Biblia Todo Logo
Bìoball air-loidhne

- Sanasan -

1 SAMUELA 25 - PATHIAN LEKHABU IRTHIANG C.L. Bible (BSI)


Samuela thina thu

1 Samuela chu a thi tâka, Israel mihai kha an irkoi bûma, an châ tâka. Kha hnung chu Ramah khuaa a in kôla khan an phûm tâka. Kha zoiin chu Davida chu Paran ramchâra a fe tâka.


Davida le Abigaili

2-3 Maon khuaa khan Kaleba irchia mi inkhat ar hming Nabala a oma, Karmel kho kôla khan hmun a neia, mi irchong tak a nia, kêlbelra sângthum le kêl sângkhat a neia. A dôngma Abigaili khom nupang bengvâr tak le satak a nia. Khannisianlân Nabala kha chu mi tiksia le lungrîl saloi tak a nia. Nabala khan Karmel tânga khan a kêlbelra mul a epa.

4 Davida khan ramchâra irthokin Nabala’n kêlbelra mul a ep ti a len hriata.

5 Khanchu Davida khan ruatharte sômkhat a tîra, ruathartehai kuang khan, “Karmel tânga fe unglân, Nabala kuang thengthai unglân, ki’rhmingin chubai hong mûk roi.

6 Nabala kuang khan hiang hin ti roi, nangma chunga le ni insûngkuahai chunga le ni inei murdi chunga irtharngamna om ri se.

7 Ni kêlbelra mul epin ni om iti ki len hriata, ni kêlbelra enkoltuhai kha ki kuang hin an om ngaia, an ningmurna ite sin ma ung, Karmel tânga an om sûng chu ite dok mahaia.

8 Ni ruathartehai irdonhaiin lân, nang hril zêl an ti. Khasika khan ruathartehai hi lunginkhamhaiin lân; hruaithe nî sûn takin kin ihong a ni. Irngaihoi takin, ni inei lam ang takin ni suakhai le ni rualpa Davida hi lei pe ro. Davida’n a ti va ti roi,” a tia.

9 Davida ruathartehai kha an va tungin chu, Davida irhmingin kha thu murdi kha Nabala kuang khan an hrila. Khanchu an nghâk tâka.

10 Nabala khan Davida ruathartehai kha an samhaia, “Davida kha tu mo a ini? Jesaia nâipa kha tu mo a ini? lan hre ngai ma ung. Atûn lai hin suak tamtak an puhai in ata rot an tam a ni.

11 Ki baihai, ki tuihai le ki belra mul eptuhai hranga ki sa that kha tuhai mo an ini ite khom ki inhriat phâk loihai hi ki ipêk hrang mo?” a tia.

12 Davida ruathartehai kha an kîr nôka, Nabala ihril murdi kha Davida an hrila.

13 Davida khan a mihai kuang khan, “Nin khandai vong chit roi,” a tia. Davida khomin a vonga, mi irzaminli vêlin an zuia, mi irzahni chu neinun nghâkin an oma.

14 Nabala suak inkhatin, Nabala dôngma Abigaili kuang khan, “Irngai ro, Davida khan ramchâra irthokin ka pu chubai hong mûk hrangin mi a hong tîra, ama’n a lei hala.

15 Nikhomsianlân kha mihai kha kin chunga an sa oka, kin theimâk ite tho mahai, rama kin om laia hmunkhatin kin om kâra khan ite dok ual ma ung.

16 Kêlbelra enkolin an kuang kin om sûng chu sûn le zân kin ta hrangin kul an ni ichang pe a ni.

17 Khasikin imo ni itho hrang a satak ngaitua ro; kin pu chunga le a insûngkua murdihai chunga hin thil saloi a itung thei a ni. Ama lak hi lungrîl saloi, tûte ichongpui thei loi a ni,” a tia.

18 Abigaili khan irhnot takin bai tiam irzahni le uain kok hni le kêlbelra ringa ir-em inhmin sai le bu inzêi her sôm her sari le, grep inhroi inchâr irzakhat le theipui bai hlûm irzahni a lâka, sakuartung an pêltira.

19 Kha hnung chu a zui ruathartehai kuang khan, “Ki matona hin fe mai unglân, nangni hong zui ki ti,” a tia. Khannisianlân a pasal Nabala kha chu inhril maka.

20 A sakuartung chunga chuangin mual le mual kâra a fe laiin Davida le a mihai kha a’rtongpuihaia.

21 Davida khan a lungrîlin, “Hi pa neinun hi ramchâra hin a man boiin ki inrûk pe a ni hi te; thil sa kha thil saloiin a ni tuam tâka.

22 Nangtûk zîng khovâr mân, kha pa ta murdi laia pasal nâipang inkhat lua khom ki hôi pea ni’n chu Pathianin Davida hi a nuam nuamin ni lo ri se. Hi nêka na ual khomin ni lo ri se,” a ti tâka.

23 Khanchu Abigaili khan Davida a hmu’n chu, a sakuartung ata kha a chum zôi zela. Davida makunga khan irnêng sikin chubai a mûka.

