1 SAMUELA 17 - PATHIAN LEKHABU IRTHIANG C.L. Bible (BSI)

Goliatha’n Israelhai a sarai ngai

¹ Khan Filistia mihai khan irdoi hrangin Judai ram sûng Soko khuaa an sipaihai an bûma; Soko le Azeka kho kâra Efes Damim hmuna khan, omhmun an khuara.

² Saula le Israel mihai kha an irbûma, Ela phâia omhmun an khuara.

³ Filistia mihai kha tâng dunga an oma, Israel mihai kha varâl tianga tâng panga an oma, an kâra phâizôl a oma.

⁴ Khan, Filistia-hai omhmuna irthokin an mi hrât, ar hming Goliatha, Gath kho mi, mûk ruk le khâp khata dung sei hi a hong suaka, Israelhai kha a hong saraihaia.

⁵ Ama hin thîr dâr lukhum a khuma, dâr suma inluan rôppho an nghâka; a pho rik dân chu her sômringa le her sari vêla rik a ni.

⁶ A’rngala khan khom pho a’rbela, a dâra khan dâr ufei a’rvâ saa.

⁷ A ufei ngul chu puan rikol anga om a nia, a ufei lu tianga khan thîr her saria rik a ni. A pho chôitu sipai kha a maton tiang a fea.

⁸ Goliatha kha a ngîra, Israel sipaihai kha a khêkkhumhaia, an kuang, “I lo hrang sika irdoi hranga nin zuang irtâng mo? keima chu Filistia mi ki nia, nangni chu Saula suak kêng nin nia! Nin laia mi inkhat inthang unglân, ni hong irsualpui ri se.

⁹ Ama khan a nin hnêa, a ni thatin chu, nin suak chang kin ti. Khannisianlân, keima’n kin hnêa, ki thatin chu kin suak chang nin ti.

¹⁰ Atûn hin Israel sipaihai chu nangni ki saraiin nangni ki i-ot a ni, mi inkhat hon thang unglân, lei irsual hi ro ung,” a tia.

¹¹ Khan Saula le Israelhai murdi’n Filistia mi thu’nsîr kha an inhriatin chu irlo’nthingin an chi tâka.

Saula riakbuka Davida a fe

¹² Khan, Davida chu Jesaia nâipa a nia, Judai ram Bethlehem-a Efrata mi a nia, Jesaia’n nâipasal kiriat a neia; ama chu Saula inlal lai khan a lei tar ok tâka.

¹³ Jesaia nâi ulianhai inthum khan irdoina hmuna Saula kha an zuia. A nâipasalhai irdoina fehai irhming chu, a ulian tak Eliaba, inhnina Abinadaba, inthumna Sama hai an ni.

¹⁴ Khan Davida chu a mitum tak a nia, khan a urêng inthumhai kha Saula kuang an om laiin,

¹⁵ Davida chu Saula kuang ata Bethlehem-a a pa kêlbelra enkolin a va fe ngaia.

¹⁶ Goliatha’n zîng le khohloi rikipa hin sûn sômminli sûng Israelhai kha a sarai mai ngaia.

¹⁷ Sûn khat chu Jesaia khan a nâipa Davida kuang khan, “Bu inzêi her sôm le bai tiam sôm hi chôiin lân, ni urênghai kuang an riakbuka va fepui zel ro.

¹⁸ Khan dût thâi inkang hlûm sôm hi an laia mi hruaitu kha chôi pe’n lân, ni urênghai itin mo an om hong irdonin lân, an thurchi hon hre’nfel roh.

¹⁹ Reng Saula le ni urênghai le Israel mi murdihai kha Filistia mihai doiin Ela phâizôla an iom a ni,” a tia.

²⁰ Davida chu zînga âr khuangin a thoia, kêlbelrahai kha mi dang a len enkoltirhaia, Jesaia iti pe lam angin fâk zâthai kha a chôia, a fe tâka. Israel sipaihai kha irdoina hmuna fe hrangin an irthok lai takin le an lei khêk sup lai takin, an riakbuk kha a va tunga.

²¹ Khan Israelhai le Filistiahai chu irdoi hrangin an le’rtâng tâka, sipai le sipai hmâi irsongin an lei oma.

