1 SAMUELA 8 - PATHIAN LEKHABU IRTHIANG C.L. Bible (BSI)

Mipuihaiin rêng nei an nuam

¹ Khanchu hiang hin a hong ni ta, Samuela kha a hong tar tena chu a nâipasalhai kha Israelhai laia roirêltu’n a siamhaia.

² A nâi ulian irhming chu Joela a nia; a nâipang ual chu Abija a ni; Beer-seba khuaa roirêltu an ni.

³ Khannisianlân, anni khan an pa omdân zui loiin, sum le puan tiang an huatirhama, khasikin fâk inrûkhai an hmanga, dik loi takin roi an rêl ngaia.

⁴ Khanchu Israelhai laia hruaitu murdi an irbûma, Rama khuaa Samuela kuang an fea;

⁵ a kuang, “En ta, ni hong tar ok tâka, ni nâipasalhai lakin ni omdân kha zui thei mahaia, khasikin nam dang murdihai anga kin chunga roi ni rêl pe hrangin rêng ni siam pe ro,” an tia.

⁶ Khannisianlân a kuang, “Roi ni rêl pe hrang rêng ni pe ro,” an iti thu khan Samuela chu lôm thei rak maka; khanchu Rengpa kuang a chongchaia,

⁷ Rengpa khan Samuela kuang, “Mipuihaiin ni kuanga an iti hi irngai ro; nangma nang an indit loi ni maka, an chunga rêng chang hrangin keima hi an ni indit loi a ni.

⁸ Aigupta ram ata ki hruai suakhai nî ata atûn tena an thil tho dân murdi, hnung ni songsana pathian dang sinhai an itho ngai ang dênin, ni chunga an itho a ni hi,

⁹ khasikin an thu kha irngai ro. Khannisian irningna thu ngartak pehaiin lân, an chunga rêng roirêltu chang hrang dân fel takin insîr pehai ro,” a tia.

¹⁰ Samuela khan Rengpa thu murdi kha rêng hong zongtu mipuihai kha an sîr pehai vinga.

¹¹ “Nin chunga roirêltu hrang rêngin nangni a ilo hrang chu hiang hin ni a ti. Nin nâipasalhai kha sipaiin siamhai a ta; senkhat chu râlhai tâlia, senkhat chu sakor chung chuang mi, senkhat chu tâlihai matona intân hrangin hmang a ti.

¹² Senkhat chu sipai sângkhat hruaitu, sômringa hruaitua nangni phun a ta; senkhat chu ama loia irnêng pil tuk nin ta, a bu ât hrang le irdoina hmang hrang râltukfam siamtu hranghai, a tâlia hmangrua siam hrang leh khan nangni hmang a ti.

¹³ Nin nâinupanghai kha ama hrangin mirimhoi siamtu, bu an suangtu le bai siamtuin hmanghai a ti.

¹⁴ Ama’n nin loihai, nin grep irhuanhai, nin oliv bilhai, a sa u ualhai nangni lapai pe a ta, a mi lianhai pehai a ti.

¹⁵ Nin bu le nin grep irhuana mi sôma inkhat nangni la pe a ta, a mi lianhai le hruaituhai pehai a ti.

¹⁶ Nin suakhai le nin sâhai le nin sakuartunghai a sa u ual nangni la pe a ta, a sin thôna hrangin hmang a ti.

¹⁷ Nin kêlbelra pâla mi sôma inkhat nangni la pe a ta, nangni zel kha a suak chang nin ti.

¹⁸ Kha tena chu nin la inthang hrang rêng hrangin lan rung nin ta; khannisianlân, kha tika khan chu Rengpa’n nangni san ta no ni,” a tia.

¹⁹ Nikhomsianlân, mipuihaiin Samuela thu kha pom nuam mahaia, “Ni ma, rêng kin inei ngêt hrang a ni;

²⁰ khan kêng nam danghai angin kin hong iom hrang; kin rêngin roi ni rêl pe a ta, kin râl doihai ni doipui a ta,” an tia.

²¹ Samuela khan mipuihai thuhril kha ar ngaia, khanchu a fea, Rengpa an hril tâka.

²² Rengpa khan Samuela kuang, “An thu kha pomin lân, rêng phun pehai ro,” a tia. Khanchu Samuela’n Israel mihai kuang khan, “Mi tin mâni kho sûnga fe nôk ving ta roi,” a tia.