1 SAMUELA 21 - PATHIAN LEKHABU IRTHIANG C.L. Bible (BSI)

Saula kuang ata Davida a rot

¹ Khan, Davida kha Nob khuaa ochai Ahimeleka kuang khan a fea, Ahimeleka khan irlo’nthing pumin Davida kha a’rtongpuia, a kuang, “Ithoa mo ni bing vaiin te ni hong tâka, chanpui khom hong nei mak chea,” a tia.

² Davida khan ochai Ahimeleka kuang khan, “Rengin sintho hrangin thu a ni pêka, ki itho hrang chu tûte inhre loi hrangin hê a ni bêa. Ki ruathartehai chu hmun ki indang pena khan ni’rtongpui hrangin ki iti pehai a ni.

³ Atûn hin imo ni kuta fâk zât ni inei, bai tiam ringa ni pe’n lân, a ninole ni inei tak,” a tia.

⁴ Ochai khan, “Bai papai chu nei ma ung, bai irthiang vai kêng ki inei; ni ruathartehai kha nupang chunga an irthiangin chu fa thei ni ti,” a tia.

⁵ Davida khan ochai kha hiang hin a sâma, “Nupang chunga chu a’rthiang inzen kin ni. Sintum narân sin hranga kin fe luaa khan ruathartehai kha an irvong irthiang maiin an om ngai, a vuana sintum roiinpui tho hrang le vâng hin chu an irvong irthiang nôk ual a ni,” a tia.

⁶ Khanchu, ochai khan Davida kha bai irthiang kha a pêka; a san chu dokâng irthianga irthoka a ilâk tâk Pathian kuanga inhlan sai ti no chu bai dang ite a inei ta loi a ni.

⁷ (Kha ni khan Saula kêlbelra entu ulian tak Doega, Edom mi kha Rengpa kuang a thotum zoi hrangin a lei iom sa a ni.)

⁸ Davida khan Ahimeleka kuang khan, “Ufei mani, khandai mani, ite mo nei mak che? Reng sintho kha irhnot a nang hrai sikin ki khandai leh ki hriamhrei ite ki hong ichôi irman loi a ni,” a tia.

⁹ Ahimeleka khan, “Filistia mi Goliatha, Ela phâizôla ni thata khandai kha chu a om; ochai songkol irfual khêla, puan irtuamin a om. Ni nuamin chu la ro, kha ti no kha chu a dang om ma,” a tia. Davida khan, “Kha ti no kha imo a la nanga, ni pe ro,” a tia.

¹⁰ Khanchu Davida kha a thoia, kha nî khan Saula chiin laizâm a thoa, Gath-a rêng Akisa kuang a fe tâka.

¹¹ Akisa mi lianhai khan Akisa kuang, “Hi mi hi an rama rêng Davida kha mo ni ma? Saula’n a sâng a sângin a thata, Davida’n a sîng a sîngin tia lâm puma a chungchâng thu nupanghaiin hla an isak dur dur kha ni ma mo?,” an tia.

¹² Davida khan kha thuhai kha a lungrîla a vong maia, Gath ata Akisa kha a chi tâka.

¹³ Khanchu kha mihai makunga khan a om dân an danglamtira, an mithmua khan invêt orhto a thoa, khopui kotbâihai kha an kêlterhaia; a hnerkamulhai khan khasuai a kâi dêng duanga.

¹⁴ Khanchu Akisa khan a mi lianhai kuang, “En hi roi ni invêt a nih ti nin inhriat maia, ithoa mo keima kuang nin hong ihruai hi?

¹⁵ Invêt ki irsam sika mo, an vêtzia inlangtir hranga ki makunga nin hong ihruai? Hi mi hi mo ki insûnga hong lût hrang?,” a tia.