²² Davida khan fâk zât a ichôi kha fâk nêk enkoltu kuang khan a pêka, sipaihai tiang khan a van tâna, a uhai kha chubai a va mûkhaia.

²³ Khan an chong lai takin Goliatha kha Filistia mihai sipai pâl lai ata kha a hong suaka, matona a itho ngai ang dênin Israelhai kha a saraihaia. Kha kha Davida’n an hriata.

²⁴ Israel mi murdihai khan kha mi kha an hong hmu’n chu chipumin lâizâm an thoa.

²⁵ Israel mihai khan, “Kha mihriam hong suak kha nin hmu mo? Israel mihai sarai hrang ngêta hong suak a ni. Tukhomin kha mi kha a that theitu chu rêngin lômman satakin satvur a ta, a nâinu kha dôngma’n inneitir a ta, khanchu a pa insûngkua kha Israelhai laia hin khâzana khom chôi ni no ni,” an tia.

²⁶ Khanchu Davida khan a kôla ngîrhai kha ar donhaia, “Hi Filistia mi hi that theia, Israelhai irhming siatna inboitirtu kha imo an ipêk hrang? Hi sertan loi Filistia mi hi tu ngân mo a ini, Pathian hring sipaihai a isarai ngân hi?,” a tia.

²⁷ Mipuihaiin, “A thatpu tak chu kin iti angin itinrêng tho pe ni a ti,” an tia.

²⁸ Khan a uliantak Eliaba kha Davida chunga khan a ning an mur pe thuta, a kuang, “Hi hin imo ni zuang izong? Ramkâra ni kêlbelra omhai, tu mo ni zuang inenkoltir ngân? Ni lârirpâk lam le ni lungrîl saloi lam hi kin hriat. Irdoi en hrang ringota ni izuang papai a ni,” a tia.

²⁹ Davida khan, “I ngân mo ki tho? Chongbâi khat lua mo ki irdon thei loi hrang,” a tia.

³⁰ Mi danghai tiang a’rheia, kha ngêt kha a’rdonhaia; mipuihai khan matona an iti ang ngêt khan an tia.

³¹ Mi senkhatin Davida thu’nsîr kha an inhriatin chu, Saula kuang an insîr pe nôka, ama khan a koia,

³² Khan Davida’n Saula kuang, “Ama Filistian mi sika son tukhom chi no ri sehai, kei va fe ki ta, va doi ki ti,” a tia.

³³ Saula’n Davida kuang, “Nangma’n chu Filistia mihai so la doi thei no chi ni, ni la nâiinpang hraia. Ama kha chu a thoibop ata irdoi mi a lei nia,” a tia.

³⁴ Davida khan Saula kuang khan, “Ni suak hin ka pa kêlbelra ki enkol ngaia; kâmkeibaknei hai, savom hai an honga kêlbelra laia kêltehai an that tumhai hin,

³⁵ ki’rzûlhaia, ki’rsualpuihaia, kêltehai kha an bâi sûng ata ki isansuakhai ngai a ni. Kâmkeibaknei le savomhai hin ni sê hrangin an honga an bak mula ki chelhaia ki ithathai ngai a ni.

³⁶ Kâmkeibaknei le savom ki thathai suam thei ngaia, kha sertan loi Filistia mi, Pathian hring sipaihai hong saraitu kha lo pol chit ki ti.

³⁷ Kâmkeibaknei le savomhai kut pâr ata ni sansuaktu Rengpa khan, kha Filistia mi kut ata kha ni sansuak ngêt a ti,” a tia. Khanchu Saula khan Davida kuang khan, “A sa fe ngânin lân, Rengpa khan nang ompui ri se,” a tia.

³⁸ Saula khan Davida kha a râltukfam ar beltira, dâr lukhum an khumtira, rôppho a’rbeltira.

³⁹ Davida khan a râltukfam chunga khan Saula khandai kha a vonga; ama khan a la’rvo ngai no sikin, chângpui thei ta maka, khanchu Davida’n Saula kuang khan, “Hiang hin chu irsualpui thei no ning, hiang hin ki la tho ngai no sikin,” a tia. Khanchu Davida kha ar khek nôk vinga.

⁴⁰ A kêlbelra hôlna khianghrol kha a chôia, ivadunga lung irhlûm nâmtak chêng ving ringa a hrûta, a hmarsa sûnga khan a thuna, a sâilung dêng kha a chôia, Goliatha kha a va pan tâka.

