1 SAMUELA 28 - PATHIAN LEKHABU IRTHIANG C.L. Bible (BSI)

¹ Zoro sôt ian hnunga chu Filistia mihai khan an sipaihai kha Israel mihai doi hrangin an irbuka. Akisa khan Davida kuang, “Nangma le ni mihai kha keima ni thopin nin idoi hrang a nih ti nin hriat kha te na,” a tia.

² Davida khan Akisa kuang, “O kin hriat, ni suak thil tho thei dân hi nangma ngêtin hmu ni ti,” a tia. Akisa khan Davida kuang, “A sa! a ni hrungtu det takin nang siam ki ti,” a tia.

Saula’n tasân theihai a hmang

³ Samuela kha a thi tâka, Israelhaiin an châ tâka. Ama omna khua Ramah khuaa khan an phûm ta. Saula khan tasân theihai le dôi theihai kha a ram ata an hnotsuakhai tâka.

⁴ Filistia mihai an irbûma, Sunam khuaa khan omhmun an khuara. Saula khan, Israelhai a bûma, Gilbo khuaa omhmun an khuara.

⁵ Saula’n Filistia sipaihai a hmu’n chu a chia, ar lo an thing tâka.

⁶ Khanchu Rengpa a chongpuia. Khannisianlân, Rengpa khan irmangin mani, Urim le Thumimin mani, deipu khomin don ual ta mahaia.

⁷ Kha hnung chu Saula khan a mi lianhai kuang, “Tasân thei nupang ni zong pe unglân, a kuang fe ki ta, lei chongpui rong,” a tia. Anni khan a kuang, “Endor khuaa tasân thei nupang inkhat a oma,” an tia.

⁸ Khanchu Saula kha irvo danglamin a’rvoa, puan danglam a sila, zâna khan mi dang inhni hruaiin nupangnu kuang khan an fe tâka. Khanchu ramilhli, tasân theinu kuang khan, “Tâ ni sân pe’n lân, ni kuanga a’rhming ki isâm kha ni koi pe ro,” a tia.

⁹ Nupangnu khan a kuang, “Irngai ro, Saula thiltho kha nin hriata, a ram sûnga tasân theihai le dôi theihai kha an hnot suakhaia, i lo hrang mo ki thina hrangin châng ni ikam hrang?” a tia.

¹⁰ Kha hnung chu Saula’n chong an kunga, “Rengpa irhmingin ki iti a ni, hi thil sika hin ni chunga kuttum tung no ni,” a tia.

¹¹ Khanchu nupangnu khan, “Tu mo nang ki ikoi suak pe hrang?,” a tia. Saula khan, “Samuela ni koi suak pe ro,” a tia.

¹² Nupangnu khan Samuela a hong hmu’n chu a khêk raka, Saula kuang, “Itho mo ni ni huanga, rêng Saula kêng ni ni duah,” a tia.

¹³ Reng khan nupangnu kuang khan, “Chi no ro, imo ni hmu?” a tia. Nupangnu khan Saula kuang, “Irnêng ata pathian nia irhoi tak a hong suak ki hmu,” a tia.

¹⁴ A kuang khan, “Itin mo a om?” a tia. Nupangnu khan, “Tarpa hi a hong suaka, songkol irfual an nghâka,” a tia. Kha hnung chu Saula khan Samuela a nih ti an hriata, a hmâi irnêng sikin chubai a mûka.

¹⁵ Samuela khan Saula kuang, “Itho mo hianga ni ni inbuai? Itho mo zuang nôk hrangin ni ni dona?,” a tia. Saula khan, “Ki milung a zîng tak taka. Filistia mihaiin an ni doia, Pathian lakin hnung a ni songsana, deipu’n mani, irmangin mani lua khomin ni sâm maka; khasika khan ki sin hrang nin hril hrangin nang ki ikoi a ni,” a tia.

¹⁶ Samuela khan, “Khaanga Rengpa’n hnung nang a songsana ni râl a hong ni tah iti inhre pumin itho mo hi thu hi ni ni irdon?

¹⁷ Keima hmangin a insîr ang khan ni chunga a itho tâk a ni hi. Rengpa khan ni kut ata ram kha nang a sutpai tâka, Davida kha a ipêk tâk a ni.

¹⁸ Rengpa thupêk zôm loia, Amalek-hai chunga ningmurna natinsat tak anga khan zoi mak chea. Khasika khan atûn hin ni chunga hi thil hi a itho tâk a ni.

¹⁹ Kha vai kha ni loiin Rengpa khan nangma le Israelhai khom kha Filistia mihai kuta pe a ta, nangtûk hin nangma le ni nâipanghai chu keima kuang hong ta an ti, Rengpa khan Israel sipaihai khom kha Filistia mihai kuta pe a ti,” a tia.

²⁰ Kha hnung chu Samuela thu’nsîr sikin Saula chu a chi tâka, voikhat zelin irnênga an rîl raka, a zâl rak tâka. Sûn le zân ite a fâk viat ta no sikin irnak irvun nei ta maka.

²¹ Khan nupangnu kha Saula kuang a fea, a bei a dong ti an hriata, khanchu a kuang, “Irngai ro, ka pu nang a zuinu hin ni iti ang ki zôma, ki thi le thi tiin ki kuanga ni thu’nsîr kha ki ipom a ni.

²² Atûn hin irngaihoi takin nangma khomin ni suaknu hi a thu irngai pe ro duah. Bu a chînte nang siam pe ki ta, khanchu ni kîr nôk tika irnak ni nei theina hrangin ne ngêt ro,” a tia.

²³ Khannisianlân Saula khan nuam maka, “Ite ne no ning,” a tia. Khannisianlân a mi lianhai khom khan fâk nêk zong hrangin an inthêm maia, an he a lâk tâka, khanchu irnêng ata kha a thoia, zâlhmuna khan a toia.

²⁴ Nupangnu khan sehrâtte a mar tak kha a lâka, a thata, kha hnung chu baidi kha a lâka, an hmeta, chol pol loi bai hriamin a sina.

²⁵ Saula le a mi lianhai makunga khan khalâi a va doa, an nêk tâka, kha hnung chu a thoia, kha zân zela khan a fe tâka.