2 TIMOTHEA toc2 2 TIMOTHEA 4 - PATHIAN LEKHABU IRTHIANG C.L. Bible (BSI)

¹ Pathian le Krista Jisua, mithi le mi hring roirêltu hrang makunga a zuang nôkna le a ram inhriatin thu nang ki pêk.

² Thu chu hril roh, zoro saa khom, zoro saloia khom, bei mai roh; tuangdiar taka irchutir pumin an dikloina irhmutirin lân, halirchu’n lân, inthor roh.

³ Irchutirna hrisêl irngai nuam sabak loiin an nuamlam vai irngaiin an mikuar lût lam anga irchutirtuhai vai an koibuk zoro la tung a ti.

⁴ Thudika an mikuar sungloia, thonthu mai mai irhnikpui an ti.

⁵ Nang chu itinrênga irsepin lân, tuang zâm zâm roh; Thurchi Sa hrilna sin hi sin maiin lân, ni sinthôna sin kha sua roh.

⁶ Kei chu inhlan hranga ti ki ni ta, rammual ata ki fe suak zoro a tung ta.

⁷ Intân irsiatna sa kha chu ki zoi tâka, ki’rhlanna hranga kin tân suaka, iamna kha ki ivong chian a ni;

⁸ atûn chu, thiamchangna, chôiindômna lukhum kha, dong hrang vai ki hmabâk a ni ta; kha kha roirêl dik, Rengpa khan, kha Nikhuaa khan ni pe a ta, keima vai ni loiin ama lungthunga, a zuang inlang nôk lei nghâkhai murdi kuang khom pe sa a ti.

Mimal thu

⁹ Ki kuang hong lat hrang hi lei tum zêl ta roh.

¹⁰ Dema khan atûnlai rammual a’rngaiinnat sikin Thesalonika khua tiang a ni rotsan ta, Kreskea khom Galatia rama a fe ta, Tita kha Dalmatia rama a fe sa.

¹¹ Luka vaiin a ni ompui. Marka kha, sintho lama ni thoptu satak a ni, hong hruai roh.

¹² Tukika chu Efesi khuaa ki tîr ta.

¹³ Ni hong tika chu Troas khuaa Karpa kuang ki songkol irfual hong mâk kha hong lan lân, ki lekhabu le, savun lekhahai len vâng kha chu hong chôi ngêt roh.

¹⁴ Alexander, dâr thîrsu kha ki chunga a sual tak tak ngai; a sintho ang takin Rengpa’n thuan a ti.

¹⁵ A kuang nang khom irdîn takin om ngai roh, ei thu’nsîr a idoi tak tak ngai kêng.

¹⁶ Ki thiamna thu kin sîr phut laia khan tûte’n ni changpui maka, anni imâk zit a ni; Pathianin mô chu inphurtir no ri se.

¹⁷ Khannisian, Thurchi Sa kha Jentailhai ta hranga kin sîr irkip theina hrangin Rengpa’n a ni ompuia, hrâtna a ni pêka, thi hrang tâk a ni ikêlsua nôk a ni.

¹⁸ Rengpa’n sualna tinrênga irthokin ni kêlsua a ta, a vân rama khin hoi takin ni hruai a ti. Roiinpuina kha a kuang kumtuangin om mai ri se! Amen.

Inthâna thu

¹⁹ Priskili le Akuila le Onesifora in sûng mihai kha chubai ni hong mûk pe roh.

²⁰ Erasta kha Korinth-ah a la oma, Trofima chu a damno sikin Mileto-a ki mâk.

²¹ Phalbi mân hong tum ngêt roh. Eubula hai, Pudea hai Lina hai, Klaudi hai le urêng murdi’n chubai nang an mûk.

²² Rengpa kha nir tha kuang om ri se. Pathian lungkhamna kha nin rênga kuang om ri se.