1 SAMUELA 15 - PATHIAN LEKHABU IRTHIANG C.L. Bible (BSI)

Amalek-hai leh irdoina

¹ Samuela’n Saula kuang, “Rengpa’n a mi Israelhai rêng hranga sahriak irthûtir hranga a itîr kha ki ni. Atûn hin, Rengpa thu’nsîr kha irngai ro.

² Itinrêng sinthei Pathian khan, Amalek mihaiin Israelhai chunga an thil tho, Aigupta ram ata an hong suak laia an lei idoihai dân kha ki inhriat mai a ni.

³ Amalek-hai doi hrangin fe’n lân, an thil nei murdi hôi viat loiin thathai ving ro, nupang pasal, nâi irhnu nêk laihai, sechalhai, kêlbelrahai, saringseihai, sakuartunghai; a iti a ni,” a tia.

⁴ Khaang khan Saula’n mipuihai kha a bukkhômhaia, Telem khuaa a tephaia, Israel ata irthokin sipai nuai hni le Juda ata sipai sîngkhat an nia.

⁵ Khanchu Saula kha a mihai leh Amalek-hai khuaa khan a fea, ivadung kôl phâizôla an irsanga.

⁶ Saula’n Ken mihai kuang khan, “Suak unglân, Amalek-hai lai ata hi irthîn roi, khano’nchu nangni ki that irnghil duai khom a ni thei; nangni’n chu Israel irchi murdihai Aigupta rama irthoka an hong suak lai khan lung nin len khamhaia,” a tia. Khanchu Ken mihai kha Amalek mihai rengata an le’rkhâi tâka.

⁷ Saula khan Amalek mihai kha Havila irthokin Aigupta nisua dep tianga Sur dênin a doihaia.

⁸ Amalek mihai rêng Agaga kha a hringin an chela, mipuihai chu a thathai ta.

⁹ Khannisianlân Saula le a mihaiin Agaga kha an inzôka kêlbelra satak takhai le sehrâtchal satakhai le, kêlbelrate a sa murdihai khom that mahaia, a sa ok loi an inpâm loihai chu an thatpai vinga.

Saula hnôlna

¹⁰ Rengpa thu chu Samuela kuang a zuang tunga,

¹¹ “Saula rêng ki lei inchang hi chu ki irsîr a ni; hnung a ni songsana, ki thupêkhai zôm maka,” a tia. Samuela chu a ning an mur pea, zân khovârin Rengpa an sama.

¹² Zînga chu Samuela’n Saula irtongpui hrangin a fea, “Saula chu Karmel khuaa a fea, ama inhriat maina hrang lung a phuna, kha hnung chu Gilgal-a a fe ta,” tiin Samuela kha an hrila.

¹³ Samuela chu Saula kuang a fea, Saula khan a kuang, “Rengpa’n sat nang vur ri se; Rengpa thupêk angin ki itho tâk a ni,” a tia.

¹⁴ Khanchu Samuela’n, “A ni no’n te, sial le kêlbelra inhrâm ki inhriat hi imo a omzia?,” a tia.

¹⁵ Saula khan, “Ki mihaiin Amalek-hai ta an hong ilâk pehai a ni. Rengpa ni Pathian kuang irbôlna hranga mipuihaiin kêlbelra satak takhai le sehrâtchal sahai an ihôi a ni; a dang chu kin ithathai zit a ni,” a tia.

¹⁶ Samuela khan Saula kuang, “Dâihrek ro, zânina Rengpa’n ki kuanga a thu insîr, nan hril ki ti,” a tia. Saula khan a kuang, “Nin sîr pe ro,” a tia.

¹⁷ Samuela’n, “Nangma insâpin mi chînte angin irbe khomin lân, Israel nam pumpui hruaitu kêng ni ini, Rengpa’n Israelhai rêng ni hranga sahriak nang a irthutir a ni.

¹⁸ Ama’n nang a tîr suaka, ‘Fe’n lân, Amalek mihai a lei siat tâkhai kha thatpaiin lân, an irhmang zoi mâka chu doihai mai ro,’ nang a tia.

