1 SAMUELA 18 - PATHIAN LEKHABU IRTHIANG C.L. Bible (BSI)

Jonathana’n Davida rual ar changpui

¹ Saula le Davida chongna a hek tâka, kha zoiin chu Saula nâipa Jonathana khan Davida kha a’rngaiinnat ual tâka. Khanchu ama hringna lung a inkham angin Davida kha lung an kham tâka.

² Saula khan hi nî ata hi Davida chu ama kuang an omtir zôi tâka. A pa ina fe khom phal pe ta maka.

³ Khaang khan Jonathana’n ama hringna lung a inkham angin Davida kha lung a thung sikin rual irchangna thuthung an neia.

⁴ Khanchu Jonathana khan a songkolirfual a innghâk lai kha a kheka, Davida a pêka, a râltukfam le a khandai le a kongkhithai khom a pêka.

⁵ Saula’n a itîrna hmun tina Davida chu a fea, hlo a chuk maia; khanchu Saula khan a sipai hruaitu ni hrangin a siama, ama kha Saula mi lianhai le mi murdi irngai dâna khom a sa an iti ok a ni.

Saula’n Davida a hnarsâna

⁶ Davida kha Goliatha a that zoia a hong kîr nôka, a sipaihai leh insûng tiang an honga khan, Israel nupang kho tina hla sakhaiin lâm pumin khuangte le têngrephai sukin râifân takin rêng Saula irhmupui hrangin an hong suaka.

⁷ Khanchu nupanghai khan lâm pumin hla an irkhena; “Saula’n a sâng a sângin a thata, Davida’n chu a sîng a sîngin a thata,” an tia.

⁸ Saula’n kha kha irngai nuam maka, a ning an mur pea. Ama khan, “Davida chu a sîng a sîng a thatin an bêa, keima chu a sâng a sâng vai thatin an ni bêa. Inhnunga chu ama hi kêng rêngin an la isiam ngêt hrang a nih hi te,” a tia.

⁹ Khanchu Saula khan kha nia irthokin Davida kha mitsunin a nei tâka.

¹⁰ Khan, zîng nôka chu Saula chunga khan Pathian itîr ramilhli a hong tunga, insûnga khan invêt angin a chiar suat suat ngaia. Davida khan sûn danga a itho ngai ang dênin perkhuang a suka; Saula khan ufei a’rlên chiana.

¹¹ Saula khan a lungrîlin, “So banga son Davida len kho irmantir rak rong,” a tia. Khanchu Davida kha voihni zel a len khoa, khannisian an kho rikipa khan Davida kha a le’rthîn pe hena.

¹² Davida kuang khan Rengpa a om pe sikin le Saula a mâk tâk sikin Saula khan Davida kha a chia.

¹³ Khanchu Saula khan a kuang ata Davida kha a thonpaia, a sipai sângkhathai chunga hruaitu ni hrangin a siama. Khan, Davida chu sipai hruaiin a lûtin a suaka.

¹⁴ A sinthôna hmun tina hlo a chuk maia. Rengpa chu ama kuang a ompui maia.

¹⁵ Saula khan Davida hlochuk lam kha a hmu’n chu, a chi ual tâka.

¹⁶ Khannisianlân, Israelhai le Judahai murdi khan Davida chu an irngaiirsâng ual tâka, hruaitu hlochuk tak a ni sikin.

Saula nâinu Davida’n dôngma’n a nei

¹⁷ Kha hnung chu Saula khan Davida kuang, “Irngai ro, ki nâinu ulian ual Merabi hi dôngma’n nang inluatir ki ti, sipai hâitak le iamom takin ni thop khakin lân; Rengpa irdoinahai chu doi mai ro,” a tia. (Saula khan, keima’n a chunga kut thâk viat loiin Filistia mihaiin a chunga kut thâk tong ri se, ti a ingaitua a ni.)

¹⁸ Davida khan Saula kuang, “Tu ngân mo ki nia, Israelhai laia ka pa insûngkua khom kha imo a nia, rêng mâkpa ki nina hrang hi?,” a tia.

¹⁹ Khannisian Saula nâinu Merabi kha Davida innei zoro a hong ni’n chu Meholat mi Adriela dôngma hrangin a pêk tâka.

²⁰ Khannisianlân, Saula nâinu Mikali khan Davida kha lung a thunga; Saula khan an hriatin chu a lôm oka.

²¹ Saula khan a lungrîlin, “A khitna hranga châng a ni theina hrangin le, Filistia mihaiin a chunga kut an thâk theina hrangin, Mikali hi chu Davida inluatir hi rong,” a tia. Khanchu Saula khan voihnina khan Davida kuang, “A vuan hin ki mâkpa ni ichang hrang a ni,” a tia.

²² Kha hnung chu Saula khan a mi lianhai kha dâihrekin Davida kha chongpuia, a kuang, “Reng chu ni chunga hin a lôm oka, a mi lianhai murdi khomin nang an irngaisânga; atûn hin rêng mâkpa ni ta hrangin a isa a ni,” ti hrangin thu a pêka.

²³ Khanchu kha thu kha Davida mikuar inhriata khan an insîra. Khanchu Davida khan, “Mi inriang le tûte inhre loi keima anga hin rêng mâkpa ni hrang hi an dôk nin isôn ma ni?,” a tia.

²⁴ Saula mi lianhai khan, Davida chonghai kha an insîr pea.

²⁵ Khanchu Saula khan anni kha Davida kuang, “Reng khan a râlhai phuba lâkna’n Filistia mihai an servun irzakhat ti no chu a man ite la no ni,” va ti hrangin thu a pêka. (Khaang khan Saula khan Davida chu Filistia mihai kuta that hranga a insâp a ni.)

²⁶ Saula mi lianhai khan, kha thu kha Davida an hong hrilin chu, rêng mâkpa a hong ini hrang kha Davida hin a lôm oka. Irnei hrang nî sûn an ikhit kha a hong phâk mân khan,

²⁷ Davida le a mihai kha an fesuaka, Filistia mihai irzahni an va thathaia. Khanchu, Davida khan an servun a hong chôia, khanchu rêng mâkpa a ni theina hrangin rêng kha irkip takin a pêka. Khanchu Saula khan, a nâinu Mikali chu dôngma’n anneitir tâka.

²⁸ Saula khan Davida kuang khan Pathian a om ti an hriat infel tâka; kha bana a nâinu Mikali khan Davida chu lung a thung tak tak iti an hriata.

²⁹ Khanchu Saula khan Davida chu a chi ual tâka, khanchu Saula chu a dam sûng kârka chu Davida râl a ni tâka.

³⁰ Khaang khan Filistia sipaihai kha hong irthok suakin, an hong doihai ngaia. Khannisianlân, an irdoi rikipa Davida chu Saula mi lian danghai murdi nêkin hlo a chuk ual ngaia. Khasika khan Davida irhming chu a hong inthang tâka.