2 THESALONIKA toc2 2 THESALONIKA 3 - PATHIAN LEKHABU IRTHIANG C.L. Bible (BSI)

Ni chongchai pe roi

¹ A mong taka chu, urênghaio, ni chongchai pe roi. Rengpa thu kha nin laia roiinpui tak le hrât taka a indarh ang khan an darh mai theina hrang le,

² mi dikloi le mi sualhai ata ei zôk theina hrangin. Mi murdi’n la iam mahaia.

³ Rengpa chu iam a oma, ama khan nangni an hrâtin mi sualhaia irthokin nangni inzôk a ti.

⁴ Thu nangni kin ipêk angin nin zôma, nin izôm mai khom Rengpaa khan kin iam ngit a ni.

⁵ Rengpa khan nin milunghai kha Pathian lungthungna inhre nôk ual hrang le Krista anga tuangdiarna nei hrangin kaihruai ri se.

Thaboi loi hranga inthorna

⁶ Urênghaio, kin irchutirna thu zui nuamloia irthaboi taka om urênghai ata irkiang hrangin ei Rengpa Jisua Krista irhmingin thu nangni kin pêk a ni.

⁷ Kin isin lam takin nin isin hrang a nih ti nangni rengin nin inhriat infel. Nin laia kin om laia khan kin irtha inboi ngai ma ung.

⁸ Tu bu khom manboiin ne ngai ma ung, nin laia mi tûte deng kin intheitir loina hrangin sûn le zân sinin kin isôl a ni.

⁹ Kin thei no sika ni maka, nin entonna hranga tho kin ni ual ngai a ni.

¹⁰ Nin kuang kin om laia khan, “Sin tho nuamloi murdi’n chu fâk khom fa no ri se,” tiin nangni kin hril ngai kha te!

¹¹ Nin laia senkhat an irthaboiin, chiar ti no chu ite tho loiin an om tih kin inhriat sikin kha kha kin iti a ni.

¹² Khaang mihai kha sin tak taka mâni itho suaka irnghat hrangin Rengpa Jisua Krista irhminga thu pêkin kin inthorhai a ni.

¹³ Urênghaio, nangni’n chu sin sa sin hnông no roi.

¹⁴ Khan, tukhomin hi lekha thona kin thu nangni inpêl hi a zôm no’n chu an zak theina hrangin irsinsiahai unglân, irpôlpuihai viat no roi.

¹⁵ Aniachu, râl angin chu bêhai no unglân, urêng angin irchutirhai ual roi.

Chong hnungkhôn

¹⁶ Irngeina Rengpa ngei khan kumkhua’n lam tinrênga irngeina nangni pe sianlân, Rengpa kha nin rênga kuang om ri se.

¹⁷ Kei Paula’n keima kut ngeia chubai nangni ki imûkna a ni. Hianga ki irziak hi ki lekha thon murdi irsinsiana a ni.

¹⁸ Ei Rengpa Jisua Krista lungkhamna kha nin rênga kuang om ri se.