1 SAMUELA 30 - PATHIAN LEKHABU IRTHIANG C.L. Bible (BSI)

Amalek mihai leh irdoina thu

¹ Sûn thum ni tena chu Davida le a mihai Ziklag an tungin chu, Amalek-haiin, Judai sim tiang le Ziklag khua kha an lei rûn tâka. Ziklag khua kha an hâla.

² Nupanghai le kha khuaa om murdihai kha a lian a chîn an chelhaia, tûte that loiin an hruaihaia, an rotpuihai ta.

³ Davida le a mihaiin kho sûng an va tungin chu, a lei kâng inhek zoi tâka; an dôngmahai, an nâipasalhai, an nâinuhai chu an lei hruaipaihai tâka.

⁴ Kha hnung chu Davida le a kuanga omhai chu an chap tâka, sôl takin an oma.

⁵ Davida dôngmahai ruai Ahinoami le Abigaili khom an ihruaihai sa a ni.

⁶ Davida milung a zîng pe sabaka, a mihai le an nâihai an inchân zoi tâk sikin, an lungrîl a na hraia, ama kha lung leh dêng that hrangin an insî sikin, khannisianlân Davida kha Pathian Rengpa khan milung ngar ar saka.

⁷ Davida khan Ahimeleka nâipa ochai Abiathara kuang khan, “Ochai songkol ni va la pe ro,” a tia. Abiathara khan ochai songkol kha a va lâk pea.

⁸ Davida khan Rengpa a chongpuia, “A ni rûntuhai hi ki irzûl hrang mo? Irzûl inlân la phahai ning mo,” tiin ar dona. Ama khan, “Irzûl ro, la phahai ngêt ni ti, an ichelhai khom saninzôkhai ving ni ti,” a tia.

⁹ Khanchu Davida le a mi irzarukhai kha an irthoka, Besor vadung kha an va tunga, kha tena khan a sen a zârhai kha an va phâkhaia.

¹⁰ Davida le a mi irzaminlihai khan chu an irzûlhai maia, mi irzahnihai kha chu an sôl hrai tâk sikin Besor vadung kha irkân thei ta mahaia, khatak khan an lei iom tâk a ni.

¹¹ Davida kuanga la omhai khan rama hin Aigupta nâipang hi an va hmua, Davida kuang an hong hruaia, bai le tui in hrang an pêka.

¹² Theipui chârhai le Grep hroi irku hni an pêka. Khahai kha a fâk zoiin chu a hong har suak nôka, sûn thum le zân thum chu bu le tui in loi a nia.

¹³ Khanchu Davida khan a kuang, “Tu mo ni ini? Khôtaka irthoka hong mo ni ini?,” a tia. Ama khan, “Aigupta mi ki nia, Amalek mi suak ki ni. Sûn thum a ni ta, ki dam no sikin, ka pu’n a ni mâk raka.

¹⁴ Judai sim tiang pang ram Keret mihai ram kha kin rûna, Kaleba irchihai ram khom kin rûna, Ziklag khua khom kin hâl,” a tia.

¹⁵ Davida khan a kuang, “Khahai omna khan ni hruai theiin mo?,” a tia. Ama khan, “Ni that loi hrang le ka pu kuanga ni pe ta loi hrangin Pathian irhming sâmin keima kuang chonginkungin lân, khanchu annihai omna khan nang hruai ki ti,” a tia.

¹⁶ Khanchu Davida kha anni kuang a hruai tâka. Khan, a rûntuhai khan Filistia rama le Judai rama râllâk tamtak an lâk sikin, hruai an inthea, an fâkin an ina, an le’rthek bet buta.

¹⁷ Khanchu Davida khan zîng khua a vâr u uai ata khohloi dênin annihai kha a doihaia, ruatharte irzaminli le saringsei chunga chuangin lâizâm thohai bana chu tûte a zôk zel om mahaia.

¹⁸ Davida khan Amalek mihai an ichelhai kha an zôkhaia, an thil lâkhai khom a lâkpai pehaia, a dôngmahai ruai khom kha a saninzôkhaia.

¹⁹ Ite dok viat maka, Davida khan a mihai, a nâihai, murdi le râllâk thil, Amalek-hai lei ilâkhai kha a ilâk kîr nôk ving a ni.

²⁰ Davida khan kêlbelra pâlhai le sa pâl murdi khom kha a lâka, a mihaiin a maton tiang an hôla, “Hihai hi Davida râllâkhai an ni,” an tia.

²¹ Kha hnung chu Davida kha, an sôl hrai sika a kuanga fe thei ta loia, Besor vadunga lei om tâkhai mi irzahnihai kuang a fea. Anni khan Davida le a kuanga omhai don hrangin an lei honga, Davida’n an kuang a va tungin chu, lôm takin chubai a mûkhaia.

²² Khannisian Davida kuanga fehai laia mi senkhat mi chanlamboi, mi tiksiahai khan, “Eini kuanga an fe no sikin ei râllâk thilhai chu semhai no ih. An dôngmahai le an nâihai chu hruaihai sian fe ri sehai,” an tia.

²³ Khannisianlân, Davida’n, “Urênghaio, Rengpa ni ipêk chunga hin ite tho thei no chin ni. Ama’n a ni hrung inzôka, a ni rûntuhai kha ei kut chunga a ni ipêk a ni.

²⁴ Khasikin tûte’n nin thu kha pom no nihai. Irdoina zu fehai dongtum ang dên kha, neinun enkola lei omhai khomin an idong hrang a ni,” a tia.

²⁵ Khanchu Davida’n kha dân kha a siam tâka, kha rengata atûn ten hin Israelhaiin an la hong izui mai a ni.

²⁶ Davida khan Ziklag khua a tungin chu, râllâk thil senkhat kha Juda hruaitu, a rualhai kuang a thona, “Hi hi, Rengpa râlhai ata râllâk, lômman hrangin nangni ki ithon a ni,” a tia.

²⁷ Bethel-a omhai, Judai ram sim tiang panga Ramah khuaa omhai, Jatir khuaa omhai,

²⁸ Aroer khuaa omhai, Sifmot-ah omhai, Estemoa omhai,

²⁹ Rakal-ah omhai, Jerameel khuaa omhai, Ken mi khuaa omhai,

³⁰ Horma khuaa omhai, Barosan-ah omhai, Athak-ah omhai,

³¹ le Hebrona omhai kuang a thona. Ama le a mihai chênginbualna ngai hmun murdia om Juda hruaitu a rualhai kuang a ithon a ni.