¹⁹ Khan, itho sika Rengpa thu kha zôm loiin, râllâk thilhai kha inbo zela ni inbo, Rengpa mithmua thil saloi ni tho tâka?,” a tia.

²⁰ Saula khan Samuela kuang, “Rengpa thu chu ki izôm mo ni ma, a ni tîrna tiang ang ki fea, Amalek rêng Agaga ki hong chela, Amalek mihai ki thatpaihai mo ni ma.

²¹ Khannisianlân, ki mihai khan, râllâk thil kêlbelrahai le sehrâtchalhai that irhmangpai ving hrang laia a sahai kha Gilgal khuaa Rengpa ni Pathian kuang irbôlna hrangin an hong ilâk a ni,” a tia.

²² Samuela’n, “Rengpa khan thuzôm a inuam ang khan hâlirvôm thilinhlanhai le irbôlnahai hi a ilôm ngai ma ni? Irngai ro, irbôlna nêkin thuzôm hi a sa uala, kêlbelrachal satak nêkin, a thuzôm hi a sa ual a ni.

²³ A chunga sualnahai hi tasân theihai sualna leh hmunkhat a ni, tukulliannahai hi millim biakna leh hmunkhat a ni. Rengpa thupêk ni hnôl tâk sikin ama khomin rêng hrangin nang a inuam loi a ni,” a tia.

²⁴ Saula khan, Samuela kuang, “A ni ki lei isual ok tâk a ni. Rengpa thupêk le ni thu kha ki lei izôm ta loi a ni, ki mipuihai ki chia, an thu ki lei ipom ual tâk a ni.

²⁵ Khannisianlân atûn hin ki sual ngaidamin lân, Rengpa chubai ki mûk theina hrangin Gilgal-a ni fepui ro,” a tia.

²⁶ Samuela’n Saula kuang, “Nang fepui viat no ning, Rengpa thupêk ni hnôl tâka. Rengpa khomin Israel rêng ni hrangin nang a inuam ual ta loi a ni,” a tia.

²⁷ Kha hnung chu Samuela kha fe hrangin a hong irsiamin chu, Saula’n a puan hmor kha a hon pota, a têr pe tâka.

²⁸ Samuela’n a kuang, “A vuana irthokin Rengpa’n Israel ram hi ni kut ata a lâkpai tâka, nangma nêka sa ual mi ni kôlvêla om a ipêk tâk a ni.

²⁹ Israelhai roiinpuina Pathian kha irsîr no nia, a lungrîl khom thûl no ni. Ama chu mihriam anga lungrîl irthûl ngai ni ma,” a tia.

³⁰ Saula khan, “Ki lei isual tâk a ni; khannisian ki mihai le hruaituhai Israel mipuihai kôla hin ni chôiindôm hrangin nang ki ingên a ni. Rengpa ni Pathian chubai ki mûk theina hrangin ni fepui ngêt ro,” a tia.

³¹ Khanchu Samuela’n Gilgal-a a fepuia, Saula khan Rengpa chubai a mûk tâka.

³² Khaang khan, Samuela’n, “Amalek mihai rêng Agaga kha keima kuang hong hruai roi,” a tia. Khanchu Agaga kha irlo’nthing puma chiin a va fea, a lungrîlin, “Thina chu ki zôk tâk chu ni a ti,” a tia.

³³ Samuela’n, “Ni khandaiin nu tamtak nâi boiin a isiam angin, ni nu khom nupang laia nâi boia siam ni ta a ti,” a tia. Khanchu Samuela khan, Agaga chu Gilgal khuaa Rengpa maichâm kôla khan ar chan indi tâka.

³⁴ Kha hnung chu Samuela kha Ramah khuaa a fea, Saula in omna Gibea khua khan a fe tâka.

³⁵ Khaangin Samuela chu a thi nî dênin Saula chu va’rtongpui nôk ta maka; khannisianlân, Samuela kha Saula sikin beiindong takin a iom tâk a ni. Rengpa khan Israelhai rêng ni hranga Saula a lei iphun kha a irsîr tâk a ni.