24 Davida ke bula inbok pumin a kuang, “Keima’n ka pu, keima ngêtin pualoina chu pêl ki ti, irngaihoi takin nir ngai pe ro.

25 Irngaihoi takin mi chanlamboi Nabala kha ite bêin bê no ro, ar hming om lam ang chie hi a nia, Nabala an iti ang hin into a ni, keima ni suaknu lak hin ruatharte ni hong itîrhai kha lei hmu ma unga.

26 Khasikin atûn hin ka pu, Rengpa hringna le ni hring irhmingin ki iti a ni, Rengpa’n thisen insua loi hrang le ni kuta phuba la loi hrangin nang a siama, atûn hin ni râlhai le ni chunga thil saloi tho tum murdihai chu Nabala angin kuttum tuang ri sehai.

27 Khan irngaihoi takin ka pu, ni ta hranga thilpêk ki hong ichôi hi ni pom pe’n lân, ka pu ruathartehai hi pêk ni ri sehai.

28 Nang a zuinu tho’nchâina hi irngaihoi takin inza roh. Rengpa khan insûngkua det takin nan dingtir ngêt a ti. Rengpa irdoinahai ni doipui sikin, ni dam sûng kârka chu nangma hin sualna hmu hrang om no ni.

29 Nangma irzûl hrang le ni hringna irhmangtir hrangin mi hor thokhai khom sianlân, ni hringna chu Rengpa ni Pathianin nang hrung inzôk ri se. Ni râlhai hringna kha chu sâihlia sâihlûm kâpa fe angin fe a ti.

30 Rengpa’n ni chungchâng thu chu, a thil sa inkung murdi ni chunga a tho tika Israelhai rêngin nang a siam tika chu,

31 a bi om loia, thisen nin sua noa, phuba ni ilâk viat loi hi ni ta hrangin lungchuk loina mani, irsîrna mani ite ni viat no ni. Rengpa’n ni chunga thil sa a tho tika khan irngaihoi takin nang a zuinu hi irnghil viat no ro,” a tia.

32 Davida khan Abigaili kuang khan, “A vuana ni lei don hranga nang a tîrtu Rengpa Israelhai Pathian chu inpâkin om ri se.

33 Ni bengvârna kha satvurin om sianlân, thisen insua thei loi changna ata nin zôktu le keima kuta phuba la loia ni siamtu, nangma chu satvurin om roh.

34 Nangma khan ni lei don zel no’n lân chu, Rengpa Israelhai Pathian hring irhmingin ki iti a ni, nangtûk khovâr tena khan chu Nabala kha nâipang inkhat lua khom hôi pe viat no ning,” a tia.

35 Kha hnung chu Davida khan a thil hong chôi pehai kha a lâka, a kuang khan, “Irtharngam takin in tiang kîr nôk tan lân; ni hê ki lâka, ni ingên kha nang ki pom pe duah,” a tia.

36 Abigaili chu Nabala kuang a hong fea, khanchu a ina khan, rêng hruaithe ang dôrin hruai a len thea, an rui ok sikin Nabala chu a râi a fân pe vura. Khasikin zîng khua a vâr mâka chu ite hril pe maka.

37 Kha hnung chu zîng tiang Nabala inrui kha a hong harin chu, a dôngma khan kha thu kha a hong hrila; a lungrîl an thing pe raka, a hnang zuak tâka.

38 Sûn sôm zoia chu Rengpa’n Nabala chunga kut a thâka, a thi tâka.

39 Davida khan Nabala a thi ti a hon hriatin chu, “Nabala’n a ni hmusitna sikin Nabala chunga phuba a lâka, a suak hi thil saloi tho loiin a ni khaptu Rengpa chu inpâkin om ri se. Nabala thil saloi tho chu Rengpa’n ama chunga ngêt a insumpai pe a ni,” a tia. Kha hnung chu Davida khan Abigaili kha dôngmaa va biak hrangin mi a tîra.

40 Davida zuihai khan Karmel tânga Abigaili kuang an va tungin chu, “Davida khan a dôngma hranga nang hruai hrangin a ni hong itîr a ni,” tiin an chongpuiin an biaka.

41 Abigaili khan a hmâi leh irnêng sikin an boka, “Irngai roi, a zuinu ki nia, ka pu zuituhai ke irsûk hrangin ki irsiam chian a ni,” a tia.

42 Khanchu Abigaili chu a thoi hluta, sakuartung chunga a chuanga, a dôngmate ringahai leh khan, Davida hong itîrhai kha an zuihaia, a dôngma a chang tâka.

43 Davida khan Jezreel-a mi Ahinoami a lei nei sa tâka, khanchu Abigaili leh khan a dôngma changin an omsuam tâka.

44 Kha laitaka khan Saula’n a nâinu Mikali, Davida dôngma kha Galim kho mi Laisa nâipa Paltia a lei inluatir tâk a ni.

Hrangkhol CL Bible - PATHIAN LEKHABU IRTHIANG

Copyright © 2008 by The Bible Society of India

Used by permission. All rights reserved worldwide.

Bible Society of India
Lean sinn:



Sanasan