2 THESALONIKA toc2 2 THESALONIKA 2 - PATHIAN LEKHABU IRTHIANG C.L. Bible (BSI)

Dân insiatpa

¹ Urênghaio, ei Rengpa Jisua Krista zuang nôkna le a kuang ei inkhômna hrang thua khan.

² Irthaa insîr mani, thuhril mani, kin lekha sikin mani sirsana, “Rengpa nikhua kha a tung mai ta,” ti thu’nthang sika nin lungrîl inthinga inbuai loi hrangin nangni ki ngên.

³ Tukhomin i lampuia khom nangni hruai irhmang no ri se. Pathian ata tehelna chu a hong tunga, Dân insiatpa, Irhmang hrangpa kha, a hong inlang mâka chu kha Nikhua kha hong tung no ni.

⁴ Ama’n chu mihaiin Pathiana an inei, an ibiak murdihai kha doi a ta, anni nêka roiinpuiin irbe a ta, Pathian Tempil ngeia toiin Pathianin irbe a ti.

⁵ Nin kuang ki om lai khan, kha khan kha thu kha kin ihril ngai kha inhre mak chêi mo?

⁶ A zoro taka a hong tung theina hrangin atûn hin i’n mo nangni a ikhâlin nin inhriat?

⁷ Dân insiatna khan atûn khom inrûkin a la tho mai kêng; khannisianlân, a khâltu kha lâkpai a ni mâka chu hong inlang lik no ni.

⁸ Kha zoro tika chu Dân insiatpa kha hong inlang a ta, khannisian ama kha Rengpa Jisua’n hong that a ta, a zuang nôkna roiinpui taka khan zuang irhmangtir a ti.

⁹ Dân insiatpa kha setana hrâtnaa hong, sinthotheina tinrêngin sinirkhêl le thilirkhêl korong ni a ti.

¹⁰ Kha irhmang hranghai kha dikloi takin lam tinrênga huang ni a ta, anni saninhring thei hrang Thurchi Sa thutak kha an lôm no sikin.

¹¹ Khasikin, milak an iam theina hrangin Pathianin an laia huangna hri an lêngtira.

¹² Thutak iam loia fel loina lôm ualhai murdi’n thiamno an ichang zit hrang a ni.

Saninhring hranga inthang nin ni

¹³ Urêng, Rengpa indit takhaio, nangni sikin Pathian kuang lômthu hril mai hrang rêng ei ni; Irthaa irthiangtirin, thutak iam hrang le ra masa hrangin saninhring hrangin Pathianin nangni a inthang a ni.

¹⁴ Kha hranga khan ei Rengpa Jisua Krista roiinpuina changna hrangin ei Thurchi Sa hril hmangin nangni a ikoi a ni.

¹⁵ Khasikin urênghai, ngîr indet unglân thuhril le lekha thona thutak nangni kin irchutirhai kha intûk indet ngit roi.

¹⁶ Khanchu, ei Rengpa Jisua Krista, Pathian ei Pa, lung ni thungpu, a lungkhamna sika kumkhua’n irtharngamna le sabeina sa ni pêktu khan,

¹⁷ nin lungrîl irtharngamtir sianlân, thil sa tinrêng nin itho le nin insîra khan nangni inhrât mai ri se.