Davida’n Goliatha thatna

⁴¹ Filistia mi kha a hong irthoka, Davida kha a hong pana; a pho chôitu kha a matona a fea.

⁴² Filistia mipa khan a hei ena, Davida kha a va hmu infelin chu a hmusit oka, Davida chu takmar pama om, mit meng enhoi, a thoibop a nia.

⁴³ Khanchu Filistia mi khan Davida kuang khan, “Ui mo ni ni isôn, khianghrol leh ni ni hong ipan kha?,” a tia. Khanchu Filistia mi khan a pathian insamin Davida kha khua a sâla.

⁴⁴ Davida kuang khan, “Hong ro, tho ni hmehai kha chung tianga vuang, vâhai le ramsahai lei pehai hi rong,” a tia.

⁴⁵ Davida khan, “Nangma’n chu khandaihai, ufeihai chôiin ni hor thoka; khannisian keima chu itinrêng sin thei Israel sipaihai Pathian ni ihmusit irhmingin ki hong irthok a ni.

⁴⁶ A vuan hin Rengpa’n nangma hi ki kuta a ni ipêk hrang a ni; nang that ki ta, ni lu nang tan pe hrang ki ni. Filistia sipaihai ruak chu a vuan hin chung tianga vâhai le ramsahai ki infâktir hrang a ni. Kha zoiin chu irnêng chunga mi murdihai hin Israelhai laia hin Pathian a om iti inhre suak ta an ti.

⁴⁷ Khanchu hitaka ar bûmhai murdi’n Rengpa khan a mihai saninzôkna hrang khandai le ufeihai ite nang mah ti hmu infel an ti. Irdoina chu Rengpa irdoina a nia, ama’n nangnihai hi ki kuta a ni ipêk hrang a ni,” a tia.

⁴⁸ Goliatha kha a hor thoka, Davida doi hrangin a hong nâi tîr tîrin chu, Davida kha Filistia mihai irtongna tiang Goliatha doi hrangin inrang takin an tâna,

⁴⁹ Davida khan a hmarsa a zu’npûra, lung sâihlûm a lâka, a sâilungdêng leh khan Goliatha kha a hong dênga. A chaldôr taka a hong dêng pea, a michala khan lungsâihlûm kha a lûta, Goliatha chu a khupin an rîl tâka.

⁵⁰ Khanchu Davida’n khandai chôi loiin Goliatha kha sâilungdêng le saihlûmin a thatpai ta.

⁵¹ Kha hnung chu Davida kha an tâna, Goliatha khandai kha a phôia, a lu a tan pea, a that tâka. Filistia mihaiin an rêngpa kha a thi ti an inhriatin chu lâizâm an thoa.

⁵² Israel mi le Juda mihai kha an thoia, huaizâm an thoa, Filistia mihai chu Gath dênin le Ekron kul dênin an irzûlhai ta. Filistia mi popliamhai kha Saraim lam tuanin Gath le Ekron dênin an dalh phôta.

⁵³ Israel mihaiin Filistia mihai irzûl an hong kîr nôka, an riakbuk an inmok pehai chita.

⁵⁴ Davida khan Goliatha lu kha a lâka, Jerusalema a chôia, khannisian Goliatha râltukfamhai chu a puan ina a siaa.

Saula makunga Davida a ngîrna

⁵⁵ Saula khan Goliatha doi hranga Davida fe kha a hmu’n chu a sipai hruaitu Abnera kuang khan, “Abnera hi nâipangte hi tu nâi mo a ini?,” a tia. Abnera’n, “O rêngpa, ki inhriat viat loi kêng,” a tia.

⁵⁶ Saula khan, “Khanchu fe’n lân, hi nâipang hi tu nâi mo a inih irdon infel ro,” a tia.

⁵⁷ Khanchu Davida khan Goliatha a that zoia, a hong kîr nôk tiang khan Abnera’n Saula kuang a hruaia, Davida khan Goliatha lu kha a la chôi maia.

⁵⁸ Khan, Saula khan a kuang, “Ruatharte tu nâi mo ni ini?,” a tia. Davida khan, “Bethlehem mi, ni suak Jesaia nâipa ki ni,” a tia.