1 SAMUELA 3 - PATHIAN LEKHABU IRTHIANG C.L. Bible (BSI)Samuela kuanga Rengpa inlârna 1 Khan nâipang Samuela kha Elia makunga Rengpa sin a tho laia khan Rengpa kuang ata chongbe om lele ngai maka; inlârna tihai khom. 2 Kha zoro khan zân khat chu Elia mit zîng tâk khan, ama tentan sûnga a zâla; 3 Samuela chu Pathian Thuthung Bôm omna hmun biak ina khan a zâla, khovâr mân meiser a lan chok mai laiin, 4 Rengpa khan Samuela chu a koia. Ama’n, “Ka pu hin ki om,” a tia. 5 Khante, Elia kuang khan a van tâna, “Hin ki om, ni ni ikoi ma ni,” a tia. Khannisianlân Elia khan, “Nang koi ma ung, va zâl nôk ta ro,” a tia. Khanchu Samuela chu a fea, a va zâl nôk tâka. 6 Rengpa khan Samuela kha a koi nôka, kha lai khan nâipang Samuela khan Rengpa ikoi a nih ti inhre thei maka, Rengpa’n a kuang thu a lan puang pe ngai no sikin. 7 Khanchu Samuela chu a thoia, Elia kuang khan a fea, “Hin ki om ni ni koi maia,” a tia. Khan Elia khan a sâma, “Nang koi ma ung, ki nâipa va zâl nôk ta ro,” a tia. 8 Voithumna tena chu Rengpa khan Samuela kha a koi nôka. A thoia Elia kuang khan a fe nôka, “Hin ki om ni ni koi maia,” a tia. Khanchu Elia khan nâipang kha Rengpa’n a ikoi a nih ti an hriat tâka. 9 Khanchu Elia khan Samuela kuang khan, “Fe’n lân, va zâl nôkin lân, nang a koi nôkin chu, Rengpa thu insîr ro, ni suak hin ar ngai chian, ti ro duah,” a tia. Khanchu Samuela kha a fea, a va zâl nôka. 10 Rengpa kha a zuanga, matona a ikoi ang lam ngêtin, “Samuela, Samuela,” tiin a koi nôka. Khanchu Samuela khan, “Thu insîr ro, ni suak hin ar ngai chian,” a tia. 11 Kha hnung chu Rengpa khan Samuela kuang, “Irngai ro, Israel rama hin an hriat murdihai irngai nuam loi tamtakin thil irkhêl tak tho hrang ki ni. 12 Kha nikhua khan Elia in sûng mi thurchi ki insîr murdi kha a bula irthokin a mong dênin ki itho hrang a ni. 13 A nâipasalhaiin Pathian an insîrinsiatna sual kha inhriat chakin a khap no sikin a in sûngkua chu kumtuanga hrangin kuttum ki itho hrang a nih ti hi ki lei ihril zoi tâk a ni. 14 Khasikin Elia in sûng mihai siatna kha irbôlna hrangin mani, thilinhlanin mani, itiklai khomin irlêk thei ni no nih tiin chong ki lei inkung tâk a ni,” a tia. 15 Samuela kha a vâr dênin a zâlhmuna khan a oma; khanchu a hong thoia, Rengpa khan mikothai kha an honga, kha inlârna kha chu Elia hril hrangin a sân a chi tâka. 16 Khanchu Elia khan Samuela kha a koia, “Samuela ki nâipa,” a tia. Samuela khan, “Hin ki om ka pu,” a tia. 17 Elia khan, “I thil mo Rengpa’n ni kuanga a insîr? keima kuang ite ip nei no ro duah. Ni kuanga a insîr murdi kha keima kuang ip ni neiin chu, Pathianin irkhêl takin kuttum nan tuangtir ri se,” a tia. 18 Khanchu Samuela khan itinrêng a hril pe ving tâka; ite ip nei viat loiin. Elia khan, “Ama chu Rengpa a nia, a sa a iti lam takin tho ri se,” a tia. 19 Samuela chu a hong irsôn tîr tîra, a kuang Rengpa a om maia. Samuela chongbâi suak tinrêng chu thudikin a siama. 20 Khanchu Dan khua ata Beer-seba dên rakin Israel mi murdihai khan Samuela chu Rengpa deipu hranga indet a nih ti an hon hriatsuaka. 21 Rengpa chu Silo khan an lâr nôka, kha khan Rengpa chu thuin Samuela kuang Silo-a khan a inlâr a ni. Khan, Samuela thu kha Israel mi murdi laia khan an thangsuak tâka. |
Hrangkhol CL Bible - PATHIAN LEKHABU IRTHIANG
Copyright © 2008 by The Bible Society of India
Used by permission. All rights reserved worldwide.
Bible Society of India