2 TIMOTHEA toc2 2 TIMOTHEA 1 - PATHIAN LEKHABU IRTHIANG C.L. Bible (BSI)

Chubai mûkna

¹ Paula, Krista Jisuaa hringna om inkungna thu insîrna tianga Pathian lungdoa Krista Jisua tirtôn khan

² Ki nâi lungthung tak, Timothea kuanga: Pathian ei Pa le Krista Jisua ei Rengpa khan lungkhamna hai, irngeina hai ni kuang om ri se.

Thurchi Sa iamom

³ Sûn zâna ki chongchaina haia zoro tin nang kin hriat mai ngai sikin irchibulhai ata le sa inhriatna irthiang tak neia a sin ki tho ngai Pathian kuang lômthu kin sîr ngai.

⁴ Ni mitrithîhai khom kin hriat maia, raifân taka irhmu nôk a sân ki’rzuk.

⁵ Ni iamna detzia khom kin hriat mai ngai, ni pi Loisi inei le ni nu Euniki khomin a inei kha nang khomin ni nei a nih ti kin hriat.

⁶ Kha sika khom khan ni chunga kut ki’rnghat laia Pathian thilpêk ni idong kha sêm ir-al mai hrangin nang hril nôk ki inuam a ni.

⁷ Pathian Irtha ei idong hin nin dôptir maka, hrâtna hai, lungthungna hai, mâni irseptheina hai a ni ipêk a ni.

⁸ Ei Rengpa thu hi inpuang inzak no roh, ama sika lung in intâng khom hi nin zakpui ual no roh; Pathian hrâtna tûngin Thurchi Sa sika intak irhuam ual roh.

⁹ Ei sintho sika ni loiin ama tum dân a ni ual sikin lungkhamna’n a ni saninhringa, irthiang taka hring hrangin a ni ikoi a ni. Krista Jisuaa khan irnêng irsiang mân daiha a lungkhamna kha a ni pêk tâka.

¹⁰ Khannisian atûn hin, a ni saninhringtu Krista Jisua a zuanga khan, kha kha a hong inlang lik tâk a ni. Ama khan thina an hnê tâka, Thurchi Saa hin hringna le thi theiloina a hong inlang tâk a ni.

¹¹ Kei hi kha Thurchi Sa inpuang hrangin Pathianin tirtôn le irchutirtu hranga inkung ki ni.

¹² Khasika khan kêng atûn khom hianga ki ituang a ni; khannisian inzak ma ung; ki iiam chu kin hriat, ki inkoltir kha, kha Nikhua khan, a vong insa indik tih kin hriat.

¹³ Ki kuanga ta ni inhriat ngai irchutirna hrisêl kha a sân zômin lân, Krista Jisua iamnaa le lungthungnaa khan om ngit roh.

¹⁴ Ni chunga irnghat, thilpêk roiinpui tak kha, einia a om ngai, Irtha Irthiang hmangin a sân vong insa roh.

¹⁵ Asia rama om mi murdihaiin an ni mâk ti nin hriat, Fugela le Hermogena hai dênin, an nir heisan ta ti nin hriat.

¹⁶ Rengpa’n Onesifora in mihai kuanga lungkhamna pe ri se; anni khan voi iza an nin lômtira, lung ina ki intâng hi nin zakpui loiin.

¹⁷ Rom khuaa a zuang tung le a ni hong zong suak kher a ni. Efesi khuaa khom a sân a ni changpui intamzia nin hriat infela,

¹⁸ Rengpa khan kha Nikhuaa khan a lungkhamna kha indongtir ri se! Efesi khuaa ki ta hranga sin a ithozia khom nin hriat infel a ni.