1 SAMUELA 7 - PATHIAN LEKHABU IRTHIANG C.L. Bible (BSI)

¹ Khanchu Kiriath-jearim kho mihai kha an zu fea, Rengpa Thuthung Bôm kha tâng chunga, Abinadaba ina an chôi lûta, a nâipa Eliazara kha Rengpa Thuthung Bôm enkoltu hrangin an inthanga.

Samuela’n Israel chunga roirêlna

² Rengpa Thuthung Bôm kha Kiriath-jearim-ah khan zoro sôttak kum sômhni dênin a oma. Kha sûnga khan Israel mi murdihai khan Rengpa irngaiin an chap ngaia.

³ Khante Samuela khan Israel mihai kuang khan, “Nin lungrîl taka Rengpa tiang nin irnghat tak takin chu, ram dang pathianhai le Asterothi pathiannuhai millim kha nin lai ata pai ving roi. Nin lungrîl kha Rengpa ta hrangin sinsiam unglân, ama sin vai tho roi; khanchu Filistia-hai kut ata hi nangni a isansuak hrang a ni,” a tia.

⁴ Khanchu Israel mihai khan an Baal millimhai le Asterothi millimhai kha an pai vinga, Rengpa sin vai an tho tâka.

⁵ Kha hnung chu Samuela khan, “Israel mi murdihai chu Mizpa khuaa koibûmhai ving unglân, Rengpa kuang nangni chongchai pe ki ti,” a tia.

⁶ Khanchu Mizpa-a khan an irbûm tâka, tui an chôia, Rengpa kuang thilinhlanhai an bunthuana, kha nî khan chu a sûn nitungin bu an ngheia. “Rengpa chunga khan kin lei isual tâk a ni,” an tia. (Mizpa-a khan a ni Samuela’n Israelhai roi a irêl pehai.)

⁷ Filistia mihai kha Israelhaiin Mizpa-a khan an irbûm ti an inhriatin chu Israel mihai doi hrangin Filistia rêng ringahai kha an hong irthoka, Israelhaiin an len hriatin chu an lei chia.

⁸ Khanchu Israel mihai khan Samuela kuang, “Filistia mihai kut ata nin zôk hranga Rengpa ei Pathian ni izong kha mong viat no roi,” an tia.

⁹ Samuela’n kêlbelrate irhnu nêk lai kha a lâka, a thata, pumhâl thilinhlanin Rengpa kuang ar hlana. Kha hnung chu Israel mihai ta hrangin Samuela khan Rengpa kha a koia. Rengpa’n a don tâka.

¹⁰ Samuela’n hâlirvôm thil an hlan lai takin Filistia mihai khan Israelhai doi hrangin an hong suaka; khannisianlân kha ni khan chu Rengpa’n Filistia mihai chunga khonri irhâi siat takin an tongtir pehaia. Anni chu a satea buaia lunginzîngin lâizâm an tho tâka.

¹¹ Israel mihai kha Mizpa ata khan an suaka, Filistia mihai kha Bethkar dên thalin an irzûlhaia, an ithathai thiai a ni.

¹² Kha hnung chu Samuela khan lung a lâka, Mizpa le Sen kâra khan a phuna, “Hi ten dên hin Rengpa’n a ni isan a ni,” tiin ar hming khom Ebenezara a tia.

¹³ Khanchu Filistia-hai kha an dok tâka, Israelhai ram kha hong rûn nôk ta mahai. Rengpa kut khan Filistia mihai chu Samuela dam sûng kârka chu a doihai mai tâka.

¹⁴ Filistia mihaiin Israel mihai khua an ilâkhai chu Ekron-a irthokin Gath dênin Israel mihai an pêk kîr nôka. Khaang khan Israel mihai khan an ram murdi chu an idong nôk tâk a ni. Israel mihai le Amor mihai chu irngeiin an om ta.

¹⁵ Samuela dam sûng kârka chu Israel mihai roi a rêl pehai ta.

¹⁶ A kum tin Bethel le Gilgal le Mizpa hi a ihrosuak ngai a ni; kha hmunhai khan chu Israel mihai thubuai a irêl pehai ngai a ni.

¹⁷ Kha hnung chu ama omna Rama khuaa khan a kîr nôk ngaia; kha hmuna khom khan Israelhai roi a rêl pehai sa a ni. Rama khua khan Rengpa ta hrangin maichâm a isiam a ni.