2 JOHANA 1 - PATHIAN LEKHABU IRTHIANG C.L. Bible (BSI)

Chubai mûkna

¹ Upa’n chu Nupang sa, Pathian inthang le a nâihai, thutaka ki lungthunghai chubai ki mûk. Keima vai khom ni loiin thutak inhretu dang murdi khomin lung nang an thung;

² thutak, ei nia om mai, kumkhua’n ei kuang a om hrang sikin.

³ Thutak le lungthungnaa khan Pa Pathian le Pa Nâipa Jisua Krista kuang ata lungkhamna hai, za’rngaina hai, irngeina hai kha ei kuang om a ti.

Thutak le lungthungna

⁴ Pa’n thu a ni ipêk anga ni nâi tuhai mani thutaka an om ki hmu sikin ki lôm tak tak a ni.

⁵ Nupang sa, thupêk thar ni loiin a phut ata ei idong kha nang hril hrangin ki irziak a ni: “Lungthung irhlôm seng ei ti,” ti nang ki ngên a ni.

⁶ A thupêk ang dêna ei iom hi lungthungna chu a ni; hi hi a thupêk, a phut ata nin inhriat tâk kha a ni, “Lungthungnaa nin om mai hrang a ni,” ti hi.

⁷ Mi huang ngaihai, Jisua Krista chu taksa irputin a zuang ti pomloihai, rammuala an hong suak tâka, khaang mihai kha huangtu le Krista doituhai an ni.

⁸ Khasikin nin itho suak tâkhai inchân loia lômman ar kipa nin hmu theina hrangin, mâni ir-enkol insa roi.

⁹ Tukhom Krista irchutirna thua om loia a khêlin chu Pathian nei mah. A irchutirna thua om mai chu Pa le Nâipa a inei irkop tâk a ni.

¹⁰ Kha irchutirna kha kop loia nin kuanga hong chu tukhom nin ina intungtir no unglân, chongbâi sa khomin lei chongpui no roi.

¹¹ Chongbâi saa lei chongpuitu chu thil tho’nsuala khan a ikop sa a ni.

Inthâna chubai

¹² Nin kuang thu tamtak insîr hrang nei khom inlân, lekha le lekhatuia irziak tum ma ung; ei lôm ar kip theina hrangin ni kuang honga, hmêl irhmua nang chongpui ki inuam ual a ni.

¹³ Ni zuarpuinu inthangnu nâihai khan chubai nang an mûk sa a ni.