁶ Khannisianlân, Rengpa tiang an irnghat tika chu, kha irkhûna kha pai ni ta a ti.

¹⁷ Hi hmuna “Rengpa” ti hi chu Irtha a nia, khante, Rengpa Irtha omna tina chu zalênna a om ngai.

¹⁸ Keini chu kin rêngin hmâi irkhu loiin Rengpa roiinpuina chu kin inlangtira, roiinpui ata roiinpui ual ual hrangin, ama irangpuia om hrangin, irthiangtir mai ei ni, kha kha Rengpa ti a ni, ama kha Irtha a ni.