1 SAMUELA 22 - PATHIAN LEKHABU IRTHIANG C.L. Bible (BSI)

Saula’n ochaihai a that

¹ Davida kha Gath khua ata a rota, Adulam kho kôla rôla khan a fe tâka. A urêng le a pa insûng mihaiin kha hmuna khan a om ti an len hriatin chu a kuang an zu fea.

² Mi ihnuaisiahai, lâkai intânghai, milunghoi loihai laia khan an irbukkhôma, mi irzaminli vêl an nia, hruaituin a oma.

³ Davida chu khatak ata kha Moab rama Mizpa-a a fea; Moab rêng kuang khan, “Pathianin thil a ni itho pe hrang kin hriat mâka chu ka nu le ka pahai hi ni kuang lei om ri sehai duah,” a tia.

⁴ Khanchu Davida khan a nu le a pahai kha Moab rêng kuang khan a mâkhaia, khanchu Davida kha rôla khan ar bîk sûng chu an lei om tâka.

⁵ Kha hnung chu deipu Gada kha Davida kuang a honga a kuang, “Rôla hin om chian mai ta no ro; suakin lân Judai rama fe zel ro,” a tia. Khanchu Davida kha a suaka, Hereth ramkâra khan a fe tâka.

⁶ Sûn khat chu Saula kha Gibea tânga Tamarik thing hnuaia ufei chôiin a toia, a kôlvêla khan a mi lianhai kha an ngîra, Davida le a kuanga omhai kha an hmu tâk ti Saula kha an hrila.

⁷ Saula khan a mi lianhai kuang khan, “Nangni Benjamina mihaio, irngai roi; Davida hin loi le grep irhuanhai nangni a pêka, a sipai sâng hruaituhai, irza hruaituhaiin nangni a isiam ving hrang ma ni?

⁸ Khasika nin ichinrûk mo a ini? Ki nâipa’n Jesaia nâipa kuanga thu a ithung, keima kuanga inlang zel om mak chêia, lunghnâng nir lâkpui zel om mak chêia, ki nâipa’n keima mihriam Davida hi ni doi hrang le a vuan sûnhaia ni that hranga râlruang ni chuan hranga an thortu hi ki kuanga inlang om mak chêi,” a tia.

⁹ Saula mi lianhai kôla ngîr Edom mi Doega khan hiang hin a sâma, “Davida chu Nod khuaa Ahituba nâipa Ahimeleka kuanga hong ki hmua.

¹⁰ Ahimeleka khan Rengpa a chongpuia, fa hrang a pêka, Filistia mi Goliatha khandai khom a pêk sa,” a tia.

¹¹ Khanchu rêng Saula khan, Ahimeleka le a urênghai, Nod khuaa ochai om murdi a koihai vinga, a kuang an honga,

¹² Saula khan Ahimeleka kuang, “Ahimeleka irngai ro,” a tia. Khanchu ama khan, “I ma nih ka pu,” a tia.

¹³ Saula khan a kuang, “Itho sika mo nangma le Davida hin nin ni ithup? Itho sika mo bai le khandai ni pêka, ama hrangin Rengpa ni lei ichongpui pe? Atûn hin a ni doiin, râlruang a ni ichuan tâk a ni,” a tia.

¹⁴ Ahimeleka hin rêng kha a sâma, “Davida chu mi lian murdihai laia mi iamom tak a ni. Ama kha ni mâkpa a nia, nang a hrungtuhai laia a lian tak, ni rêng ina khom mi mahripom tak a ni.

¹⁵ A dik, a ta hrangin Pathian ki chongpui pea, khan voikhatna chu ni maka. Nang an ithupinrûk chungchâng thu chu rêng kha keima mo ki ni, ka pa in sûngkuahai mo an ni, ite nin tum no ri se. Hi thua hin chu ite ki inhriat loi a ni,” a tia.

¹⁶ Reng khan, “Ahimeleka, nangma le ni pa insûng mihai hi nin ithi ngêt hrang a ni,” a tia.

¹⁷ Kha hnung chu rêng khan a kôla ngîr sipaihai kuang khan, “Fe unglân, Rengpa ochaihai hi that roi; Davida tiang an kopa, laizâm a tho ti an inhriat chak khomin, keima kuang an insîr nuam loi a ni,” a tia. Khannisianlân sipaihai khan Rengpa ochaihai chunga khan thathai hrangin an kut insum nuam mahaia.

¹⁸ Khanchu Saula khan Doega kuang khan, “Nangma’n ochaihai hi thathai ro,” a tia. Khanchu Edom mi Doega khan an rêngin a thathaia. Kha nî khan puan irphân ochai songkol innghâk mi sômriat ringa a ithathai a ni.

¹⁹ Kha bana Saula khan Nob ochai khua kha khandai leh a rûna; nupang pasal nâipang le irhnu nêk lai dênin, sehrâthai, sakuartunghai, kêlbelrahai a rêngin a thatpai vinga.

²⁰ Khannisianlân Ahimeleka nâipa laia inkhat a’rhming Abiathara kha a zôka, Davida kuang an tân pata.

²¹ Abiathara khan Saula’n Rengpa ochaihai a that thu kha a hrila.

²² Davida khan Abiathara kuang, “Edom mi Doega kha, kha nî khan khataka om ki hmu ata kha Saula inhril ngêt a tih iti ki inhriat sai a ni. Khasikin ni pa insûng mihai murdi chu keima sika thi ni an ti.

²³ Nang chu keima kuang omin lân, chi no ro. Saula khan, nangma le keima ei ruaiin ni that a itum a ni, khannisianlân keima kuang ni omin chu zôk ni ti,” a tia.