1 SAMUELA 26 - PATHIAN LEKHABU IRTHIANG C.L. Bible (BSI)

Davida’n Saula hringna a hôi pe nôk

¹ Zif mi senkhathaiin Gibea khuaa Saula kuang an fea, “Davida chu Judai ramchâr kôla Hakila tânga khan ar bîk chian a ni,” iti an va hrila.

² Khanchu Saula kha Israel mihai lai ata sipai inthang ngot mi sângthum hruaiin Zif ramchâra Davida zong hrangin a fe zel tâka.

³ Saula khan Hakila tânga lampuia khan riakbuk a khuara. Davida chu ramchâra khan a om maia, Saula chu ama zongin ramchâra a hong ti an hriatin chu,

⁴ a enirchik hrang mi a tîra, Saula a ihong ta tak a nih ti an hriat infel tâka.

⁵ Kha hnung chu Davida kha a thoia, Saula riakbuk khôrna khan a fea, Davida khan Saula le a sipai hruaitu Nera nâipa Abnera zâlna kha irsin a siaa, Saula chu riakbuk sûnga khan a zâla, a kôlvêla khan riakbuk an irfûktira.

⁶ Kha hnung chu Davida khan Hit mi Ahimeleka le Joaba sangpa Abisaia kuang, “Tu mo keima kuanga Saula riakbuka hong hrang?,” a tia. (Joaba le Abisaia-hai nu chu Zeruii a ni.)

⁷ Khanchu kha zâna khan Davida le Abisaia chu Saula riakbuka an fea. Saula chu riakbuk inlaina taka khan a lei zâla, a luthun tiang ufei kha irnênga a thun nguta. Abnera le sipaihai khan an lei hrunga.

⁸ Abisaia khan Davida kuang, “A vuan hin Pathianin ni râl kha ni kuta nang a ipêk a ni, khasikin ufei leh hin irnêng la hong sun bê ta hi rong duah, voihni chu sun no ning,” a tia.

⁹ Khannisianlân Davida khan Abisaia kuang, “A chunga kut tha no ro, Rengpa sahriak irthûtir chunga kut thâka tûte thiamchang om mahai,” a tia.

¹⁰ Davida ngêt khan, “Rengpa hringna sâmin ki iti a ni, Rengpa khan Saula chunga kut tha a ti, thi pangaia thi nî mani, a ni no le irdoina fe a ta, thi a ti, ti kin hriat.

¹¹ Rengpa sahriak irthu chunga khan kut tha thei no chi ni! A ufei le a tuiûm kha chu lapai ei ta, khanchu fe ei ti,” a tia.

¹² Khanchu Davida khan Saula luthuna ufei le tuiûm kha a lâka, an fe tâk, tûte’n hmu mahaia, tûte a har khom om mahai. Rengpa’n inmu irhnik takin an intirhai lai tak a ni sikin.

¹³ Kha hnung chu Davida kha varâl dang tiang a fea, hla vita tâng inkhata khan a ngîra, ram hlatak a ni ta.

¹⁴ Davida khan sipaihai le Abnera kha, “Abnera nin hriat thei mo?,” tiin ar dona. Abnera khan, “Pâi pumin, rêng inthangtu tu ngân mo ni ini kha?,” a tia.

¹⁵ Davida khan Abnera kuang, “Abnera, Israelhai laia mi hâi tak mo ni mak che? Ithoa mo, ni pu rêng kha ni ihrung inzôk loi? Atûn hin rêng ni pu that hrangin tu ma ni riakbuka a zuang lût kha te.

¹⁶ Abnera, ni sinthôna hlo ni isam a ni. Rengpa irhmingin ki iti a ni, Rengpa sahriak irthûtir ni pu kha ni hrung insa no sikin, thi zôi inruk ni ni. Reng luthuna ufei le tuiûm kha khôn mo a iom tâk, hong en ngân ta,” a tia.

¹⁷ Saula khan Davida irhâi kha a hon hriata, “Nangma mo ni ini, ki nâipa Davida?,” a tia. Davida khan, “O, rêngpa ka pu, keima ki ni,” a tia.

¹⁸ Davida ngêt khan, “I tho hrangin mo ka pu ni suak hi ni ni’rzûl maia? I zât thil mo ki itho? I zât sual mo ki isin?

¹⁹ rengpa ka pu, ki thu’nsîr hrang hi irngai ro, ni doi hranga ni lungrîl nan thortirtu kha Rengpa a ni’n chu, a kuanga thilinhlan kha pom sianlân; khannisianlân mihriam nâihai an ni’n chu Rengpa makunga khosâlin om ri se. Ama khan, Rengpa ram ata kha ram dang pathianhai vai chubai ki mûk theina hrangin ram kâra an ni irzûl a nia.

²⁰ Khasikin ki thisen chu Rengpa hmu phâk loina ram dang irnênga luang no ri se. I lo hrang mo Israel rêng kha keima anga uihrikte that hrangin a ihong? I lo hrang mo varungtehai chel hrang anga tâng sîphai hin a hong irvâk hi?,” a tia.

²¹ Saula khan, “Thil ki itho inchâi a ni hi. Ki nâipa Davida hong kîr nôk ta ro. A vuan hin ki hringna ni ni hôi pe sikin, ite nang ti ta ngai no ning. Thil invêt tak ki lei itho tâk a ni, ki lei itho insual ok tâk a ni,” a tia.

²² Davida khan a sâma, “O rêngpa ni ufei, hin a om, ruatharte inkhat hong sianlân, hong la ri se.

²³ Rengpa khan, mi tin an felna le iamomna man chu a ipêk ngai a ni. A vuan hin Rengpa’n nangma hi ki kuta a ni pêka khannisianlân Rengpa sahriak irthutu chunga hin ki kut ki ithâk nuam loi a ni.

²⁴ A vuana ni hringna nang ki irngaiinhlu pe ang hin, Rengpa khan ki hringna ni’rngaiinhlu pe sianlân, lungzîngna tinrênga hin ni saninzôk ri se,” a tia.

²⁵ Saula khan Davida kuang, “Ki nâipa Davida, Pathianin sat nang vur ri se. Ni sinthôna kipa manchangsua mai ni ti,” a tia. Khanchu Davida kha a fe tâka, Saula chu a in tiang a kîr nôk tâka.